Levitikus 2 - সান্তালী বাইবেল

Jomakʼ samaṅokʼakʼko

^1-2 “Jãhãege Probhu Isor ńutumte jomakʼ samaṅokʼakʼe samaṅ khan uni do mĩhĩ holoṅteye onkaema. Uni do ona cetanre sunum dulkate onare kundurui dohoya ar Aronren hoponko ṭhen, metakʼme naekeko ṭhene idiya. Ar naeke do ona sunum sudhạ mitʼ cuputʼ holoṅe locaea ar kunduru do jotogeye hataoa ar jotowakʼ samaṅ baṅkate eken niạkoge pinḍ cetanreye jereda. Noa do seṅgelteakʼ mitʼṭecʼ jeredokʼ samaṅokʼakʼ kana one ona reakʼ jut so Probhu Isor doe kusiyakʼkan.

³ Noa jomakʼ samaṅokʼakʼ reakʼ sarecʼakʼ okako jinis tahen ona do Aron ar uniren hoponkoakʼ hoyokʼa. Probhu Isor ńutumte seṅgelre samaṅakʼ sanam samaṅokʼakʼ modre jomakʼ samaṅokʼakʼ reakʼ noa sarecʼakʼ hạṭiń do sonot utạrakʼ jinis kana.

⁴ “Jãhãege culhạre rapakʼakʼ jãhãn jiniste jomakʼ samaṅokʼakʼe menetʼ khan uni do bin khạmiyanakʼ mĩhĩ holoṅte benao hoyokʼtaea. Ona do sunum mesalakatʼ bin khạmiyanakʼ piṭhạ se sunum ojokʼ akawatʼ bin khạmiyanakʼ thapṛa piṭhạkoge hoyokʼma.

⁵ Ona jomakʼ samaṅokʼakʼ do luihạre isinokʼ lekanakʼ jiniskan khan ona do sunum mesalakatʼ bin khạmiyanakʼ mĩhĩ holoṅte benao hoyokʼa.

⁶ Ar ona tayom do kecakʼ kuṭrạkate onare sunum dulakʼ hoyokʼa; ar noa do mitʼṭen jomakʼ samaṅokʼakʼge hoyokʼa.

⁷ Ona jomakʼ samaṅokʼakʼ do luihạre isinakʼ jiniskan khan ona do sunum ar mĩhĩ holoṅte benao hoyokʼa.

⁸ Probhu Isor ńutumte jomakʼ samaṅokʼakʼ lạgitʼ noako jinis do ạgukate naekeakʼ tire jimại hoyokʼa ar naeke do pinḍ ṭhen onakoe idiya.

⁹ Jomakʼ samaṅokʼakʼ reakʼ purạ samaṅokʼakʼ bodolte oka hạṭiń emokʼ hoyokʼ naeke do pinḍ cetanre eken onae jereda. Noa do seṅgelre mitʼṭen samaṅokʼakʼ kana, one ona reakʼ jut so do Probhu Isore kusiyakʼkan.

¹⁰ Noa jomakʼ samaṅokʼakʼ reakʼ sarecʼakʼ okako tahen ona do Aron ar uniren hoponkoakʼ hoyokʼa. Probhu Isor ńutumte seṅgelre samaṅokʼakʼ sanamakʼko khon jomakʼ samaṅokʼakʼ reakʼ sarecʼ hạṭińko do sonot utạrakʼ jinis kana.

¹¹ “Probhu Isor ńutumte jomakʼ samaṅokʼ lạgitʼ jãhãnakʼge ạgukʼ ona do bin khạmiyanakʼ baṛe hoyokʼ ma. Probhu Isor ńutumte seṅgelre samaṅokʼakʼ jiniskore khạmi se rasa do alope jereda.

¹² Pạhilre rakabokʼ phosol samaṅ lạgitʼ khạmi ar rasa do Probhu Isor ṭhenko idi daṛeakʼa, menkhan oka samaṅokʼakʼ reakʼ jut so uniye kusiyakʼ onkan samaṅokʼakʼ lekate khạmi ar rasa do pinḍre alope jereda.

¹³ Jomakʼ samaṅokʼakʼ lạgitʼ okako jinis ạgukʼ onare do buluṅ emakʼ hoyokʼa. Israelren Isor onko lạgitʼ oka bondobose dohoakatʼ onate jomakʼ samaṅokʼakʼre buluṅ do baṅ badkakʼ hoyokʼa; joto lekan samaṅokʼakʼre buluṅ do emakʼtege hoyokʼa.

¹⁴ “Probhu Isor ńutumte samaṅokʼ lạgitʼ pạhil rakapʼakʼ phosol khon jãhãegeko ạgui enḍekhan ona nãwã gele ạgukate seṅgelrem ataea arem huṛuṅ gunḍạya.

¹⁵ Ar onare sunumem dulakʼa ar ona cetanre kundurum dohoya; noa do mitʼṭen jomakʼ samaṅokʼakʼge hoyokʼa.

¹⁶ Ona huṛuṅ gunḍạwakʼ jomakʼ ar sunum reakʼ okaṭakʼ hĩs do purạ samaṅokʼakʼ bodolte emokʼ hoyokʼ naeke do eken ona hĩs ar joto kunduru hataokate Probhu Isor ńutumte seṅgelre samaṅokʼakʼ lekateye jereda.