Levitikus 15 - সান্তালী বাইবেল

Hoṛmo khon oḍokokʼ besaphawakʼ reaṅ

¹ Probhu Isor do Mose ar Arone metatʼkinạ,

² “Israelko galmaraoako ben, jãhãe herel hoṛakʼ herelteakʼ khon jãhãn besaphawakʼ oḍokokʼ enḍekhan ona iạte uni do besaphae hoyokʼa.

³ Ar herelteakʼ iạte besaphakʼ reakʼ do nonka kana: baṅ do uniyakʼ hoṛmo khon oḍokokʼkantae ar baṅ do oḍokokʼ bond akantae uni do ona iạtegeye besaphagea.

⁴ Ar okaṭakʼ aṭetʼre uniye giticʼ are duṛupʼ ona joto do besaphawakʼ hoyokʼa.

⁵ Hoṛmo khon besaphawakʼ oḍokokʼkantae hoṛakʼ aṭetʼ okoeye joṭed uni hõ acʼakʼ kiricʼko saphaetae hoyokʼtaea, ar ạyupʼ hạbicʼ besapha akane tahena.

⁶ Ar okoe uniyakʼ duṛupʼakʼreye duṛupʼ uni hõ acʼakʼ kicricʼ saphaetae hoyokʼtaea, ar ạyupʼ hạbicʼ besapha akane tahena.

⁷ Jãhãe hoṛakʼ besaphawakʼ oḍokokʼkan ar uni okoeye joṭede uni hõ acʼakʼ kicricʼ saphae hoyokʼtaea are ḍạbrạ saphakʼa, ar ạyupʼ hạbicʼ besaphageye tahena.

⁸ Okoe hoṛakʼ besaphawakʼ oḍokokʼkantae ar jãhãe sapha hoṛe thoae enḍekhan sapha akan hoṛ do kicricʼ saphaetae hoyokʼtaea ar acʼ hõe ḍạbrạ saphakʼa, ar ạyupʼ hạbicʼ besapha akane tahena.

⁹ Jãhãe hoṛakʼ hoṛmo khon besaphawakʼ oḍokokʼkantae ar uni jãhãtegeye calakʼ ar jãhãregeye duṛubokʼ ona ṭhạ̃i do besaphawakʼ hoyokʼa.

¹⁰ Ar uniyakʼ duṛupʼakʼ ṭhạ̃i jãhãegeye joṭed uni hõ ạyupʼ hạbicʼ besapha akane tahena. Ar uniyakʼ duṛupʼakʼ okoeye kuṭuṅ uni hõ acʼakʼ kicricʼ saphaetae hoyokʼtaea, ar ạyupʼ hạbicʼ besapha akane tahena.

¹¹ Besaphawakʼ oḍokokʼkantae hoṛ ti begor ạbukte jãhãeye joṭede enḍekhan uni hoṛ hõ acʼakʼ kicricʼko saphae hoyokʼtaea, ar ạyupʼ hạbicʼ besapha akane tahena.

¹² Besaphawakʼ oḍokokʼkantae hoṛ jãhãn hasa reakʼ bhajane joṭed enḍekhan ona do rạputʼ giḍikakʼ hoyokʼa, ar kaṭ reakʼ bhajan do ạrupʼ saphae hoyokʼa.

¹³ “Jãhãe hoṛakʼ hoṛmo reakʼ besaphawakʼ oḍokokʼ thirlentae khan uni do saphakʼ lạgitʼ eae dine lekhaea ar eae hilokʼ do kicricʼkoe saphaetaea are ḍạbrạ saphakʼa ar unre doe sapha utạrokʼa.

¹⁴ Ar irạlakʼ dinre uni do barea potam hopon arbaṅ khan barea parwa hopon ńapamokʼ tạmbu reakʼ duạr ṭhen Probhu Isor samaṅreye ạgukinạ ar naeke ṭhene jimạkinạ.

¹⁵ Unre naeke do unkin modre mitʼṭen do kại ńutumte ar eṭagicʼ do jeredokʼ samaṅokʼakʼ menteye samaṅkinạ. Ar besaphawakʼ oḍokokʼ iạte okoe chutgeye tahẽkan uni saphakʼ lạgitʼ naeke do Probhu Isor samaṅreye puruchuna.

¹⁶ “Jãhãe herel hoṛakʼ herelteakʼ khon besaphawakʼ oḍokokʼtae enḍekhan uni do ḍạbrạ saphakʼ hoyokʼtaea, ar ạyupʼ hạbicʼ besapha akane tahena.

¹⁷ Jãhãn kicricʼ se harta reakʼ jinisre uniyakʼ hoṛmo khon oḍokokʼakʼ jinis laṭkaolen khan ona do dakʼte ạrupʼ saphae hoyokʼa, ar ạyupʼ hạbicʼ ona do besapha akan tahena.

¹⁸ Jãhãe herel hoṛ acʼren bạhutetʼ sãoteye giticʼmitʼlen khan ar herelteakʼ reakʼ itạ oḍoklentae khan unkin do bana hoṛge ḍạbrạ saphakʼ hoyokʼtạkina, ar ạyupʼ hạbicʼ besapha akankin tahena.

¹⁹ “Maejiu do candoteakʼ hoyokʼkan iạte uni do eae din hạbicʼ besapha akane tahena. Ar inạko dinre uni okoeye joṭede uni hõ ạyupʼ hạbicʼ besapha akane tahena.

²⁰ Inạko dinre jãhãnakʼrege uniye duṛubokʼ ona do jotoge besaphawakʼ hoyokʼa.

²¹ Ar okoe uniyakʼ aṭetʼakʼe joṭedtae uni hõ acʼakʼ kicricʼ ạrupʼ saphaetae hoyokʼa, ar ạyupʼ hạbicʼ besapha akane tahena.

²² Ar uni maejiu okaṭakʼreye duṛupʼ akan ar ona jãhãeye joṭed, enḍekhan uni hõ acʼakʼ kicricʼkoe saphaetaea, ar ạyupʼ hạbicʼ besapha akane tahena.

²³ Uniyakʼ aṭetʼakʼ se duṛupʼakʼ okoeye joṭed uni hõ ńindạ hạbicʼ besapha akane tahena.

²⁴ Jãhãe herel hoṛ nonkan maejiu sãoteye giticʼmidokʼ ar uniyakʼ candoteakʼ reakʼ mãyãm uniyakʼ hoṛmore laṭkaokʼ enḍekhan uni do eae din hạbicʼ besapha akane tahena. Ar inạ eae din uni okaṭakʼ aṭetʼreye giticʼ ona hõ besaphawakʼ hoyokʼa.

²⁵ “Candoteakʼ chaḍa jãhãe maejiu ḍher din khon mãyãm oḍokokʼtege tahentae se dinko parom calaoen tayom hõ mãyãm oḍokokʼ baṅ thirokʼtae enḍekhan uni doe besaphagea.

²⁶ Candoteakʼ jokhecʼ cetʼleka hoyokʼ onkage mãyãm oḍokokʼ dinkore uni okaṭakʼ aṭetʼreye giticʼ ar okaṭakʼreye duṛupʼ ona do besaphawakʼ hoyokʼa.

²⁷ Okoe ona aṭetʼakʼ se duṛupʼakʼe joṭed uni hõ besapha akane hoyokʼa; uni do kicricʼko saphae hoyokʼtaea are ḍạbrạ saphakʼa, ar ạyupʼ hạbicʼ besapha akane tahena.

²⁸ Uniyakʼ ona mãyãm oḍokokʼ thirlenre hõ uni do eae din hạbicʼ onka tahen hoyokʼtaea ar eae din hilokʼre doe sapha utạrokʼa.

²⁹ Ar irạlakʼ dinre uni do barea potam hopon arbaṅ khan barea parwa hopon ńapamokʼ tạmbu reakʼ duạr ṭhen Probhu Isor samaṅre naeke ṭhene ạgukinạ.

³⁰ Ar naeke do unkin modre mitʼṭen do kại ńutumte samaṅokʼakʼ ar eṭakʼicʼ do jeredokʼ samaṅokʼ menteye samaṅkinạ. Nonkate naeke do Probhu Isor samaṅreye puruchuna uniyakʼ saphakʼ lạgitʼ.”

³¹ Mucạtʼre Probhu Isor do Mose ar Arone metatʼkinạ, “Israelko talare ińakʼ ḍera tạmbu menakʼa. Onate sanam lekan besaphawakʼ khon pharakre ben dohokoa jemon ḍera tạmbu besaphakʼte aloko gujukʼ.”

^32-33 Herel hoṛakʼ herelteakʼ itạ, maejiukoakʼ mãyãm oḍokokʼ, herel se maejiukoakʼ hoṛmo reakʼ jãhãn besaphawakʼ ar besapha maejiu tulucʼe giticʼmidokʼ ar noako iạte besapha akane hoyokʼ enḍekhan uni lạgitʼ kangea noako ạn do.