Kạhtukko 27 - সান্তালী বাইবেল

¹ Gapa din lạgitʼ do alom sarhaokʼa, ente oka hilokʼ cetʼ hoyokʼa ona do bam baḍaea.

² Eṭakʼ hoṛ baṛeko sarhaome ma, menkhan amakʼ luṭi do alo; hẽ, eṭakʼ hoṛegeko sarhaome ma.

³ Dhiri do hamalgea ar gitil hõ hamalgea, menkhan bebuj hoṛakʼ raṅgao do onakin banar khon hõ hamalgea.

⁴ Raṅgao do kurmutạhagea ar edre hõ ạḍi tạpisgea, menkhan mẽtʼ jolokʼ samaṅre do okoehõ bae teṅgo daṛeakʼa.

⁵ Jãhãe ame dulạṛme ar ona bae sodor, ona khon bickom jãhãe amakʼ dosko sodorteye udukʼam onage bhagea.

⁶ Bạirikoakʼ cokʼ do sastagea, menkhan gate hoteteakʼ ghạlko do bepạtiạrgea.

⁷ Okoeyakʼ lacʼ bigetae uni do dumur rasa hõ bae moneyakʼa, menkhan okoeyakʼ reṅgecʼ menakʼtae uni ṭhen do haṛhatʼakʼ hõ heṛemgea.

⁸ Tukạ bạgikate uḍạu baṛaekan cẽṛẽ cetʼleka, onkage oṛakʼ bạgikate dãṛã baṛaekan hoṛ hõ.

⁹ Mahkaokʼ sunum ar dhup do monre rạskạ bujhạukʼa; onkage gateakʼ solha do gate ṭhen heṛemgea.

¹⁰ Apnarren se babaren gate do alom bạgi giḍiyea; Muhinre boehawakʼ oṛakʼte alom calakʼa; sạṅgińre tahen boeha khon do aḍepaseren boehageko bhagea.

¹¹ E bạbu, ạkilanicʼ hoyokʼme ar ińakʼ mon rạskạ ocoytińme; inạ khan okoeko landa dhutʼạńkan onkoń roṛ ruạṛ daṛeakoa.

¹² Bujhạntar hoṛ do muhinko ńelle khan asrayko hataoa, menkhan lelha hoṛ do muhin ńelkatehõ calakʼtegeko tahena ar ona iạte kosṭoko ńama.

¹³ Okoe ạ̃nạ̃ri hoṛren jạmine teṅgokʼ uni do uniyakʼ kicricʼe hataotaema; ar bidisiạ hoṛ ńutumte jạmine teṅgokʼicʼ do unige bandhoke dohoyema.

¹⁴ Okoe hoṛ ạḍi setakʼre beretʼkate ãṭ aṛaṅte acʼren gate peṛakoe bhorako ona do sarap mentege lekhakʼtaea.

¹⁵ Cumḍiń ạimại ar tatle tal jorokʼkan sate dakʼ unkin banarge kin somangea.

¹⁶ Hoe cetʼleka baṅ okokʼ ar jojomtite muṭ akatʼ mahkao sunum reakʼ so cetʼleka baṅ okokʼ, onkage jhogṛakʼkan maejiu hõ bae oko daṛeakʼa.

¹⁷ Mẽṛhẽtʼ do cetʼleka mẽṛhẽtʼe laseretʼa, onkage mitʼṭen hoṛ do acʼren gateakʼ bude laseretʼtaea.

¹⁸ Loa dareye jotonetʼkan hoṛ do ona reakʼ jogeye joma; ar okoe acʼren kisạ̃ṛe sapʼsoraekan uni doe manot ocokʼa.

¹⁹ Dakʼ do cetʼleka mẽtʼãhãe ạrsi udukʼetʼ, onkage manwawakʼ mon do uniye ạrsi udukʼedea.

²⁰ Sheol ar Norok cetʼleka tishõ bakin tirpitokʼ, onkage manwawakʼ mẽtʼ hõ baṅ tirpitokʼa.

²¹ Rupạ biḍạu aṭkar lạgitʼ do galao reakʼ jinis menakʼa, ar sona lạgitʼ do culhạ, menkhan manwa do acʼakʼ sarhaoakʼreye biḍạu oromokʼa.

²² Bebuj hoṛ do anaj sãote ukhuṛre toktem huṛuṅ gunḍạlere hõ, enhõ uniyakʼ lelhatetʼ do bae aṛagea.

²³ Amren merom ar bhiḍi palrenkoakʼ dosa do amge mońjte baḍaekakʼme, ar amren palrenko secʼ hõ moneyakʼme;

²⁴ ente dhon do jaejug baṅ tahena, raj mukuṭ hõ piṛhike piṛhi do baṅ tahena.

²⁵ Khet khon tinre ghãs samṭaokʼa ar nãwã ghãs janamokʼa ar buru khon ghãs samṭao aderokʼa,

²⁶ unre bhiḍi hoponko do amakʼ kicricʼko jogaoa, ar merom do nãwã jumi reakʼ damko emama;

²⁷ Ona chaḍa am ar amakʼ gharońj lạgitʼ do aema toam ńama; ar amren juạn kạ̃ṛmĩko hõ ona ńũteko moṭakʼa.