Kạhtukko 26 - সান্তালী বাইবেল

¹ Niron dinre him ar irokʼ dinre jạputʼ cetʼleka baṅ ṭhik, onkage bebuj hoṛ lạgitʼ manot do lek baṅkana.

² Ghaṛwa se bhạluạ cẽṛẽ cetʼleka hante nateko uḍạu baṛae, onkage ạuṛiyakʼ reakʼ sarap do baṅ pheḍ hijukʼa.

³ Sadom lạgitʼ cetʼleka cạbuk, ar gadha lạgitʼ do jhin, onkage pãeṛã do bebujkoakʼ dea lạgitʼkana.

⁴ Bebuj hoṛ do acʼakʼ lelhatetʼ leka alom roṛ ruạṛaea, arem roṛ ruạṛae khan am hõ uni lekam hoyokʼa.

⁵ Bebujicʼ do acʼakʼ bebuj leka baṛe roṛ ruạṛaeme, ar baṅ khan uni do acʼ nońjorre budane hudisokʼa.

⁶ Okoe hoṛ bebujicʼ hotete sombate kol uni do acʼakʼ jaṅgageye samagtaea ar harkhetgeye ńũjoṅa.

⁷ Leḍha hoṛakʼ liṛạṅ loṛoṅokʼkan jaṅga leka kana, bebujicʼakʼ mocare bhage katha do.

⁸ Okoe hoṛ ginḍwạrire acʼakʼ dhiriye sajao dohokakʼ uni do bebujicʼ manote emaekan hoṛ lekanae.

⁹ Bul bhuteṛ hoṛakʼ tire jạnum ḍạr lekana, bebuj hoṛakʼ mocare kạhtukko do.

¹⁰ Mitʼṭen tutuń hoṛ cetʼleka ạuṛige sare aṛakʼetʼte sanamkoe ghạletʼko, onkage uni hoṛ, okoe do bebujicʼ se horten hoṛko kạmireye lagaoko.

¹¹ Seta cetʼleka acʼakʼ becʼ secʼe ạcurokʼ, onkage bebuj hoṛ do arhõ lelhatetʼe kạmiya.

¹² Am do cetʼ nonkan hoṛkom ńel akatʼkoa okoe do apnarakʼ mẽtʼreye ạkilanicʼ kan? Ona khon boroṅ bebujicʼ reaṅge as menakʼa.

¹³ Asaṅpoḍa doe mena, “Horre dhạcri kul menaea; ar kulhire do jojom kule dãṛã baṛaekana.”

¹⁴ Kobjare cetʼleka kapaṭ ạcurokʼ onkage asaṅpoḍa do acʼakʼ aṭetʼe ạcurtaea.

¹⁵ Asaṅpoḍa do thạrire tiye topoytaea, menkhan moca hạbicʼ ti rakabtae hõe asketokʼa.

¹⁶ Okoe hudis cintạkateko roṛruạṛ onkan eae hoṛko khon asaṅpoḍa do apnarte budane hudisokʼa.

¹⁷ Horte calakʼ jokhecʼ okoe hoṛ hoṛakʼ jhogṛareye seledokʼ, uni do setawakʼ luture peṭeretʼkan hoṛ lekanae.

¹⁸ Okoe koṅka hoṛ jolokʼ ṭhuṭkutʼ ar sarkoe tuń baṛayetʼ one onate gujukʼ hoedaṛekokʼ,

¹⁹ onkage uni hoṛ do okoe acʼren gate eṛeyedeteye metae, “Iń do ekeniń landawam kana.”

²⁰ Sahan baṅ tiṅgi idiyakʼ khan seṅgel do ĩṛĩjokʼgea; ar katha baṅ gutu galaṅakʼ khan kạphạriạu do cabakʼgea.

²¹ Jolokʼkan aṅgrare arhõ koela emakʼ khan ar seṅgelre arhõ kaṭ emakʼ khan cetʼleka hoyokʼ, onkage jhogṛakʼ hoṛ do jhogṛae salgao ocoya.

²² Nindạuicʼakʼ katha do sebel jomakʼ leka; ona do manwa lacʼ bhitri hạbicʼ bolokʼ kana.

²³ Hasa bhajanre jiṛipʼ jiṛibokʼ lasraoakʼ leka kana, bạṛicʼ monre cĩkạ̃ṛ luṭi do.

²⁴ Kurudamkan hoṛ do acʼakʼ luṭite heṛem heṛeme roṛama, menkhan ontorre do phikire dohoyeda.

²⁵ Uniyakʼ katha sebelgere hõ alom pạtiạuakʼa, ente uniyakʼ ontorre do eae goṭecʼ hirkhạwakʼko menakʼa.

²⁶ Acʼakʼ kurud do calakteye dapallere hõ enhõ acʼakʼ bạṛicʼtetʼ do manḍerre sodorokʼa.

²⁷ Okoe hoṛ khạ̃ṛiye lae uni do onaregeye ńurokʼa; ar okoe hoṛ dhiriye guṛgạu gotʼkakʼ ona do acʼge guṛgạu hecʼaea.

²⁸ Eṛeyicʼ do alaṅte okoeye ghạl akatʼko onko doe kurudako kana, ar cĩkạ̃ṛ moca do bhaṅla bhaṭe ạgujoṅa.