Levitikus 11 - সান্তালী বাইবেল

Sapha ar besapha jiwiyanko

^1-3 Probhu Isor do Mose ar Aron Israelko galmaraoakoe metatʼkinạ, “Ot cetanren sanam janwarko modre okoeko pạgur ar ona sãote khurạ paṛakʼgetako metakʼme bar hạṭińte paṛakʼgetako eken onkoakʼ jelgepe jom daṛeakʼa.

⁴ Adom janwar do ekenko pạgura, ar adom janwarko do eken paṛakʼ khurạgeako; onko do alope jomkoa. Ũṭ doko pạgurgea menkhan khurạ do baṅ hạṭińtakoa; onate onko hõ ape lạgitʼko besaphagea.

⁵ Saphon kulại hõko pạgurgea menkhan khurạ do baṅ hạṭińtakoa, onate onko hõko besaphagea.

⁶ Kulại doko pạgurre hõ khurạ do baṅ hạṭińtakoa, onate onko hõko besaphagea.

⁷ Sukri do bar hạṭińte khurạ menakʼtakogea, menkhan bako pạgura, onate onko hõ ape lạgitʼ doko besaphagea.

⁸ Onkoakʼ jel do alope joma ar onkoakʼ mạ̃ṛĩ hõ alope joṭeda. Noko doko besaphagea.

⁹ “Jalapuri ar gaḍa dakʼre okoe jiwiyanko menakʼko onko modre okoekoakʼ il ar cũyạkʼ menakʼ onko dope jom daṛeakogea.

¹⁰ Menkhan okoekoakʼ il ar cũyạkʼ bạnukʼtako onko do hirkhạwan jinis mente bujhạukope baṅ do sobotʼ sobotʼ ạcur baṛaeko baṅ do eṭakʼ jãhãn jiwiyankoge.

¹¹ Ente hirkhạwan jiwiyan kanako onate onko jom do baṅ ganokʼa ar onkoakʼ mạ̃ṛĩ hõ hirkhạwakʼ jinis mente bujhạupe.

¹² Dakʼre menakʼko menkhan il ar cũyạkʼ bạnukʼtako nonkan jiwiyanko do hirkhạwan mente bujhạukope.

¹³ “Adom cẽṛẽ hõ menakʼkoa okoe doko besaphage, ar onate onko hõ alope jomkoa. Onko doko hoyokʼkana, pajhaṛ, gidi, hende gidi,

^14-16 kũṛĩtʼ, joto lekan jalo, joto lekan kạhũ, ũṭ cẽṛẽ, dundu, gaṅga kũṛĩtʼ, joto lekan dakʼ kẽhẽ,

¹⁷ hende dundu, gạṛuṛ, kokor,

¹⁸ ponḍ kokor, dereń kokor, bon bayar,

¹⁹ kisni, joto lekan kõkʼ, ḍạblạ kuṭạpʼ ar bạduṛ.

²⁰ “Ar pon jaṅgateko calakʼ sanam uḍạukʼko hõ hirkhạwan jiwiyan kanako.

²¹ Tobe onko modre okoe do gunṭhi menakʼtako ar otreko don baṛae onko modren adomko dope jom daṛeakoa.

²² Onko doko hoyokʼkana buḍhi sosrocʼ, ḍheńca sosrocʼ ar joto lekan pohoko.

²³ Menkhan eṭakʼ pon jaṅga menakʼtako uḍạukʼ tejoko hõko besaphagea.

²⁴ “Noko iạte ape dope besaphakʼa. Ar okoe onkoakʼ mạ̃ṛĩye joṭed uni do ạyupʼ hạbicʼ besapha akane tahena.

²⁵ Ar jãhãege onkoren mitʼṭecʼ reakʼ mạ̃ṛĩye joṭed enḍekhan uni do acʼakʼ kicricʼe saphaetaea ar ạyupʼ hạbicʼ besapha akane tahena.

²⁶ “Okoeko janwarakʼ khurạ cirạgetakore hõ bar hạṭiń bạnukʼtako se okoeko janwar do bako pạgur onko hõ ape lạgitʼko besaphagea. Ar okoe noakoe joṭed uni do besapha akane tahena.

²⁷ Pon jaṅgate taṛam jiwiyanko modre okoe do talkateko taṛam onko hõko besaphagea. Ar okoe onkoakʼ mạ̃ṛĩye joṭed uni do ạyupʼ hạbicʼ besapha akane tahena.

²⁸ Ar jãhãege onkoakʼ mạ̃ṛĩye idiy uni do acʼakʼ kicricʼe saphaetaea ar ạyupʼ hạbicʼ besapha akane tahena. Ape lạgitʼ noko jiwiyanko doko besaphagea.

²⁹ “Huḍiń jiwiyanko modren okoe do otreko ạcur baṛae onko modre biji, goḍo, cerceṭecʼ;

³⁰ ghirni, torhotʼ, kakṛa ar raekakaṛbakʼ noko do ape lạgitʼko besaphagea.

³¹ Kạṭicʼ jiwiyanko modre noko do ape lạgitʼko besaphagea. Nokoakʼ mạ̃ṛĩ okoeye joṭed uni hõ ạyupʼ hạbicʼ besapha akane tahena.

³² Noko modren mitʼṭecʼ hõ jãhãnakʼ jinis cetanreye gocʼkate ńur akan tahen enḍekhan ona hõ besaphawakʼ hoyokʼa. Baṅ do kaṭ reakʼ jãhãn bhajan, baṅ do kicricʼ, baṅ do harta, baṅ do bosta, jãhãn sapapʼakʼge, ar onate jãhãnakʼgeko kạmi ona joto do besaphawakʼ hoyokʼa. Ona jinis do dakʼre topo dohokakʼ hoyokʼa. Ar ạyupʼ hạbicʼ besaphage tahena, ar ona tayom do saphawakʼ hoyokʼa.

³³ Noako reakʼ jãhãṭakʼ mitʼṭecʼ hõ hasa reakʼ bhajanre ńurokʼ enḍekhan ona reakʼ jotowakʼge besaphawakʼ hoyokʼa. Ar onate ona do rạputʼ giḍikakʼ hoyokʼa.

³⁴ Ona bhajan reakʼ dakʼ jãhãnakʼ jomakʼ jinis cetanre ńurokʼ enḍekhan ona jomakʼ jinishõ besaphawakʼ hoyokʼa. Ar ona bhajanre jãhãn ńũńũakʼ tahen enḍekhan ona hõ besaphawakʼ hoyokʼa.

³⁵ Nokoakʼ mạ̃ṛĩ jãhãnakʼ cetanre ńurlen khan ona hõ besaphawakʼ hoyokʼa. Nonkanko culhạreko ńurlen khan ona do rạputʼ giḍikakʼ hoyokʼa. Ona culhạ do besaphawakʼ hoyokʼa.

³⁶ Ar onko modren jãhãege jharna se kuńreye ńurlen khan enḍekhan ona jharna se kuń do besaphawakʼ baṅ hoyokʼa; menkhan onkoakʼ mạ̃ṛĩ jãhãegeye joṭed unige besaphae hoyokʼa.

³⁷ Khetre er lạgitʼ doho akan jãhãn itạ cetanre nokoakʼ mạ̃ṛĩ ńurokʼ enḍekhan ona do besaphawakʼ baṅ hoyokʼa;

³⁸ menkhan itạ cetanre dakʼ emakʼ tayom onare onkoakʼ jãhãn mạ̃ṛĩ ńurlen khan ona itạ do besaphawakʼ hoyokʼa.

³⁹ “Apepe jomko nonkan jãhãn janware gocʼlen khan ar jãhãe uniyakʼ mạ̃ṛĩye joṭetʼ lekhan uni do ạyupʼ hạbicʼ besapha akane tahena.

⁴⁰ Ar jãhãe uni gocʼ akan janwarakʼ jele jom enḍekhan uni do acʼakʼ kicricʼe saphaetaea ar ạyupʼ hạbicʼ besapha akane tahena. Ar jãhãege uni gocʼ akanicʼakʼ mạ̃ṛĩ titeye sapʼ idiy enḍekhan uni do acʼakʼ kicricʼ saphaetae hoyokʼtaea ar ạyupʼ hạbicʼ besapha akane tahena.

⁴¹ “Huḍiń janwarko modre okoe do otreko ṭuṅdạṅ baṛae onko do hirkhạwan jiwiyanko mente bujhạukope. Onko do alope jomkoa.

⁴² Otreko ṭunḍạṅ baṛae jãhãn kạṭicʼ jiwiyanko hõ alope jomkoa. Onko sanamkoge hirkhạwan jinis kanako one okoe do lacʼteko taṛam se jaṅgateko taṛam onko sanamkogeko besaphagea.

⁴³ Onko iạte alope hirkhạ ocokʼa. Ar onko iạte alope besapha ocokʼa. Ar alope bhõnḍokʼa

⁴⁴ Iń do aperen Probhu Isor kạnạń. Onate ape do iń ńutumte begar akae tahenpe ar sonotko hoyokʼpe, ente iń doń sonotgea. Ot cetanre ạcur baṛae kạṭicʼ jãhãn janwarte hõ alope besapha ocokʼa,

⁴⁵ ente iń kangeạń Probhu Isor do; ar aperen Isor hoyokʼ lạgitʼ iạte iń do Misor disạm khoniń oḍok ạgu akatʼpea. Ar ińiń sonotgete apehõ sonotko hoyokʼpe.

⁴⁶ “Janwarko, cẽṛẽko ar dakʼren jiwiyanko ar ot cetanre ạcur baṛae joto lekan kạṭicʼ janwarko reaṅ noage ińakʼ niạm tahẽyena.

⁴⁷ Okaṭakʼ do saphawakʼ ar okaṭakʼ do besaphawakʼ, okoeṭakʼ janwarakʼ jelpe jom daṛeakʼa ar okoeṭakʼ janwarakʼ jel do bape jom daṛeakʼa ona do bujhạukatepe calakʼa.”