Kạhtukko 8 - সান্তালী বাইবেল

Ạkil sarhaoe

¹ Ạkil do cetʼ bae hohoyeda? Buj do cetʼ ãṭ aṛaṅte katha bae roṛeda?

² Hoṛ aṛe reakʼ usul jaegare okare hor do dobạṭiạre milạu akan onḍege ạkil do teṅgo akane tahena.

³ Nagrahate calakʼ horre phaṭok-duạr ṭhen uni do ãṭ aṛaṅteye mena,

⁴ “E hoṛko, iń do apeń hohoape kana, ar sanam hoṛko ṭhen ãṭ aṛaṅteń meneda.

⁵ Lelha hoṛ do, budan hoyokʼ lạgitʼ ạkilko hameṭ joṅa; ar khaṭo bujan hoṛ hõ ạkilko hameṭ joṅa.

⁶ Ańjomme, iń do lek lekan kathań roṛa, ar khạṭi katha roṛ lạgitʼ ińakʼ mocań jhijtińạ.

⁷ Iń do sạri kathageń roṛa; ar bạṛicʼ katha doń hirkhạwakʼ kana, onate ona do bạń lạiya.

⁸ Ińakʼ moca reakʼ sanam kathako do ṭhikgea, onare peṛtawakʼ ar bạṛicʼ monsubạ do bạnukʼa.

⁹ Ar bujhạntar hoṛko ṭhen ińakʼ kathako do pusṭạugea; ar ạkil menakʼtako ṭhen hõ onako do khạṭigea.

¹⁰ Rupạ khon ińakʼ sikhnạtge ataṅ lạgitʼ ahkaokʼme, ar damanakʼ sona khon ạkil ńam lạgitʼge ahkaokʼme;

¹¹ ente morokotʼ dhiri khon hõ ạkil do damgea; amakʼ khoj leka jãhãn jinis sãote ona do oho jurilena.

¹² “Iń doń ạkilangea, ińre do buj menakʼa; bidiạ ar boge bạṛicʼ bujhạu reakʼ daṛe hõ ińre menakʼgea.

¹³ Probhu Isor botorae do bạṛicʼakʼ kurudakʼge; bạḍại, ṭenḍosokʼ, bạṛicʼ beohar ar peṛta katha iń doń kurudakʼ kana.

¹⁴ Solha ar sạri bidiạ do ińrege; buj do ińge, jor hõ ińge.

¹⁵ Rajko do iń hotete rajosṭiko calaoeda, ar mukhiyạko do hokte perecʼ ạnko benaoeda;

¹⁶ Iń hotete rapajko ar cetan hudạren hoṛ do mạlikiko calaoeda; onko joto do bicạrakʼko kạmikana.

¹⁷ Okoe ińko dulạṛedeńkan onko do iń hõń dulạṛkoa; okoe goṭa ontorteko ńam baṛayedeńkan onko do ińko ńameńa.

¹⁸ Dhon ar man do iń khonge hijukʼa, ar thambaoakʼ dhon ar bhạlại hõ.

¹⁹ Sona khon hõ, khạṭi sona khon hõ iń emakʼ jo do bhagegea; iń okań emokʼkan ona do bachao akatʼ rupạ khon hõ khạṭigea.

²⁰ Iń do dhorom reakʼ horteń taṛameda, ar dhorom bicạr reakʼ horreń dãṛãnkana.

²¹ Okoe ińko dulạṛiń onko do dhon duribko ńama; ińge onkoakʼ murạikoń perecʼkatakoa.

²² “Probhu Isor doe sirjạukedeńạ, acʼakʼ sirjạu reakʼ etohopʼre Ạd reakʼ kạmiko modre pạhilakʼge;

²³ Pạhil khonge, dhạrti ạuri sirjạure, jaejug khon iń doń dohoakana.

²⁴ Tinre jãhãn jalapuri baṅ tahẽkana, ar dakʼte perecʼ jharna baṅ tahẽkana, unre iń doń janamlena.

²⁵ Buru boṭkocʼko muṭhạnokʼ ạuri khongeń tahẽkana.

²⁶ Tinre dhạrti ar ṭạnḍiko se dhạrti reakʼ mitʼṭecʼ dhuṛi hõ baṅ benao akan tahẽkan, un khon iń doń tahẽkana.

²⁷ Uni do tinre sermae bạisạuetʼ tahẽkana unre iń do onḍeń tahẽkana; uni do tinre jalapuri reakʼ simạnakoe ṭhiketʼ tahẽkana, unre iń do onḍeń tahẽkana.

²⁸ Uni do tinre cetan secʼre rimile bạisạuetʼ tahẽkana ar ot latarre jharnakoe bạisạuetʼ tahẽkana,

²⁹ ar tinre jalapuri reakʼ simạkoe benaoetʼ tahẽkana jemon dakʼ do uniyakʼ niạm bahrete bae sen daṛeakʼ, ar tinre uni do dhạrti reakʼ rehetʼe ṭhiketʼ tahẽkana,

³⁰ unre ińge kạrigol lekate uni aṛereń tahẽkana. Dinke din iń do kusiteń perecʼente uni samaṅre jao ghạṛicʼ iń rạskạkʼkan tahẽkana;

³¹ Uniyakʼ dhạrti iạteń rạskạkʼkan tahẽkana, ar manwa iạte rạskạte perecʼ iń tahẽkana.

³² “E bạbu, ńitokʼ ińakʼ katha ańjomme; okoe ińakʼ horteko calakʼkan onko doko bhạgangea.

³³ Ińakʼ hukumko moneyakʼme, ar ạkilan hoyokʼme, ar alom posṛaya.

³⁴ Okoe hoṛ ińakʼ kathako ańjom ar dinạm hilokʼ ińakʼ duạr ṭhen ebhen akane tahen ar ińakʼ silpińko ṭhene tạṅgi hataṛ uni doe bhạgangea.

³⁵ Ente okoe ińe ńameńkan uni do jione ńama ar Probhu Isor ṭhen khon dayae ńama.

³⁶ Menkhan okoe iń bae ńameńkan uni do acʼgeye bạṛijokʼ kana; ar okoe ińko kurudạńkan onko sanamko do gujukʼko dulạṛa.”