Kạhtukko 3 - সান্তালী বাইবেল

Juạn koṛako lạgitʼ solha

¹ E bạbu, ińakʼ sikhnạt do alom hiṛińa, amakʼ goṭa ontorre ińakʼ hukumko dohoyme;

² onate am do ḍher dinem bahaokʼa ar amakʼ do ḍher bhạlại hoyokʼtama.

³ Pạtiạr ar dhorom do tishõ aloe bạgiwam ma; amakʼ hoṭokʼre onako bedhao dohokakʼme, ar amakʼ ontorre hõ ol dohokakʼme.

⁴ Onam onkale khan Isor ar manwa samaṅre am do daya ar ńutum hoyokʼtama.

⁵ Amakʼ goṭa ontorte Probhu Isorre bhorsa akae tahenme; ar amakʼ bujre do alom bhorsakʼa.

⁶ Amakʼ calakʼ horre uni do samaṅre dohokaeme; unige amakʼ sanam horkoe sojheytama.

⁷ Apnar mẽtʼre budan do alom hoyokʼa; Probhu Isor botoraeme, ar bạṛicʼakʼ khon pharakre tahenme.

⁸ Inạ khan amakʼ hoṛmo lạgitʼ bhage hoyokʼa ar jaṅko hõ keṭejokʼtama.

⁹ Am do amakʼ dhon duribko reakʼ ar amakʼ phosolko reakʼ pạhilakʼ hĩsko Probhu Isor samaṅaeme ar manot emaeme;

¹⁰ Inạ khan amakʼ murạiko do phosolkote perejokʼtama ar hanḍhako khon nãwã darkha rasa hõ buhel oḍokokʼa.

¹¹ E bạbu, Probhu Isorakʼ ḍanṭao baṛe moneyakʼme, uniye egerlemre alom ạtruńokʼa;

¹² ente apat cetʼleka acʼren hopone egere onkage Probhu Isor hõ acʼ okoeye dulạṛe unigeye egerea.

¹³ Bhạgangeae uni hoṛ, okoe do ạkile ńam bakʼṛakan ar buje hameṭ joṅkan,

¹⁴ ente onare do rupạ reakʼ bạnij khon hõ bạ̃ṛti lab menakʼa, ar sona khon hõ ḍher lab hoyokʼa;

¹⁵ Mạnikko khon hõ ạkil do bạ̃ṛti damangea, amakʼ khojakʼ leka jãhãnakʼ jinis tulucʼ ona reakʼ juri do oho hoylena.

¹⁶ Uniyakʼ jojom tire do ḍher bahaokʼ din menakʼa ar leṅga tire do dhon ar manot menakʼtaea.

¹⁷ Ona horre do rạskạ menakʼa, ar ona reakʼ sanam horrege bhạlại menakʼa.

¹⁸ Okoe uniye sabe onko ṭhen do jion dare leka; ar okoe unireko sapʼ kajak akae tahen onko do bhorko ńama.

¹⁹ Probhu Isorakʼ ạkilte dhạrti do bạisạu akana, ar uniyakʼ bujte serma doe bandhao akada.

²⁰ Uni do ạkilte ot latar khon dakʼe oḍok ocoyeda, ar serma khon ṭhopʼ ṭhopʼ sisir dakʼe ńur ocoyeda.

²¹ E bạbu, bud ar ạkil dohojoṅme, ar onage moneyakʼme.

²² Ona do amakʼ jiwi lạgitʼ jion hoyokʼa, ar amakʼ hoṭokʼ lạgitʼ do mońj okocʼ malage.

²³ Unre am do amakʼ horkore khạtirjomam tahena, ar amakʼ jaṅga do bam tohodokʼtama.

²⁴ Gitijokʼre ar do bam botorokʼa, ar amakʼ jạpitʼ hõ suk reakʼ hoyokʼtama.

²⁵ Ar ackage muhin hecʼlenre alom botorokʼa, ar bạṛicʼ hoṛkoakʼ ḍahao maraokʼ ńelte hõ alom botorokʼa;

²⁶ Ente am do Probhu Isor cetanrem bhorsakʼ kana, ar uni do pạsi khon amakʼ jaṅgae rukhiyại tama.

²⁷ Okoe bhạlại ńam lạgitʼko lek kan onko bhạlạiko lạgitʼ tinre daṛe tahen tama unre ona onkae do alom baṅa.

²⁸ Goṛowako lạgitʼ daṛe tahentam khan okoe hõ alom metakoa, “Do calakʼme, ar tayomte hijukʼme, gapań emama.”

²⁹ Am aḍepaseren hoṛko upạrte jãhãn bạṛicʼakʼ alom cekaea, ente am pheḍren uni do khạtirjomae girobasokʼ kana.

³⁰ Jãhãe hoṛ amakʼ jãhãnakʼ bae lokshanetʼtam khan uni do ạuṛiyakʼte alom dusi ocoyea.

³¹ Jor julumicʼ jãhãeyem ńellere uni do alom hiskạwaea, se uniyakʼ jãhãn hor hõ alom bachaojoṅa;

³² ente Probhu Isor do konḍea horte calakʼ hoṛ doe kurudakoa, menkhan khạṭi ontorren hoṛko tulucʼ do helmele dohoyeda.

³³ Bạṛicʼ hoṛkoakʼ oṛakʼre Probhu Isorakʼ sarap tahena, menkhan Isor botoraekoakʼ oṛakʼ doe bhor atakoa.

³⁴ Ṭiṭkạrikan hoṛko doe ṭiṭkạriakoa, menkhan nindhạnko doe dayawakoa.

³⁵ Ạkilan hoṛ do manotko ńama, menkhan bebujko do lajaoreko paṛaokʼa.