Levitikus 18 - সান্তালী বাইবেল

Laṭghaṭ ar loṭghuṭi reaṅ

^1-2 Probhu Isor do Mose Israelko galmaraoakoe metadea, “Aperen Probhu Isor doń ińkangea.

³ Onate ape okarepe girobasokʼ kan tahẽkan ar Misor disạmren hoṛko okakoko cekayetʼ tahẽkan onka do alope kạmiya ar ińiń idiyetʼpe ona Kanan disạmren hoṛko lekahõ alope colona. Ar onḍenko hoṛko leka hõ alope calakʼa.

⁴ Ape do ińakʼ ạn-ạrikope dohoya. Ar iń emakʼ niạmko joton salakʼpe manaoa. Iń aperen Probhu Isorge noa doń menetʼkana.

⁵ Ińakʼ niạm ar ạn-ạriko manao hoyokʼtapea, ente okoeye manaoa uni do ona hotetege jiwetʼe tahena. Iń kangeạń Probhu Isor do.

⁶ “Ape jãhãege aperen nijerren hoṛko tulucʼ alope giticʼmidokʼa. Iń kangeạń Probhu Isor do.

⁷ Ape modren jãhãege acʼren eṅgatetʼ sãoteye giticʼmidokʼte apattetʼ aloe bemanotema. Ente uni doe acʼren eṅgattetʼ kana; uni tulucʼ giticʼmidokʼ do baṅ ganokʼtaea.

⁸ Kạki eṅgat ar kạki goṅgo boeha kuṛi tulucʼ hõ giticʼmidokʼ do baṅ ganokʼtapea. Arpe onkae khan babape bemanotea.

⁹ Nijer misera ar kạki goṅgo boeha kuṛi sãote giticʼmidokʼ hõ baṅ ganokʼa, baṅ doe apattetʼren hoponera kan ar baṅ doe eṅgattetʼren hoponera kan, ar mitʼ oṛakʼre kin janamokʼ se eṭakʼ eṭakʼ ṭhạ̃irekin janamokʼ.

¹⁰ Hopon se hoponeraren kuṛi sãote giticʼmidokʼ hõ baṅ ganokʼa, ona iạte do apnartetʼgeye bemanotokʼa.

¹¹ Kạki gogowakʼ kukhi khone janam akan misera sãote giticʼmidokʼ hõ baṅ ganokʼa. Uni doe misera kana.

¹² Babaren misera sãote giticʼmidokʼ hõ baṅ ganokʼa, ente uni do ạpumakʼ hoṛmo hạṭiń kanae.

¹³ Gogoren boeha kuṛi sãote giticʼmidokʼ hõ baṅ ganokʼa, ente uni do eṅgamakʼ hoṛmo hạṭiń kanae.

¹⁴ Babaren boehakoren bạhuko sãote giticʼmidokʼ hõ baṅ ganokʼa, ente uni doe hopongo kana.

¹⁵ Kimintetʼ sãote giticʼmidokʼ hõ baṅ ganokʼa. Ente uni doe hopontetʼren bạhukana onate uni tulucʼ giticʼmidokʼ do baṅ ganokʼa.

¹⁶ Boeharen bạhu sãote giticʼmidokʼ hõ baṅ ganokʼa. Arem onka lekhan boehamem bemanotea.

¹⁷ Maejiu ar uniren hoponera sãote giticʼmidokʼ hõ baṅ ganokʼa. Ar uni maejiuren hopontetʼ se hoponeraren kuṛi sãote giticʼmidokʼ hõ baṅ ganokʼa, ente uni do maejiuren hoṛmo hạṭiń kanae. Ar noa do mitʼṭecʼ bạṛicʼ kạmi kangea.

¹⁸ Bạhu jiwetʼ tahenre bạhuren boeha kuṛi baplaye hõ baṅ ganokʼa.

¹⁹ “Candoteakʼ hoyokʼ oktere maejiu sãote giticʼmidokʼ hõ baṅ ganokʼa.

²⁰ Eṭakʼ jãhãe hoṛren bạhu sãote giticʼmidokʼte apnar besaphakʼ hõ baṅ ganokʼa.

²¹ “Ape modre jãhãege acʼren hopontetʼ se hoponera Molok debota ńutumte seṅgelre aloko samaṅkoma se okalekate hõ acʼren Isorakʼ ńutum aloe besonot ocoytaema. Iń kangeạń Probhu Isor do.

²² “Maejiuko tulucʼ giticʼmidokʼ leka herel tulucʼ herel giticʼmidokʼ hõ baṅ ganokʼa. Noa do mitʼṭecʼ bạṛicʼ utạrakʼ kạmikana.

²³ Janwar sãote giticʼmidokʼte jãhãe herel hoṛ apnar aloe besapha ocokʼma. Ar jãhãn janwar sãote jãhãe maejiuakʼ giticʼmidokʼ hõ baṅ ganokʼa. Noako do mitʼṭecʼ dusṭạmi ar hirkhạwakʼ kạmikana.

²⁴ “Nonkanakʼ kạmikate ape modre okoe hõ aloe besapha ocokʼma, ente ape samaṅ khon okoe jạtrenkoń laga ńirko onko hõ apnarte onkageko besapha akana.

²⁵ “Nonkate onkoakʼ disạm hõ disạm besapha akantakoa. Onate bedhoromakʼ iạte disạm hõń sạjạyeda ar disạm hõ acʼren hoṛkoe ulạ giḍikako kana.

²⁶ Menkhan ape do ińakʼ niạm ar ạn-ạriko manaope. Ape jạtren se ape talareko girobasokʼ kan eṭakʼ jãhãe jạtren hoṛko hõ jemon nonkan bạṛicʼakʼ aloko kạmi.

²⁷ Laha khon okoe ona disạmreko girobasokʼ kan onko do onkako kạmikante disạmko besapha akada.

²⁸ Ape hõ disạmpe besaphae enḍekhan laha jạtrenko leka disạm hõ apeye ulạ giḍikapea.

²⁹ “Jãhãege nonkan bạṛicʼakʼe kạmi enḍekhan uni do acʼ jạtrenko khone marao ocokʼa.

³⁰ Ińakʼ hukumko senakʼpe ar onḍe seṭerkate lahaten hoṛko leka do alope colona. Ar noako kạmikate alope besapha ocokʼa. Ar iń kangeạń aperen Probhu Isor do.”