Levitikus 14 - সান্তালী বাইবেল

Murhucʼjom rog khon saphakʼ reakʼ

¹ Ona tayom Probhu Isor do Moseye galmaraoadea,

² “Murhucʼjom rog hoyakan nonkan jãhãe hoṛakʼ saphakʼ reakʼ dinre niạ niạmge manao hoyokʼa. Uni do naeke ṭhene calakʼa.

³ Ar naeke do ḍera bahrete idikateye biḍạutaea. Ar uni hoṛ do murhucʼjom rog khone boge akan khan,

⁴ enḍekhan naeke do uni saphakʼ lạgitʼ barea jiwetʼ sapha cẽṛẽ, debdạru kaṭ, jeṅgetʼ arakʼ sutạm ar husopʼ dare reakʼ ḍạr ạgu torae lạgitʼe metaea.

⁵ Ona tayom naeke do hasa bhajanre jharna khon rakapʼ ạguakatʼ dakʼ cetanre unkin cẽṛẽ modre mitʼṭen do goje reakʼe hukuma.

⁶ Ar jiwetʼicʼ cẽṛẽ, debdạru kaṭ, jeṅgetʼ arakʼ sutạm ar husopʼ dạṛ do jharna dakʼ cetanre gocʼ akade cẽṛẽwakʼ mãyãmreye topoya.

⁷ Ar naeke do murhucʼjom rog khone sapha ocokʼkan hoṛ eae dhao mãyãme irciwaea ar sapha akanae menteye lại sodorea. Ar uni jiwetʼicʼ cẽṛẽ do ṭạnḍi secʼe aṛakʼgotʼkaea.

⁸ Ar sapha ocokʼicʼ do acʼakʼ hoṛmo ar bohokʼ reakʼ sanam upʼko ar pạlku upʼkoe hoyo saphaea, ar kicricʼkoe saphaetaea are ḍạbrạ saphakʼa. Ar ona tayom do sapha akane hoyokʼa. Uni do ḍerateye bolo daṛeakʼa menkhan eae din hạbicʼ acʼakʼ tạmbu bahrere tahen hoyokʼtaea.

⁹ Ona eae mãhã hilokʼ uni do acʼakʼ hoṛmo reakʼ sanam upʼ, metakʼme uniyakʼ bohokʼ reakʼ upʼ, goco, mẽtʼ kuṭi reakʼ upʼ ar hoṛmo reakʼ upʼko hõ hoyo saphaetae hoyokʼa. Uni do acʼakʼ kicricʼkoe saphaetaea ar dakʼreye ḍạbrạ saphakʼa, ar ona tayom doe sapha utạrokʼa.

¹⁰ “Ar irạlakʼ dinre do barea bheḍa hopon ar mitʼ bochorren mitʼṭen bhiḍi hopone ạgu darakinạ. Onko mimitʼko do niphuṭ utạrko hoyokʼ jạruṛa. Ar ona sãote uni do jomakʼ samaṅokʼakʼ lạgitʼ mõṛẽ keji ponsae gram sunum mesalakatʼ mĩhĩ holoṅ ar mitʼ liṭar pe poa sunum ạgui hoyokʼtaea.

¹¹ Ar okoeṭakʼ naeke uniyakʼ saphakʼ reakʼe kạmikatae uni do samaṅokʼakʼ lạgitʼe ạguakatʼ uniyakʼ jinisko ńapamokʼ tạmbu reakʼ duạr ṭhen Probhu Isor samaṅreye ạguiya.

¹² “Ar naeke do unkin bhiḍi modren mitʼṭene hataoea ar mitʼ liṭer pe poa sunum tulucʼ dos ńutumte samaṅokʼakʼe samaṅa ar dolek samaṅokʼakʼ ńutumte Probhu Isor samaṅreye dolaoa.

¹³ Sonot tạmbu reakʼ ṭhạ̃ire okare kại ńutumte samaṅokʼakʼ ar jeredokʼ samaṅokʼakʼren janware dãṛẽ ocokʼ onḍege uni bhiḍi do dãṛẽye hoyokʼa. Ar kại ńutumte samaṅokʼakʼ jel reakʼ lekage dos ńutumte samaṅokʼakʼ reakʼ jel hõ naekeakʼ hoyokʼtaea. Noa jel do sonot utạrakʼ jinis kana.

¹⁴ Naeke do dos ńutumte samaṅ akade janwarakʼ mãyãm khon thoṛa hataokate uni hoṛakʼ lutur reakʼ gonḍare ar jojom ti ar jojom jaṅga reakʼ buḍhạ kạṭupʼreye jotʼaea.

¹⁵ Ar inạ tayom ona sunum do acʼakʼ leṅga ti talkareye dula.

¹⁶ Ar jojom ti reakʼ kạṭupʼko sunumre cạbukʼkate Probhu Isor samaṅre eae dhaoe irciya.

¹⁷ Ona tayom acʼakʼ ti reakʼ sarecʼakʼ sunum khon thoṛa hataokate uni hoṛakʼ jojom lutur reakʼ gonḍare ar jojom ti ar jojom jaṅga reakʼ buḍhạ kạṭupʼre dos ńutumte dãṛẽ reakʼ mãyãm cetanreye lagaoaea.

¹⁸ Ar ti reakʼ sarecʼ sunum do bohokʼreye ojokʼaea. Nonkate Probhu Isor samaṅre uni ńutumteye puruchuna.

^19-20 “Okoe hoṛe sapha ocokʼ naeke do kại ńutumte samaṅokʼicʼ janware samaṅete uniyakʼe puruchunkataea. Ona tayom uni do jeredokʼ samaṅokʼren janware dãṛẽyea ar jomakʼ samaṅokʼakʼ jinisko sãote pinḍ cetanre samaṅkate uni reakʼe puruchuna, ar nonkate uni doe sapha utạrokʼa.

^21-22 “Menkhan uni doe reṅgecʼ hoṛkan khan ar onako ạgui reakʼ daṛe bạnukʼtae enhõ dos ńutumte samaṅokʼakʼ lạgitʼ uni do mitʼṭen bheḍa hopon ạguiye hoyokʼtaea, ar naeke do puruchun ńutumteye dolaoea. Ar ona sãote uni hoṛ do jomakʼ samaṅokʼakʼ lạgitʼ mitʼ keji irạl sae gram sunum mesalakatʼ mĩhĩ holoṅ, mitʼ liṭar pe poa sunum ar barea potam hopon baṅkhan barea parwa hopon ạgukin hoyokʼtaea, noa do uniyakʼ daṛeakʼ bahre do baṅkana. Ar unkin cẽṛẽ modre mitʼṭen do kại ńutumte ar eṭagicʼ do jeredokʼ samaṅokʼicʼ ńutumteye samaṅkina.

²³ Ona tayom irạl din hilokʼre saphakʼ lạgitʼ uni hoṛ do noako jinis ńapamokʼ tạmbu reakʼ duạr ṭhen Probhu Isor samaṅre naeke ṭhen ạgui hoyokʼtaea.

²⁴ Ar naeke do dos ńutumte samaṅokʼren bheḍa ar sunum do dolek samaṅokʼakʼ lekate Probhu Isor samaṅreye dolaoa.

²⁵ Uni dãṛẽ akade bheḍa khon thoṛa mãyãm hataokate naeke do uni hoṛakʼ jojom lutur reakʼ gonḍare ar jojom ti ar jojom jaṅga reakʼ buḍhạ kạṭupʼreye jotʼaea.

^26-27 Uni do acʼakʼ leṅga ti talkare thoṛa sunume duljoṅa ar jojom ti reakʼ kạṭupʼte rakapʼkate eae dhao Probhu Isor samaṅreye irciya.

²⁸ Uni hoṛakʼ jojom lutur reakʼ gonḍare ar jojom ti ar jojom jaṅga reakʼ buḍhạ kạṭupʼre okakore naeke do dos ńutumte dãṛẽ reakʼ mãyãme jotʼade tahekan ona jaegakore hõ ona sunume jotʼaea.

²⁹ Probhu Isor samaṅre puruchun lạgitʼ uni do ti reakʼ sarecʼakʼ sunum uni hoṛakʼ bohokʼreye ojokʼaea.

^30-31 Naeke do potam se parwa uni jãhãeṭakʼgeye kulạu daṛeakin unkingeye hataokina. Ona tayom unkin cẽṛẽ modre mitʼṭen do kại ńutumte samaṅokʼakʼ ar eṭakʼicʼ do jeredokʼ samaṅokʼakʼ menkate, jomakʼ samaṅokʼakʼ sãoteye samaṅkinạ. Nonkate naeke do Probhu Isor samaṅre uniyakʼ saphakʼ reakʼe puruchuna.”

³² Murhucʼjom rog menakʼtae hoṛ okoe do saphakʼ lạgitʼ daṛe bạnukʼtae eken uni hoṛ lạgitʼ kana noa niạm do.

Oṛakʼre rog reakʼ dagko

³³ Ona tayom Probhu Isor do Mose ar Aron galmaraoatʼkinteye metatʼkinạ,

³⁴ “Okaṭakʼ disạm do ạidạri menteń emape lạgidokʼkan ona disạmte bolokate onḍe jãhãn mitʼṭecʼ oṛakʼre murhucʼjom rog iń paṛao ocoy,

³⁵ enḍekhan oṛakʼren mạlik do naeke ṭhen senkateye mena, ‘ińakʼ oṛakʼre cetʼ coṅ murhucʼjom rog lekań ńeleda.’

³⁶ Ar naeke do oṛakʼre ạuriye bolokʼre oṛakʼ reakʼ sanamakʼko oḍok ạgui reakʼe hukuma jemon oṛakʼ reakʼ cetʼge besapha mente alo sodorokʼ. Ar ona tayom do oṛakʼte bolokateye biḍạu aṭkara.

³⁷ Bhit reakʼ rog biḍạu jokhecʼ bhitre hạriạṛ ar arakʼ macha khoepakʼge menakʼ khan ar bhit khon copotʼge ńelokʼ,

³⁸ enḍekhan uni do ona oṛakʼ khone oḍokokʼte duạr do eae din hạbicʼe sińkakʼa.

³⁹ Ar eaeakʼ dinre uni do ruạṛ hecʼkate arhõe biḍạu aṭkara. Unre ona rog bhitre pasnao akan khan,

⁴⁰ uni doe hukuma jemon onḍenakʼ dhiriko oḍokte nagraha bahre jãhãn besapha ṭhạ̃ireko giḍikakʼ.

⁴¹ Ar oṛakʼ bhitri reakʼ sanam bhitko huritʼ saphakate ona reakʼ lopotʼ do nagraha bahre jãhãn besapha ṭhạ̃ireko giḍikakʼa.

⁴² Inạ tayom ocokʼen dhiriko reakʼ ṭhạ̃ire nãwã dhiri bạisạukate nãwã hasate potaokakʼ hoyokʼa.

⁴³ “Ar dhiriko huritʼ ocokʼkate ar hasate potaokatere hõ bhitre rog ńelokʼ,

⁴⁴ enḍekhan naeke do arhõ senkate onae ńela. Ar rog do oṛakʼre pasnao akan khan bujhạu hoyokʼa murhucʼjom rog kana mente ar oṛakʼ do besaphagea.

⁴⁵ Unre oṛakʼ reakʼ dhiriko, potao akatʼ hasako ar kaṭko jotoge rạputʼ gidikakʼ hoyokʼa ar nagraha bahre jãhãn besapha ṭhạ̃ire idikate giḍikakʼ hoyokʼa.

⁴⁶ “Jãhãege oneko siń akatʼ dinre oṛakʼteye bolokʼ enḍekhan uni do enhilokʼ ạyupʼ hạbicʼ besapha akane tahena.

⁴⁷ Ar jãhãege ona oṛakʼreye jom seye gitijokʼ uni do acʼakʼ kicricʼ saphaetae hoyokʼtaea.

⁴⁸ “Ona oṛakʼ potao tayom naeke do arhõe biḍạu doṛhaea ar rog baṅ pasnao akan khan ona oṛakʼ do saphagea menteye lại sodora, ente oṛakʼre rog do bạnukʼa.

⁴⁹ Oṛakʼ saphae lạgitʼ naeke do barea cẽṛẽ, debdạru kaṭ, jeṅgetʼ arakʼ sutạm ar husopʼ dare reakʼ ḍạre hataoa.

⁵⁰ Ar ona tayom do hasa bhajanre dohoakatʼ jharna dakʼ cetanre mitʼṭen cẽṛẽye dãṛẽyea;

⁵¹ ar ona debdạru kaṭ, husopʼ dare reakʼ ḍạr, jeṅgetʼ arakʼ sutạm ar jiwetʼicʼ cẽṛẽ do uni gocʼkedeyicʼ cẽṛẽyakʼ mãyãmreye topoyea ar oṛakʼ cetanre eae dhaoe irciyakʼa.

⁵² Ar cẽṛẽyakʼ mãyãm, ạtukʼ reakʼ dakʼ, jiwetʼicʼ cẽṛẽ, debdạru kaṭ, husopʼ dare reakʼ ḍạr ar jeṅgetʼ arakʼ sutạmte ona oṛakʼe saphaea.

⁵³ Ona tayom uni jiwetʼicʼ cẽṛẽ do nagraha bahrereye aṛakʼgotʼkaea. Ar nonkate ona oṛakʼ do saphakʼa.”

^54-56 Noa do murhucʼjom rog, babatʼ rog, kicricʼre se oṛakʼko reakʼ murhucʼjom rog, laṭa loṭoko, bhumriko ar ṭaklakʼ ṭiklạkʼko rog reaṅ niạm kana.

⁵⁷ Noako khon manwa se jãhãnakʼ jinisge tinre saphawakʼ ar tinre besaphawakʼ hoyokʼa ona do noa reakʼ niạmrege udukʼakana. Ar noa kangea murhucʼjom rog reakʼ niạm do.