Kạhtukko 4 - সান্তালী বাইবেল

Ạkilankoakʼ hor

¹ E hoponko, aperen babawakʼ hukum luturakʼpe, ar ạkil ńam lạgitʼ moneyakʼpe.

² Iń do bhage sikhnạtiń emape kana, onate ińakʼ hukum bebataoko do alope hoyokʼa.

³ Iń hõ coṅ iń babaren hoponiń tahẽkan, ar gogowakʼ mẽtʼre do huḍiń ar sadher hopon lekage.

⁴ Unre iń baba doe cetʼạń tahẽkanteye menetʼ tahẽkana, “Amakʼ goṭa ontorte ińakʼ kathako sapʼ dohokakʼme; ar ińakʼ hukumko dohoyme, onate jiwetʼem tahena.

⁵ Ạkil hameṭ joṅme, ar bud hataome; ar ińakʼ katha do alomgem hiṛińa, ona khon alom ocogokʼa.

⁶ Ạkil do alom bạgi giḍiyakʼa, onage am doe horho jaṅgemea; ona dulạṛme, onageye rukhiyạmea.

⁷ Ạkilge asolakʼ do ạkil hatao joṅme; ar amakʼ menakʼakʼkote buj kiriń joṅme.

⁸ Ạkil dulạṛme, onage am doe usulmea; ona sapʼ dohoyeme, onage am doe manotmea.

⁹ Ona do amakʼ bohokʼ reakʼ mońj dạhṛi hoyokʼa ar kuṛại lekate mońj mukuṭe emama.”

¹⁰ E bạbu, ańjomme, ińakʼ katha ontorre dohokakʼme, inạkhan ḍher bochor jiwetʼem tahena.

¹¹ Iń do ạkil reakʼ horiń udukʼ akawatʼmea, ar sojhe horteń ạyuretʼmea.

¹² Onate amakʼ taṛam horre bam kucitokʼa, ar ńir senokʼre hõ bam tohodokʼa.

¹³ Solha sapʼ dohoyme, alom bạgiyakʼa; ona rukhiyạime, ente onage amakʼ jion kana.

¹⁴ Bạṛicʼkoakʼ horte alomgem calakʼa, ar bedhorom hoṛkoakʼ horte hõ alom taṛama.

¹⁵ Ona hor do sa parom gotʼkakʼme, onate hõ alom taṛama; ona horte sen baṅkate laha secʼ sen idikʼme;

¹⁶ Ente bạṛicʼ hoṛ do baṛicʼakʼ bako kạmile khan bako jạpitʼ daṛeakʼa; ar jãhãe bako tạkicʼ ocoleko khan mẽtʼ hõ baṅ jạpidokʼtakoa.

¹⁷ Phạsiạratetʼ do onkoakʼ jomakʼ ar santao do onkoakʼ ńũńũakʼ kana.

¹⁸ Isor botoraekan hoṛkoakʼ hor do aṅga hijukʼkan marsal leka, one ạuri tikinokʼ hạbicʼ tạpis khon arhõ tạpis idikʼkan.

¹⁹ Menkhan bedhoromkoakʼ hor do kaṛaṅ ńut; onko do bako baḍaea cetʼreko tohodokʼ kana mente.

²⁰ E bạbu, iń okań metamkan ona moneyakʼme, ar ińakʼ katha luturakʼtiń me.

²¹ Kathako do am khon alom danaṅ ocowakʼa, ona do amakʼ ontorre rebetʼ dohoyme.

²² Okoe nonkanakʼko kạmiyetʼ onko lạgitʼ do jion kana, ar ona doe logno ocoyetʼkoa.

²³ Jotowakʼ khon amakʼ ontorge pahra dohoyme, ente ontor khonge amakʼ jion reakʼ jotowakʼ do oḍokʼ hijukʼa.

²⁴ Amakʼ moca khon peṛta kathako sạṅgińkakʼme, ar luṭi khon bạṛicʼ kathako hõ pharakme.

²⁵ Amakʼ mẽtʼ do sojhete jemone beṅgetʼkakʼ, ar amakʼ ńeńel do samaṅ secʼ baṛe hoyokʼma.

²⁶ Amakʼ jaṅgakin reakʼ ḍahar moneyakʼme, inạ khan amakʼ sanam horko do kajakokʼtama.

²⁷ Jojom ti secʼ se leṅga ti secʼ alom ghańjeṛokʼa; ar bạṛicʼ khon amakʼ jaṅga sahaṛ akae dohoytam.