Kạhtukko 25 - সান্তালী বাইবেল

Solomonakʼ arhõ sopolhako

¹ Noa do Solomone roṛakatʼ arhõ bhage sopolha kana. Jihudạren raj Hiskiạren hoṛko do jogaṛkate noakoko ol ucạṛletʼa.

² Isor do jãhãnakʼ kathae oko dohoy khan ona do uniyakʼ man kana: ar rapajko jãhãnakʼ reaṅge ḍunḍhạukateko sodorle khan ona do onko lạgitʼ man kana.

³ Serma cetʼleka usul ar ot cetʼleka khạndrige, onkage rapajkoakʼ mon hõ baṅ ḍunḍhạukʼa.

⁴ Rupạ khon mạilạ chaṭao ocogme, enḍekhan sonhar do onate mońj bhajankoe benao daṛeakʼa.

⁵ Bedhorom kạmiyicʼ do raj samaṅ khon ocogem, enḍekhan dhorom kạmi hotete uniyakʼ siṅghạson do ṭarhao tahena.

⁶ Rajakʼ mẽtʼãhã samaṅre apnar do alom sabasikʼa; ar maraṅ hoṛko talare apnarakʼ ṭhạ̃i do alom teṅgoya;

⁷ ente cetʼ leka laha khonem ńelakatʼ onkage cetan hudạren hoṛko samaṅre nicạṛokʼ khon am metamge bhagea, “Nonḍe rakapʼ hijukʼme.”

⁸ Hare phare kacahạrite do alom calakʼa, ente mucạtʼre am aḍepaseren hoṛ lajaoreye paṛao ocolem khan unre cetʼem cekaea?

⁹ Am aḍepaseren hoṛko upạrtem mambla lekhan enḍekhan eṭakʼicʼakʼ oko katha do alom sodora;

¹⁰ Arem onkae khan ańjomicʼ hoṛ do ame nisṛạumea, ar amakʼ bodnam do tishõ baṅ cabakʼtama.

¹¹ Tak nạpitre roṛakan katha do rupạ cetanre goṛhon akatʼ sona reakʼ ḍabhako lekana.

¹² Sona reakʼ pagra se bhage sona reakʼ abhran cetʼleka, onka kangea ạkilan hoṛkoakʼ nisṛạu katha do.

¹³ Pạtiạricʼ paṭhaona uniren mạlik ṭhen do irokʼ jokhecʼ reakʼ him leka kanae; ente okoe uniko kollede uni do uni kisạ̃ṛakʼ jiwiye raṛejtaea.

¹⁴ Okoe hoṛ dan reakʼ maraṅ maraṅ kathae roṛ menkhan acʼ do ona bae onkae, uni do nonkan kuṛhạ ar hoe leka kanae one onare jãhãn dakʼge bạnukʼ.

¹⁵ Sombhuri hotete disạm cakʼlaoicʼ doe rạmjạu ocokʼa; ar mạ̃hir alaṅ do jaṅ hõ jaṅe rạpuda.

¹⁶ Dumur rasam ńamle khan jạruṛam leka jomme, bạ̃ṛtim jomle khan dom uchlạu oḍoka.

¹⁷ Gatemakʼ oṛakʼte ghane ghạṛicʼ do alom calakʼa, ḍherem calaolen khan uni do bae kusiyama.

¹⁸ Okoe hoṛ acʼ aḍepaseren hoṛko upạrte eṛe gohae em uni do lạṛhại mutạk, tarwaṛe ar laser sar lekanae.

¹⁹ Muhinre bepạtiạran hoṛ cetanre bhorsakʼ do lewe lewe ḍaṭa ar leḍha jaṅga leka.

²⁰ Okoeyakʼ mon bạṛicʼge uni ṭhen okoeye sereń uni do rabaṅ dinre kicricʼe totʼgiḍikakʼ se ghaore sirkạye duletʼkan hoṛ lekanae.

²¹ Amren bạiri reṅgecʼlere jomakʼ emaeme, ar tetaṅlere ńũiyakʼ emaeme;

²² Entem onka lekhan uniyakʼ bohokʼre seṅgel aṅgram puńjiaea, ar Probhu Isorge kuṛạiye emama.

²³ Utạr secʼ reakʼ hoe cetʼleka dakʼe ạguiyetʼ, onkage cuglikan alaṅ do kurkunḍucʼ mẽtʼãhãe ńelocoya.

²⁴ Jhogṛayicʼ maejiu tulucʼ mitʼ oṛakʼre tahen khon chat reakʼ mitʼ konare eskar tahenge bhagea.

²⁵ Tetaṅede kan hoṛ lạgitʼ cetʼleka dakʼ jạruṛa, onka kangea sạṅgiń disạm khon hijukʼkan bhage sombat do.

²⁶ Boḍe akatʼ ḍạḍi ar kharapakʼ jharna leka kanae, uni dhorom hoṛ okoe do bedhoromicʼ samaṅreye lewekʼkan.

²⁷ Ḍher dumur rasa jom do baṅ bhagea; ar bạ̃ṛti man ńamhõ baṅ bhagea.

²⁸ Okoe hoṛ apnarte bae sambṛao daṛeakʼ uni do pạcri bhit rạputʼ akan nagraha leka kanae.