Kạhtukko 7 - সান্তালী বাইবেল

¹ E bạbu, ińakʼ kathako ańjomme ar ińakʼ sanam hukumko amakʼ ontorre gathao dohokakʼme.

² Ińakʼ hukum dohoyme, ar jiwetʼ baṛe tahenme. Ińakʼ cecetʼakʼ do amakʼ mẽtʼãhã reakʼ moni leka pahra dohoyme.

³ Amakʼ kạṭupʼkore onako bedhao dohokakʼme, ar amakʼ ontorre ol dohokakʼme.

⁴ Ạkil metaeme, “Am do ińren misera kanam,” Ar bud do gate kanae mente bujhạuem;

⁵ ona do bạṛicʼ maejiuakʼ ti khone rukhiyạmea, ar luhum suhum katha roṛetʼkạnicʼ uni laṭghaṭicʼ maejiuakʼ ti khon hõ.

Bạṛicʼ maejiuakʼ neota

⁶ Iń do oṛakʼ reakʼ khiṛki duạr khon bhãora bhugạkʼ khoniń oyoṅkan tahẽkana.

⁷ Khaṭo bhudanko mod khoniń ńelkedea, juạnko modre mitʼṭen juạniń tạnkhikedea okoeyakʼ do khaṭo bud tahẽkantae.

⁸ Uni do maejiuakʼ oṛakʼ sorte kulhiteye parom calakʼkan tahẽkana, ona tayom uni do uniyakʼ oṛakʼteye boloyena;

⁹ Unre ạyupʼ jokhecʼ, ńuhum jokhecʼ ńindạ okte, kaṛaṅ kucạṅ ńutge tahẽkana.

¹⁰ Ona jokhecʼ mitʼṭen maejiu do uni sãote ńapamokʼ lạgitʼe oḍok hecʼena; uni do kusmbi kicricʼe horokʼ akada, ar ontor do phạsiạrate perecʼ tahẽkana.

¹¹ Uni doe bạṛicʼ maejiu kana, ar ãṭ aṛaṅte kathae roṛeda, uniyakʼ jaṅga do oṛakʼre baṅ tahẽ thirokʼkantaea;

¹² Oka do kulhire, oka do bajarre ar oka do dobạṭiạkoreye tãṛãkʼ baṛaekana.

¹³ Uni do uni koṛae cokʼadea ar besorom mocateye metadea,

¹⁴ “Ińakʼ oṛakʼre dãṛẽko reakʼ jel menakʼa, teheńge iń do dãṛẽń samaṅ akatʼa.

¹⁵ Ar onate am tulucʼ ńapamokʼ lạgitʼ iń oḍok hecʼakana; ar amiń ńapamketʼmea.

¹⁶ Misor disạm reakʼ roṅ beroṅ kicricʼte ińakʼ aṭetʼiń sajao akada;

¹⁷ Gondhoros, oguru ar darcinite aṭetʼiń mahkao ocoakatʼa.

¹⁸ Dela, setakʼ hạbicʼ dupulạṛ telaṅ moṅgonokʼ ma, Ar khạndri dulạṛte suk laṅ bhog joṅma.

¹⁹ Ińren jãwãe do oṛakʼre bạnuiya, uni do sạṅgińte dãṛãne calao akana;

²⁰ uni do thạilạkʼ perecʼ ṭakae idiakada, ar kunạmi laha do oṛakʼte bae ruạṛa.”

²¹ Ạḍi phuslạu kathateye bulạukedete uni do muhinteye idikedea, ar sebel sebel kathateye ạnḍicʼkedea,

²² Unre uni do maejiu tayomteye calaoena. Ḍaṅgra cetʼleka gure lạgitʼko tiyạkʼ idiye ar sikṛite tolkate pagla hoṛ cetʼleka sạjạiko ńam, onkage uni hoṛ do bae baḍaekana, noa iạte jiwi calakʼtaea mente.

²³ Cẽṛẽ cetʼleka usạrate jhampateye ńir bolokʼkan ar mucạtʼre uniyakʼ kunḍire sar ạuri bolokʼ hạbicʼ onkage uni hoṛ hõ bae baḍaekana, noate jiwi do calakʼtaea mente.

²⁴ E bạbu, ńitokʼ ińakʼ kathako ańjomtińme, ar okań metamkan ona luturakʼme.

²⁵ Amakʼ mon do uni maejiuakʼ horte alom sen ocowakʼa, ar uniyakʼ horre hõ alom dãṛãna;

²⁶ ente uni do aemageye sobokʼ gur akatʼkoa, hẽ ạḍi utạrgeako uniye sumạrakatʼko do.

²⁷ Uniyakʼ oṛakʼ do hoyokʼkana Sheolte calakʼ hor, one okaṭakʼ hor do moron reakʼ kandhateye pheḍ akan.