Kạhtukko 31 - সান্তালী বাইবেল

Raj lạgitʼ solha

¹ Lemuel rajakʼ roṛakʼ katha, metakʼme Isorakʼ emakʼ katha okaṭakʼ do acʼ eṅgattetʼ ṭhen khone cetʼletʼ.

² E bạbu, E ińakʼ kukhiren hopon, E ińakʼ manotakʼletʼren hopon, am do cetʼ iń metama?

³ Ạimạikore amakʼ daṛe do alom cabaetama; amakʼ dhon hõ alo onko do rapajkoko maraokoa.

⁴ E Lemuel, rapajko reakʼ lek do baṅ kana, darkha rasa ńũi do; ar bubulakʼ ńũi hõ disạm cakʼlaoko lạgitʼ lek anakʼ hõ baṅkana.

⁵ Bubulakʼ ńũite onko do ạn ạrikoko hiṛińa, ar santaokʼkanko secʼ behokakʼko bicạra.

⁶ Gujukʼ lạgidokʼko do bubulakʼ emakope. Ar darkha rasa do jiwire dukokʼkankoge;

⁷ Onko do ona ńũkate okulạn reakʼ kathako hiṛińma, ar onate duk ar kosṭo monre aloko disại ma.

⁸ E Lemuel, okoe acʼ reakʼ katha bae lại daṛeakʼkan am do uni secʼ katha roṛme; ar jarkhar akan ạidạri rukhiyại lạgitʼ am do noa katha roṛme.

⁹ Alom thir hapekokʼa, hok reakʼ bicạrme; nacar ar reṅgecʼko lạgitʼ ạidạri rukhiyạitakome.

Bujhạntar Bạhu

¹⁰ Bhage bạhu do okarem ńamkea? Uni do mạnik dhiriko khon hõ ạḍitetʼe damangea.

¹¹ Jãwãe do purạte unireye bhorsa akana; uniren jãwãe do okaṭakʼte hõ bae ṭonṭakʼa.

¹² Uni do sanam ghạṛicʼ acʼren jãwãetetʼe bhageyede kana, menkhan bạṛicʼakʼ do baṅa.

¹³ Uni do bhiḍi upʼ ar musnại ńam baṛayeda ar rạskạ salakʼ titeye kạmikana.

¹⁴ Uni do bạnij beparkoakʼ jahaj lekanae sạṅgiń khon acʼakʼ jomakʼ jiniskoe ạguiyetʼkana.

¹⁵ Ńindạ tahenrege uni doe beretʼkana; ar gharońjrenko lạgitʼ jomakʼe emokʼkana ar kạ̃ṛmĩ kuṛikotae do niṭakʼ kạmikoe hạṭińako kana.

¹⁶ Jumi kiriń lahare uni do onae ạribạndhiyetʼa ar ona tayom doe kirińeda; ar acʼakʼ ti reakʼ arojakʼte darkha bagwane benaoeda.

¹⁷ Uni do daṛe salakʼ ḍanḍa pathe keṭecʼkate kạmire tiye lagaoeda ar ạḍitetʼe khaṭaokʼ kana.

¹⁸ Ńel jutedae acʼakʼ khaṭaoakʼ reakʼ lab do bhagege hoyokʼkana; ar ńindạ uniyakʼ diuhe do baṅ ĩṛĩjokʼkantaea.

¹⁹ Uni do carkhare acʼakʼ ti kine lagaoetʼtaea ar acʼakʼ tite ḍherae ạcuretʼa.

²⁰ Nacarko lạgitʼ uniyakʼ cuputʼ do jhicʼgetaea; uni do reṅgecʼko secʼ acʼakʼ tiye tiyạretʼtaea.

²¹ Him ńurlenre hõ uniyakʼ gharońj lạgitʼ do jãhãn botor bạnukʼa, ente sanamkoge damanakʼ jeṅgetʼ arakʼ kicricʼteko oyokʼkana.

²² Uni do pichạuṛikoe tearjoṅ kana; acʼhõ musnạ ar beguni roṅakʼ kicricʼe bandeyeda.

²³ Uniren jãwãe do nagraha reakʼ duạrre manote ńameda; onḍe uni do murubbiko tulucʼe duṛupʼkana.

²⁴ Uni maejiu do musnạ kicricʼ benao kateye ạkhrińeda; ar ḍanḍa paṭheakʼ kicricʼ do bạnij beparikoe emako kana.

²⁵ Daṛe ar man do uniyakʼ horokʼ bandenakʼkana; ar darakan dinko reakʼ do bae bhabnakʼ kana.

²⁶ Uni do bud salakʼ kathae roṛa; ar dulạṛ salakʼe galmaraoa.

²⁷ Uni do gharońj reakʼ sanam secʼe ạribạndhiya; ar khaṭaokateye joma.

²⁸ Uniren gidrạko do sanamko samaṅre bhạganko metaea; ar uniren jãwãe hõ uni sarhaoeteye mena,

²⁹ “Ḍher maejiukoge bhage ghirni erako hoyakana, menkhan am do sanamko khonem sorosgea.”

³⁰ Mońj beohar do eṛegea, ar cõhõk hõ ạuṛiyakʼgea, menkhan okoe maejiu do Probhui botorae uni do sarhaoe ńama.

³¹ Uniyakʼ kạmi iạte sarhaoepe; ar uniyakʼ kạmiko do duạrareko sarhaotaema.