Kạhtukko 6 - সান্তালী বাইবেল

Lelhatetʼ reakʼ sontor katha

¹ E bạbu, jãhãeren jạmindarem hoyakan khan, ar eṭakʼko lạgitʼ jạmindar hoyokʼ lạgitʼ hõm bandhok akan khan,

² ar okam roṛakatʼ ona reakʼ jhạlirem paṛao akan khan, amakʼ moca reakʼ kathatem sapʼ ocoakan khan,

³ enḍekhan E bạbu, ma rukhiyạkʼme, ar chaḍaokʼ lạgitʼ uni ṭhen senkate apnar copodokʼme, ar nerha jerhakʼme,

⁴ amakʼ mẽtʼ do alom jạpitʼ ocowakʼa, ar mẽtʼ hõ alom hạrupʼ ocoytama.

⁵ Sikạriwakʼ ti khon jel hopon leka, laoṭa oḍaoicʼakʼ ti khon cẽṛẽ leka am do paskao oḍokokʼme.

⁶ E asketicʼ, mucʼko ṭhen calakʼme, ar onkoakʼ kạmiko ạṛi bạndhiyte ạkil cetʼjoṅme.

⁷ Onko hukumako reakʼ do celege bạnukʼkoa, onko cetanre jãhãn sordarko se mạlik hõ bạnukʼkoa;

⁸ enhõ uni do niron dinre jomakʼe doho jarwayeda ar phosol samṭao jokhecʼ hõ jomakʼe jogaṛeda.

⁹ E asketicʼ, ar tin hạbicʼem giticʼkokʼa? Tinre jạpitʼ khon dom beretʼa?

¹⁰ Am dom meneda, “Thoṛaganiń jạpitʼ kakʼrege, ar thoṛań giticʼ ńokʼlenge, ar ti kukucʼkate mitʼ ghạṛiń kunḍlạṅ hataṛlenge.”

¹¹ Menkhan mitʼ talao peṛako hecʼamre se ḍạkukoakʼ tirem paṛaolenre cetʼlekam reṅgejokʼ ṭhik onkage am hõm reṅgejokʼa.

¹² Okoe hoṛ doe kharapge, are bạṛicʼge uni do bạṛicʼakʼ kathako mocateye asen baṛaea;

¹³ Uni do mẽtʼ ripitʼkateye isạraya, ar jaṅgateye corhoda, ar kạṭupʼteye udukʼ baṛaea,

¹⁴ mon reakʼ phẽpṛa iạte sanam ghạṛicʼ bạṛicʼakʼ phundiye aṭaoa uni do reṭepeṭe reakʼ itạgeye er idiyeda.

¹⁵ Ona iạte ackage uni cetanre muhin do hijukʼa; ar ṭuṅ ghuṛirege uni doe marao utạrokʼa, ar bae beretʼ daṛeakʼa.

¹⁶ Probhu Isor do eae goṭecʼ jiniskoe kurudakʼkana onako do uni ṭhen hirkhạwakʼ kana;

¹⁷ bạḍạite perecʼ mẽtʼ, eṛe alaṅ, miridoskoakʼ mãyãme joro ocoyicʼ ti,

¹⁸ bạṛicʼ motlobe aṭaoyetʼkan mon, behokakʼ kạmi lạgitʼ ńir calakʼkan jaṅga,

¹⁹ eṛe roṛ ar eṛe goha emokʼicʼ, ar boehako talare gulmale ehopʼkan hoṛ.

Laṭghaṭ reakʼ cehaona

²⁰ E Bạbu, am babawakʼ hukumko dohoyme, ar am gogowakʼ sikhnạt hõ alom bạgiwakʼa.

²¹ Jaejug hạbicʼ amakʼ monre rebetʼ dohoyme, ona do amakʼ hoṭokʼre bedhaokakʼme.

²² Calakʼ jokhecʼ ona do hore udukʼama, ar jạpitʼ jokhecʼ ame horhomea arem ebhenlen khan am sãote kathae roṛa;

²³ ente noako hukum do diuhe leka, noa sikhnạt do marsal leka, ar ḍanṭao reakʼ nisṛạu do jion reakʼ horge.

²⁴ Noako do bạṛicʼ maejiuakʼ ti khon, ar ạ̃nạ̃ṛi maejiuakʼ cikạ̃ṛ cikạ̃ṛ katha khone rukhiyạmea.

²⁵ Uniyakʼ mońjtetʼ ńelte monre alom lalocokʼa, ar uniyakʼ mẽtʼ pipnire alom jhampa ocokʼa;

²⁶ ente kusmbi kuṛi do mitʼ kecakʼ piṭhạteye ạkhrińokʼa, ar laṭghaṭ maejiu do amakʼ jiwiye sendraetama.

²⁷ Seṅgel aṅgra halaṅkate okoe apnarakʼ gochareye dohoy enḍekhan uniyakʼ kicricʼ do cetʼ baṅ lokʼtaea?

²⁸ Ar jolokʼkan aṅgra cetante okoeye taṛam enḍekhan uniyakʼ jaṅga hõ cetʼ baṅ lokʼtaea?

²⁹ Okoe hoṛ eṭakʼ maejiu ṭhene bolokʼ uniyakʼ dosa do onkage hoyokʼtaea; ar uni do jãhãe maejiugeye joṭede enḍekhan sạjại doe ńamtegea.

³⁰ Reṅgecʼ jalate okoeṭakʼ hoṛe kombṛoyetʼ, uni do kombṛo iạte bako kurudaea.

³¹ Enhõ tinreye sapʼ ocokʼa unre hoedaṛeakʼa uni do eae dobṛa em ruạṛkakʼ hoyokʼtaea, pasecʼ acʼakʼ oṛakʼ reakʼ joto dhon hõ emokʼ hoyokʼtaea.

³² Okoeye laṭghaṭ uni do buj reakʼ okulạn menakʼtaea; uni do acʼtegeye maraokʼ kana.

³³ Uniyakʼ bhạgre do ghạl ar bemanot menakʼa; ar uniyakʼ durnam do tisge baṅ muchạukʼtaea;

³⁴ ente ontor reakʼ jaljalaokʼ do jãwãetetʼakʼ edreye rakaba; ar hala hạli lạgitʼ uni do jãhãn mãyãge bae uduga.

³⁵ Uni do jãhãn khuti purun bae ataṅa, ar ạḍi bạ̃ṛti danaere hõ bae tirpitokʼa.