Kạhtukko 9 - সান্তালী বাইবেল

Ạkil ar Albudạha

¹ Ạkil do acʼakʼ oṛakʼe benao akada; uni do dhiri reakʼ eae goṭecʼ khunṭiye bitʼakada.

² Uni do janwar gurkate jele isin akada ar darkha rasa sãote mosolae mesal akawada; uni do jomakʼte ṭebile sajao akada.

³ Uni do acʼren kạ̃ṛmĩko sanam jaegareye kol akatʼkoa, ar nagraha reakʼ joto khon cetan utạr ṭhạ̃i khon uni do hohoyetʼteye meneda,

⁴ “Lelha hoṛ do nonḍeko hijukʼma.” Okoeyakʼ buj bạnukʼtako onkoe metako kana,

⁵ “Dela hijukʼte, ińakʼ jomakʼ jompe, ińakʼ mosola mesal akatʼ darkha rasa ńũipe;

⁶ Lelhako sãote gatekʼ do bạgime, inạ khanem bańcaokʼa; am do budan reakʼ horte taṛamme.”

⁷ Landa dhutʼ hoṛ ṭhen okoe milimisiạ lạgitʼe calakʼ uni doe lajao ocokʼa; bạṛicʼ hoṛkoakʼ dos okoeye ńambaṛae bạṛicʼ hoṛ do unigeye dusiyea.

⁸ Landa dhutʼicʼ hoṛ do dosko alom udukʼaea, arem udukʼae khan ame hirkhạwama; bickom ạkilan hoṛ do uniyakʼ dosko udukʼaeme, uni do ame dulạṛmea.

⁹ Ạkilan hoṛ solha emaeme, inạkhan arhõ ạkilanicʼe hoyokʼa; Isor botorae hoṛ cetʼaeme, uni do arhõ cecetʼakʼe hameṭjoṅa.

¹⁰ Probhu Isor botorae do ạkil reakʼ etohopʼ kana; ar uni sonoticʼ baḍaeye do buj kana.

¹¹ Buj doe menede, “Iń hotete am do ḍher dinem bahaokʼa, ar bochor reakʼ dinkoge juṭucʼama.

¹² Ạkilanicʼem hoyokʼ khan amakʼ lab hoyokʼtama, menkhan landa dhutʼicʼem hoylen khan eskarge kosṭom ńama.”

¹³ Lilhi maejiu doe bachaogea uni do jãhãn tạkicʼakʼge bae bataoa, uni do ạkil bạnukʼtaea.

¹⁴ Uni do acʼakʼ oṛakʼ reakʼ duạr aṛere ar nagraha reakʼ cetan utạr ṭhạ̃ireye duṛupʼa.

¹⁵ Ar okoe ona horteko parom calakʼ uni do onko hohoakoteye metakoa,

¹⁶ “Lelha hoṛ do nonḍeko hijukʼma.” Ar ạkil bạnukʼtako hoṛ doe metakoa,

¹⁷ “Kombṛo akatʼ dakʼ do heṛemgea; ar oko reakʼ jomakʼ do sebelgea.”

¹⁸ Menkhan uni do bako baḍaea, gocʼ hoṛko onḍe menakʼkoa mente; ar uni maejiuren neota hoṛ do Sheol reakʼ khạndṛuńreko tahenkana.