Levitikus 16 - সান্তালী বাইবেল

Puruchun reakʼ din

¹ Aronren hoponkin do Probhu Isor samaṅre sen soren iạtekin gocʼen tayom Probhu do Moseye galmaraoadea.

² “Uniye menkeda, “Amren dadam Aron metaeme, goha sinduk cetan reakʼ daya duṛupʼakʼ samaṅre menakʼ orwal tayom secʼ reakʼ sonot utạrakʼ ṭhạ̃ire acʼakʼ kusi leka jemon aloe bolokʼ. Are onkae khan uni doe gujukʼa, ente iń do rimil khunṭire daya duṛupʼakʼ cetanreń sodorokʼa.

³ “Ar onḍe bolokʼ lahare jemon nonkae sapṛaokʼ. Uni do kại ńutumte samaṅokʼakʼ lạgitʼ mitʼṭen ḍaṅgra ar jeredokʼ samaṅokʼakʼ lạgitʼ mitʼṭen bheḍae ạguiye.

⁴ Uni do mĩhĩ musnạ kicricʼ reakʼ sonot kicricʼe horoga ar bhitrire hõ mĩhĩ musnạ kicricʼ reakʼ huḍiń kicricʼe horoga. Ar mĩhĩ musnạ reakʼ paṭheyakʼte ḍanḍae paṭhekʼa ar bohokʼ do mĩhĩ musnạ kicricʼteye dạhṛikʼa. Noa do sonotakʼ kicricʼko kana. Ar noa horog lahare uni doe ḍạbrạ saphakʼa.

⁵ Kại ńutumte samaṅokʼakʼ lạgitʼ uni do Israelko ṭhen khon barea merom boda ar jeredokʼ samaṅokʼakʼ lạgitʼ mitʼṭen bheḍae hataoea.

⁶ Ar Aron do acʼ ar acʼ bõsrenkoakʼ puruchun lạgitʼ kại ńutumte samaṅokʼren ḍaṅgrae samaṅea.

⁷ Ona tayom unkin merom boda do ńapamokʼ tạmbu reakʼ duạr ṭhen Probhu Isor samaṅreye ạgukinạ.

⁸ Uni do gulibãṭkateye ńela, okoeṭakʼ boda do Probhu Isor lạgitʼ kanae ar okoeṭakʼ doe Asaselren kana.

⁹ Ar okoeṭakʼ merom boda do Probhu Isorren menteye ńelokʼ Aron do kại ńutumte unigeye dãṛẽyea.

¹⁰ Menkhan gulibãṭkate okoeṭakʼ merom boda do Asasel ńutumteye rakabokʼ uni do jiwetʼtege Probhu Isor samaṅre ạguiye hoyokʼa ar kại ńutumte puruchun lạgitʼ hahaṅkarre aṛakʼkae hoyokʼa.

¹¹ “Aron do acʼ ar acʼ bõsrenkoakʼ kại ńutumte puruchun lạgitʼ ạguakade uni ḍaṅgrae gurea.

¹² Ar Probhu Isor samaṅre okaṭakʼ pinḍ menakʼ ona khon jolokʼkan aṅgra seṅgel hataokate mitʼṭecʼ ḍhạknicʼreye dohoya ar gunḍạ akatʼ bar cuputʼ dhupe hataoa. Ar orwal reakʼ bhitri secʼe adera.

¹³ Onḍe uni do Probhu Isor samaṅre seṅgel cetanre dhupe jereda. Ar ona dhup reakʼ dhũạte goha sinduk cetan reakʼ daya duṛupʼakʼ do danaṅokʼa ar onate uni do bae gujukʼa.

¹⁴ Ar ona tayom do uni ḍaṅgrawakʼ thoṛa mãyãm kạṭupʼte hataokate daya duṛupʼakʼ reakʼ samaṅ secʼe irciyakʼa. Ona tayom arhõ kạṭupʼkote thoṛa mãyãm hataokate daya duṛupʼakʼ samaṅre eae dhaoe irciyakʼa.

¹⁵ “Ar ona tayom uni do hoṛkoakʼ kại ńutumte samaṅ akade merom bodae gurea ar uniyakʼ mãyãm do orwal bhitri secʼe adera ar ḍaṅgra mãyãmte okae cekaletʼ onkage nui bodawakʼ mãyãmte hõe onkaea. Ar sinduk reakʼ daya duṛupʼakʼre ar samaṅ secʼre ona mãyãme irciyakʼa.

¹⁶ Ar Aron do Israelkoakʼ jãhãnakʼ ghạṭ iạte, onkoakʼ besaphawakʼ iạte ar onkoakʼ bebatao iạte sonot utạrakʼ ṭhạ̃ire nonkageye puruchuna. Uni do Israelkoakʼ besaphawakʼko talare teṅgo akan ńapamokʼ tạmbu lạgitʼ hõ inạ mitʼ lekageye onkaea.

¹⁷ Sonot utạrakʼ ṭhạ̃ire tin hạbicʼ Aron do acʼ ar acʼren bõsrenkoakʼ ar goṭa Israel jạtrenkoakʼ kại ńutumte puruchun reakʼ kạmi sạtkate ạuriye oḍok hijukʼ hạbicʼ okoe hõ ńapamokʼ tạmbure bako tahẽdaṛeakʼa.

¹⁸ Ńapamokʼ tạmbu khon oḍok hecʼkate Aron do Probhu Isor samaṅre pinḍ reakʼ besaphawakʼ reakʼe puruchuna. Uni do ḍaṅgra ar merom bodawakʼ thoṛa mãyãm hataokate pinḍ reakʼ dereńkoreye ojokʼakʼa.

¹⁹ Pinḍ sapha ar Israelko sonotko lạgitʼ uni do kạtupʼte mãyãm hataokate ona ar onko cetanre eae dhaoe irciya.

²⁰ “Sonot utạrakʼ ṭhạ̃i, ńapamokʼ tạmbu ar pinḍ ńutumte puruchun reakʼ kạmi sạtkate Aron do uni jiwetʼicʼ merom bodae ạguiyea.

²¹ Ar acʼakʼ banar ti do uni merom bodawakʼ bohokʼreye dohoya ar Israelkoakʼ sanam behokakʼ ar bebatao, metakʼme onkoakʼ sanam ghạṭko reakʼ aṅgockate merom bodawakʼ bohokʼreye ladewaea. Ar ona kạmi lạgitʼe sapṛao akan hoṛ hotete uni do hahaṅkarteye kolgotʼkaea.

²² Uni hoṛ do idikate hahaṅkarreye aṛakʼ oṭokaea. Ar uni merom boda do nisun jaegakore onkoakʼ sanam ghạṭkoe gokʼ baṛaea.

²³ “Sonot utạrakʼ ṭhạ̃ire bolokʼ lahare Aron okako mĩhĩ musnạ kicricʼe horog ona do ńapamokʼ tạmbure ruạṛkate arhõ onḍege doho oṭokakʼ hoyokʼtaea.

²⁴ Ona tayom uni do sonot tạmbu oṛakʼ reakʼ ṭhạ̃ire senkateye ḍạbrạkʼa ar acʼakʼ kicricʼe horoga. Ar oḍok hecʼkate acʼ ar acʼren hoṛkoakʼ kại ńutumte puruchun reakʼe kạmiya.

²⁵ Ar kại ńutumte samaṅ akade janwarakʼ itil do pinḍ cetanreye jeretʼ giḍikakʼa.

²⁶ Ar okoeṭakʼ hoṛ do Asasel lạgitʼ merom bodae aṛakʼgotʼkae uni hõ acʼakʼ kicricʼe saphaetaea are ḍạbrạ saphakʼa, ar ona tayom do ḍera bhitriteye bolokʼa.

²⁷ Kại reakʼ puruchun lạgitʼ kại ńutumtekin samaṅakan ḍaṅgra ar merom boda one unkinakʼ mãyãm do sonot utạrakʼ ṭhạ̃ire aderen, unkin do ḍera bahrete idikate harta, jel ar gubri sudhạ atar giḍikạkin hoyokʼa.

²⁸ Ar okoe hoṛ ona atar giḍikakʼ lạgitʼ bahreteye calakʼ uni do acʼakʼ kicricʼkoe saphaetaea are ḍạbrạ saphakʼa ar ona tayom do ḍera bhitriteye bolokʼa.

²⁹ “Inạ tayom okań menetʼ ona do ape lạgitʼ mitʼṭecʼ tahẽ utạrakʼ niạmge tahena. Bochor reakʼ eae cando reakʼ gelakʼ dinre ape do apeakʼ ontorpe nindhạn ocoytapea. Enhilokʼ do cetʼge alope kạmiya. Israelkoge cetʼ ar Israelko talareko girobasokʼkan eṭakʼ jạtren hoṛkoge cetʼ, ona do sanamko manao hoyokʼtapea,

³⁰ ente niạ dinrege kại ńutumte puruchun reakʼ kạmikatepe saphakʼa, ar ona tayom do Probhu Isor samaṅre apeakʼ sanam kại khonpe sapha utạrokʼa.

³¹ Ar enhilokʼ do apeakʼ jirạukʼ dinge hoyokʼa. Niạ dinre apan ạpin ontorpe nindhạntapea. Ar noage ape lạgitʼ tahẽ utạrakʼ niạm do hoyokʼa.

^32-33 Jãhãe naekege maraṅ naeke lekate tinre acʼ apattetʼakʼ hudạreye ojokʼ bahal ocokʼa unre uni hõ noa kại ńutumte puruchun reakʼ kạmi hoyokʼtaea. Uni do mĩhĩ musnạ kicricʼ horokʼkate sonot utạrakʼ ṭhạ̃i reakʼ, ńapamokʼ tạmbu reakʼ, pinḍ reakʼ, naeke reakʼ ar goṭa Israel jạtrenkoakʼ besaphawakʼ ar kại ńutumte puruchun reakʼe kạmiya.

³⁴ “Noa do ape lạgitʼ mitʼṭecʼ niạm kana. Uni do Israelkoakʼ sanam kại reakʼ puruchun lạgitʼ bochorre mitʼ dhao kạmi hoyokʼtaea.” Ar Mose do Probhu Isore hukum akawade leka jotowakʼgeye kạmikeda.