Kạhtukko 28 - সান্তালী বাইবেল

¹ Bedhoromko do begor khudạukotegeko dạṛ joṅa, menkhan dhorom hoṛ do dhạcri kul leka dil akaeko tahena.

² Disạmren hoṛkoakʼ ghạṭ iạte onaren aema cạlạuakoko hoyokʼa, menkhan ạkilan ar budan cạlạuako hotetege disạm reakʼ kajaktetʼ do tahena.

³ Nandankoe jor bojorko kumãyã cạlạua hoṛ do baratʼ baratʼ dakʼ lekanae one onate phosol ḍahaokʼ.

⁴ Okoe Probhu Isorakʼ ạnko bạgi giḍiyakʼkan onko do bạṛicʼ hoṛko sarhaokoa, menkhan okoe onako manaoetʼkan onko do bạṛicʼko upạrteko teṅgona.

⁵ Bạṛicʼ hoṛko do hok bicạr reaṅ bako bujhạua, menkhan okoe Probhu Isorakʼ sana lekako calakʼkan onko do boge bạṛicʼ bujhạu reakʼ daṛeko ńama.

⁶ Kisạ̃ṛ hoṛ peṛta horteye calakʼ khon uni reṅgecʼ hoṛgeye bhagea one okoe do bin dusạnteye dãṛãnkan.

⁷ Ạn ạrikoe manaoetʼkan uni hopon doe budangea, menkhan okoe do dạrdạharen gatekane uni hopon do apate lajao ocoyea.

⁸ Okoe hoṛ jãhã lekan sudtege acʼakʼ dhone baḍhaotae, uni do nandanko dayawako lạgitʼge onae jarwayeda.

⁹ Probhu Isorakʼ ạn ạri reakʼ katha jãhãe ańjomkate hõ bae senakʼ, enḍekhan uniyakʼ koejoṅ hõ hirkhạwanakʼ hoyokʼtaea.

¹⁰ Soṛa monan hoṛ okoe bạṛicʼ horteye idiye uni do acʼakʼ khạ̃ṛiregeye ńurokʼa, menkhan miridosko do bhạlại hoyokʼtakoa.

¹¹ Kisạ̃ṛ hoṛ do acʼakʼ mẽtʼreye ạkilan hoṛ kana, menkhan bud menakʼtae reṅgecʼ hoṛ do uniye baḍae oromedea.

¹² Dhorom hoṛko ektiạriko ńamle khan sanam hoṛakʼ bhạlại hoyokʼa, menkhan bạṛicʼ hoṛkoakʼ tire ektiạri calaolen khan hoṛko bako ńamokʼa.

¹³ Okoe hoṛ acʼakʼ kạiye danaṅkakʼ uni do bae jo baha daṛeakʼa, menkhan okoe onae aṅgoc are bạgiyakʼ uni do dayae ńama.

¹⁴ Okoe hoṛ behok lạgitʼ jao okteye botorokʼkan uni doe bhạgangea, menkhan okoe acʼakʼ ontorre keṭejtae ar behok lạgitʼ bae botorokʼ kan uni do muhinreye paṛaokʼa.

¹⁵ Hạnḍrạukʼka dhạcri kul ar ghis ghisạu baṛaekan bana cetʼleka, onkage uni bạṛicʼ hoṛ do one okoe nandankoren cakʼlaoicʼe hoyokʼkan.

¹⁶ Okoe disạm cakʼlaoicʼakʼ bud bạnukʼtae uni doe santaoa; ar okoe cakʼlaoicʼ laloce hirkhạwakʼ uni do ḍher din jiwetʼe tahena.

¹⁷ Okoe hoṛ khũnkate bạṛicʼ cintạreye paṛao akan uni do ạuriye gujukʼ hạbicʼe ńir baṛaea; ar okoehõ aloko goṛowaema.

¹⁸ Okoe bin dusạnteye calakʼkan uni doe bańcaokʼa, menkhan okoe hoṛ peṛta horteye taṛamkan uni do ackageye ńurokʼa.

¹⁹ Okoe hoṛ acʼakʼ jumireye khaṭaokʼkan uni do bạ̃ṛti jomakʼ tahentaea, menkhan okoe do ạuṛiyakʼkoe khudạuetʼkan uni do bud reakʼ okulạn menakʼtaea.

²⁰ Pạtiạran hoṛ do ḍher bhore ńama, menkhan okoe kisạ̃ṛokʼ lạgitʼe ahkaokʼkan uni do sạjạiye ńama.

²¹ Bicạrre mẽtʼãhã beṅgetʼakʼ do baṅ bhagea; okoeye onkae uni do mitʼkuṭrạ piṭhạ lạgitʼ hõe onka daṛeakʼa.

²² Lalocan hoṛ do kisạ̃ṛokʼ lạgitʼe dhãoṛa dhạ̃uṛi baṛaea, menkhan uni do bae baḍaea okulạn do uniye tạṅgi akadeya mente.

²³ Okoe hoṛ nisṛạu reakʼ kathae roṛ uni khon samka sạṭi reakʼ kathae roroṛicʼge sesre bạ̃ṛti manote ńama.

²⁴ Jãhãege eṅgat apatakʼ jinis kombṛokateye men, “Noa do behokakʼ baṅ kana,” uni do jarkharren gate kanae.

²⁵ Laloc menakʼtae hoṛ doe jhogṛakʼa, menkhan okoe Probhu Isorreye bhorsakʼ uni doe jo bahakʼa,

²⁶ Khaṭo bujan hoṛ do acʼakʼ bujreye bhorsakʼkana, menkhan okoe Isor emakʼ ạkilteye calakʼ uni do khạtirjomae tahena.

²⁷ Okoe hoṛ reṅgecʼ orecʼkoe danako uni do okulạnre bae paṛaokʼa, menkhan okoe onko ńelte mẽtʼe bedtae uni do ḍher sarape ńama.

²⁸ Bạṛicʼ hoṛkoakʼ tire ektiạri calaolen khan hoṛ doko okokʼa, menkhan onko bạṛicʼ hoṛko maraolen khan dhorom hoṛko ḍherokʼa.