Levitikus 10 - সান্তালী বাইবেল

Nadab ar Ạbihuwakʼ gujukʼ

¹ Aronren hopon Nadab ar Ạbihu do ạkinakʼ seṅgel reakʼ ḍhạknicʼre seṅgel hataokate ona cetanre dhupkin curucʼada. Unkin do Probhu Isorakʼ hukum bahre eṭakʼ seṅgelte Probhu Isor ńutumte dhupkin samaṅkeda.

² Onate Probhu Isor ṭhen khon seṅgel oḍok hecʼente unkine atarketʼkinạ, ar unkin do Probhu Isor samaṅrekin gocʼena.

³ Unre Mose do Arone metadea, “Probhu Isore meneda, ‘okoe iń ṭhenko hijukʼ onko do sonot mente jemonko manaoiń. Ar sanam hoṛko samaṅre jemon iń ṭhonokokʼ.’ ” Ar Aron do hapegeye tahẽyena.

⁴ Tayomte Mose do Mesayel ar Elsaphone hohowatʼkinteye metatʼkinạ, “Nonḍe hijukʼben; ar sonot tạmbu oṛakʼ samaṅ khon abenren bhạcạmtạkinakʼ mạ̃ṛĩ do ḍera bahrete idiben.” Mesayel ar Elsaphon do Aronren kaka goṅgo boeha, metakʼme Usielren hoponkin tahẽkana.

⁵ Moseyakʼ hukum leka unkin do hecʼkate Nadab ar Ạbihuakʼ mạ̃ṛĩ ḍera bahretekin oḍok idikeda. Unre unkinakʼ mạ̃ṛĩre naeke kicricʼ do horokʼge tahẽkana.

⁶ Ona tayom Mose do Aron ar uniren banar hopon Eliasar ar Ithamare metatʼkinạ, “Duk iạte bohokʼ totolakʼ do aloben raṛaea ar kicricʼ hõ alo ben oṛeja. Arben onkae khan aben hõ ben gujukʼa ar goṭa Israel jạtrenko cetanre Probhu Isorakʼ edre do sodorokʼa. Menkhan Probhu Isor okoekin seṅgelteye gocʼketʼkin unkin lạgitʼ aperen peṛa pạrbhạko, metakʼme eṭakʼ Israelko doko rakʼ homor daṛeakʼa.

⁷ Menkhan abenakʼ hoṛmore do Probhu Isorakʼ ojokʼ bahalokʼ reakʼ sunum emakana, onate ńapamokʼ tạmbu bahre do alo ben oḍokokʼa, arben oḍoklen khan aben hõ ben gujukʼa.”

Naekeko lạgitʼ niạmko

⁸ Ona tayom Probhu Isor do Arone metadea,

⁹ “Am ar amren hoponkin ape do bubulakʼ ńũkate ńapamokʼ tạmbure alope bolokʼa, arpe bololen khan ape hõpe gujukʼa. Noa do piṛhike piṛhi mitʼṭecʼ jaejug reakʼ niạmge tahena.

¹⁰ Ar okaṭakʼ sonotakʼkan ar okaṭakʼ do begor sonotakʼkan ar okaṭakʼ do chutakʼkan ar okaṭakʼ do chutakʼ baṅkan ona bujhạukate calakʼ hoyokʼtapea.

¹¹ Ona chaḍa Probhu Isor do Mose hotete Israelko okako niạme emakatʼko ona hõ onkope cetʼakoa.”

¹² Ona tayom Mose do Aron ar uniren sarecʼ banar hopon Eliasar ar Ethamare metatʼkinạ, “Probhu Isor ńutumte seṅgelre samaṅokʼakʼ khon jomakʼ samaṅokʼakʼ reakʼ oka sarecʼ hĩsko tahen ona do pinḍ aṛere idikatepe joma, menkhan khạmi begor mesalte jojom hoyokʼa. Noa do sonot utạrakʼ jinis kana.

¹³ Onate sonot ṭhạ̃ire idikatepe joma. Probhu Isor ńutumte seṅgelre samaṅokʼakʼ noa hĩs do am ar amren hoponkoakʼ kana. Noa hukum do ińiń ńam akada.

¹⁴ Menkhan Probhu Isor ńutumte dolek akatʼ koṛam reakʼ jel ar bulu reakʼ phạṛi do am ar amren hopon ar hoponera jotogeko jom daṛeakʼa. Menkhan noa do mitʼṭecʼ sapha ṭhạ̃irepe joma. Israelkoakʼ sanam sulukren samaṅokʼakʼ noa hĩs do am ar amren hopon ar hoponerako lạgitʼ kana.

¹⁵ Seṅgelteakʼ samaṅokʼakʼ lạgitʼ tinre itilko ạgukʼa unre Probhu Isor samaṅre ona do dolek samaṅokʼakʼ lekate dolao lạgitʼ bulu phạṛi ar koṛam reakʼ jel ạgui hoyokʼa. Probhu Isorakʼ hukum leka noa bulu reakʼ phạṛi ar koṛam reakʼ jel do am ar amren hoponko ar hoponerakoakʼ bakhra kana.”

¹⁶ Kại ńutumte okoeṭakʼ merom bodae samaṅlen Mose do uniyakʼ jel reaṅ khojkateye baḍaekeda uni doe jeretʼ caba akana. Onate uni do Aronren sarecʼ banar hopon Eleasar ar Ithamar cetanre raṅgaoenteye metatʼkinạ,

¹⁷ “Kại ńutumte samaṅokʼ reakʼ jel do sonot ṭhạ̃ire cedakʼ baben jomleda? Noa do sonot utạrakʼ jiniskana. Probhu Isor samaṅre Israelkoakʼ kại khon puruchun lạgitʼge onko doko ematʼben tahẽkana.

¹⁸ Uni bodawakʼ mãyãm do sonot utạrakʼ ṭhạ̃ite baṅ idi ocolente ińakʼ hukum leka sonot ṭhạ̃ire ona jel do jom reakʼ lek tahẽkan tabena.”

¹⁹ Aron do Moseye metadea, “Teheń Probhu Isor samaṅre unkinakʼ kại ńutumte samaṅokʼakʼ ar jeredokʼ samaṅokʼakʼ reakʼ onusṭhanre noako ghoṭona paṛaoạdińa. Ar teheńakʼ dinre kại ńutumte samaṅokʼakʼ reakʼ ona jel jomle khan cetʼ Probhu Isore kusikokʼa?”

²⁰ Ar Mose do onae ańjomketʼ khane kusiyena.