Levitikus 12 - সান্তালী বাইবেল

Gidrạ janam tayom chut meṭaokʼ reakʼ niạmko

¹ Ona tayom Probhu Isor do Moseye metadea,

² “Am do Israelkom metakoa, jãhãe maejiue bhạrti hoṛmolen khan ar uniren koṛa gidrại hoylen khan uni do acʼakʼ candoteakʼ lekage besapha akane tahena. Uni do eae din hạbicʼ besaphageye tahena.

³ Ar gidrạ do irạl din hilokʼreye khatna ocoyea.

⁴ Ar ona tayom uni maejiu do acʼakʼ mãyãm oḍokokʼ khon saphakʼ lạgitʼ pegel pe din hạbicʼ koyokʼ hor akae tahen hoyokʼtaea. Ar saphakʼ reakʼ din ạuri purạukʼ hạbicʼ uni do jãhãn sonotakʼ jinis bae joṭetʼ daṛeakʼa se sonot ṭhạ̃ite bae sen daṛeakʼa.

⁵ Ar maejiuren do kuṛi gidrại hoylen khan hõ acʼakʼ candoteakʼ lekage besapha akane tahena, ar bar hapta hạbicʼ besaphageye tahena. Ar mãyãm oḍokokʼ khon saphakʼ lạgitʼ turuigel turui din hạbicʼ koyokʼ hor akae tahen hoyokʼtaea.

⁶ “Menkhan koṛa se kuṛi gidrạ janam tayom uniyakʼ chut meṭaokʼ reakʼ dinko purạulen khan uni do ńapamokʼ tạmbu reakʼ duạr samaṅre jeredokʼ samaṅokʼakʼ lạgitʼ naeke ṭhen mitʼ bochor umerren mitʼṭen bhiḍi hopon ar kại ńutumte samaṅokʼ lạgitʼ mitʼṭen potam se parwa hopon idi kin hoyokʼtaea.

⁷ Ar naeke do Probhu Isor samaṅre onkoe samaṅkoa ar onate uniyakʼ chut do meṭaokʼtaea, ar ona tayom uni do acʼakʼ mãyãm oḍokokʼ reakʼ chut khone saphakʼa. Noa do gidrại janame tayom maejiuakʼ niạm kana.

⁸ Samaṅokʼ lạgitʼ bhiḍi hopon bae juṛạu daṛeae khan uni do barea potam ar baṅkhan barea parwa hopon ạgukin hoyokʼtaea. Unkin modre mitʼṭen do jeredokʼ samaṅokʼakʼ lạgitʼ ar eṭagicʼ do kại ńutumteye samaṅea. Nonkate naeke do chute meṭaokataea ar uni doe sapha utạrokʼa.”