Kạhtukko 29 - সান্তালী বাইবেল

¹ Jaoge nisṛạu reakʼ katha ańjomkate hõ okoe hoṛ hoṭokʼ keṭecʼgeye dohokatae uni do ackageye jarkharokʼa; ar bae teṅgo ṭarhao daṛeakʼa.

² Dhoromkoko saṅgelen khan hoṛkoko rạskạkʼa, menkhan bedhoromko cakʼlaokoko hoylen khan hoṛko doko kũhrạukʼa.

³ Okoe hoṛ ạkile dulạṛetʼ uni do apate rạskạ ocoyea, menkhan okoe do kusumbi sãoteye tahen uni do acʼakʼ dhone nosṭoea.

⁴ Hok reakʼ bicạr iạte raj do disạme ṭarhao daṛeakʼa, menkhan okoe ghuse kusiyakʼ uni do disạme jarkhara.

⁵ Okoe hoṛ aḍepaserenkoe lạhum sạhumko uni do acʼakʼ jaṅga lạgitʼ jhạligeye oḍaoeda.

⁶ Bedhorom hoṛ do acʼakʼ kại gunạkʼte jhampareye paṛaokʼa, menkhan Isor botorae hoṛ doe rạskạkʼa are sereńa.

⁷ Reṅgecʼ orecʼko jemon hok reakʼ bicạrko ńam onate dhorom hoṛ doko ạri bạndhiyeda, menkhan bedhoromko do noa reakʼ cetʼge bako bujhạua.

⁸ Ṭiṭkạrikan hoṛko do nagrahare gulmalko janam ocoya, menkhan ạkilan hoṛ do manwawakʼ edreko khentoya.

⁹ Budan hoṛ do khaṭo bujan hoṛ upạrteye mambla lekhan uni bebujicʼ doe landaya ar baṅkhane raṅgaokʼa, ar onate cetʼ miṭ maṭge baṅ hoyokʼa.

¹⁰ Khũniạhi hoṛ do bin dusạn hoṛko kurudaea ar soṛa monan hoṛ do goje lạgitʼko kurumuṭuiya.

¹¹ Khaṭo bujan hoṛ do acʼakʼ purạ edreye sodora, menkhan ạkilan hoṛ do apnare sambṛaokʼa.

¹² Mạliki calaoetʼ hoṛ eṛe kathae luturakʼ khan uniren sanam kạmiyạko hõko bạṛijokʼa.

¹³ Reṅgecʼ hoṛ ar haḍrapko talare begar do bạnukʼa Probhu Isor do bana hoṛge jione dan akatʼkinạ.

¹⁴ Okoe raj do sạriyakʼte nandankoe bicạrko uniyakʼ siṅghạson do ṭarhao tahentaea.

¹⁵ Pãeṛã ar nisṛạu do ạkile dana, menkhan okoeṭakʼ hopon do ḍanṭaore bạnui uni do eṅgattetʼe lajao ocoyea.

¹⁶ Bedhoromkoko saṅge len khan kại do ḍher idikʼa, menkhan dhorom hoṛ do onkoakʼ jarkharokʼko ńela.

¹⁷ Amren hopon ḍanṭaoeme, uni do sulukreye dohokama ar amakʼ jiwireye rạskạ ocomea.

¹⁸ Okare Isor do nạbiko hotete acʼakʼ sạriyakʼ bae sodor onḍenko hoṛ doko bhiṅgṛạukʼa; menkhan uni hoṛ doe bhạgangea okoe do Probhu Isorakʼ ạn ạrikoe manaoetʼ.

¹⁹ Eken katha motote guti do bae ḍanṭaokʼa; ente bujhạulere hõ uni do ona bae manaoa.

²⁰ Am do cetʼ nonkan hoṛkom ńel akatʼkoa okoe do katha lại lạgitʼe lahapʼ cahapʼ baṛaekan? Ona khon bickom bebuj hoṛrege bạ̃ṛti as do menakʼa.

²¹ Jãhãe hoṛ acʼren guti gidrạ bạ̃ṛtiye mãyãwae khan, mucạtʼre uni do uniyakʼ sanamakʼren mạlike hoyokʼa.

²² Edrekʼ hoṛ do jhogṛae salgaoa, ar etaṅ cạndi hoṛ do ạḍiye ghạṭa.

²³ Manwa do acʼakʼ bạḍạiteye copodokʼa, menkhan mạ̃hir monan hoṛ do manote ńama.

²⁴ Kombṛo tulucʼ bhag hataoicʼ hoṛ do acʼge acʼren bạiriye hoyokʼa; uni do kiriạ ocolere hõ cetʼge bae sodora.

²⁵ Manwa okoeye botorae ona botor do uniyakʼ jhampa leka hoyokʼa. Menkhan okoe Probhu Isorreye bhorsakʼkan uni do khạtirjomae tahena.

²⁶ Bicạrre disạm cakʼlaoicʼakʼ daya ńam lạgitʼ ḍherkogeko kurumuṭuiya. Menkhan Probhu Isor ṭhen manwa do hok reakʼ bicạrko ńama.

²⁷ Dhorom hoṛ do behoketʼ hoṛko hirkhạ mẽtʼteko ńelkoa, ar sojhe horte calakʼ hoṛ do bedhorom hoṛko hirkhạwaea.