Kạhtukko 5 - সান্তালী বাইবেল

Loṭghuṭi khon sontor tahen

¹ E bạbu, ạkil reakʼ oka kathań lạiyam kan ona baṛe mońjte ańjomtińme; ińakʼ buj reakʼ katha luturakʼme.

² Onate am do boge bạṛicʼ bujhạu reakʼ daṛem ńama, ar amakʼ moca khon ạkil do oḍokʼ hijukʼa.

³ Bạṛicʼ maejuakʼ luṭi khon do rasa jorokʼkana, ar uniyakʼ alaṅ do sunum khon hõ cikạ̃ṛgetaea;

⁴ menkhan sesre uni do hewer haṛhatʼgeye hoyokʼa, ar banar secʼ dharanakʼ tarwaṛe lekage.

⁵ Uniyakʼ jaṅga do moron secʼ pheḍ calakʼ kantaea, ona do sojhe Sheol secʼge calakʼ kana.

⁶ Jion secʼakʼ hor do bae moneyakʼa; uniyakʼ calakʼ hor do baṅ sojhetaea, ar do ona bae baḍaea.

⁷ E hoponińko, ńitokʼ do ińakʼ katha ańjompe, ar okaṭakʼ iń menetʼkan ona khon alope ocogokʼa.

⁸ Uni maeju khon amakʼ jaṅga do sahaṛ akae dohoytam,, ar uniyakʼ oṛakʼ reakʼ duạr sorte hõ alom calakʼa;

⁹ ar baṅkhan amakʼ ṭhonok do eṭakʼ hoṛem emakoa ar amakʼ bahaokʼ din do kurmutạhakoakʼge hoyokʼa.

¹⁰ Onate ạ̃nạ̃ṛi hoṛ do amakʼ dhonko joma, ar amakʼ khaṭaoakʼ reakʼ jo do eṭakʼkoakʼ oṛakʼte calakʼa.

¹¹ Jion reakʼ sesa sisire amakʼ hoṛmo ar jel do nosṭokʼtama unre am dom kuhrạua.

¹² Amem mena, “Hae! Iń do ḍanṭaoiń kurud akada, ar ińakʼ ontor do sudhrạukʼ reakʼ kathae nihạ̃t akada.

¹³ Ińren gurukoakʼ katha bạń ańjomleda, ar ińko cetʼạdiń tahẽkankoakʼ katha bạń luturatʼ tahẽkana.

¹⁴ Somajren hoṛkoakʼ tire paṛaokate iń doń gujukʼkan tahẽkana.”

Apnar erare rạskạ

¹⁵ Amakʼ kuń reakʼ dakʼ khonge am do ńũime; ar amakʼ ḍạḍi dakʼ reakʼ dakʼge ńũime.

¹⁶ Amakʼ ḍạḍi dakʼ do bahrete cedakʼ ạtu oḍokokʼa? Ar amakʼ jharna dakʼ do cedakʼ kulhikote ạtukʼa?

¹⁷ Amren hoponko do amrengeko tahenma, bạṛicʼ maejiuko do onare bhag alo tahentakoma,

¹⁸ ar amakʼ bhumbukre bhor tahenma, ar amren juạn jokhecʼren bạhu iạtege rạskạkʼme.

¹⁹ Uni do dulạṛte perecʼ, ar ńelokʼte napae jel leka; uniyakʼ sohag do jotowakʼteye purunmea. Am do jao ghuṛi unirem moṅgonokʼa.

²⁰ E bạbu, cedakʼ am do bạṛicʼ maejiurem moṅgonokʼ kana? Ar ạ̃nạ̃ṛi maejiu do cedakʼem hạṛubea?

²¹ Manwakoakʼ dãṛãn do Probhu Isorakʼ mẽtʼãhã samaṅre menakʼa; onkoakʼ sanam horko uni doe tạnkhiyeda.

²² Bedhorom hoṛ do bạṛicʼ kạmi reakʼ jhạlireko paṛaokʼa, uni do apnarakʼ kại babertegeye tol ḍhumbạgokʼa.

²³ Ḍanṭao bae senakʼte uni doe gujukʼa; Ar acʼakʼ maraṅ lelhatetʼ iạte uni doe sen adokʼa.