Kạhtukko 24 - সান্তালী বাইবেল

¹ Bạṛicʼ hoṛko cetanre alom hiskạkʼa, ar onko sãote tahen hõ alom hạ̃sakʼa.

² Ente onkoakʼ mon do jor julum reakʼe ponthaya ar onkoakʼ luṭi do behok reakʼ kathakoe roṛa

(20)

³ Ạkil reakʼ goṛote oṛakʼ do benaokʼ kana, ar bud iạtege ṭarhao tahenkana.

⁴ Ạkil reakʼ goṛote kandhako do daman ar mońj mońj jisinkote perejokʼ kana.

(21)

⁵ Ạkilan hoṛakʼ do maraṅ ektiạri menakʼa, ar budan hoṛ do apnarakʼ daṛeko baḍhaotakoa.

⁶ Lạṛhạiyem calakʼre buj sujtem calakʼa ar ḍher solhako iạtege jit do hoyokʼtama.

(22)

⁷ Ạkil do khaṭo budan hoṛko khon pharakre tahena; nagraha reakʼ phaṭok duạr ṭhen mocage bae jhija.

(23)

⁸ Okoe bạṛicʼakʼe goṭae uni do phundi aṭaoyicʼko metaea.

⁹ Khaṭo bujan hoṛakʼ soṛojontro do kại kana; ar landa dhutʼicʼ do hoṛkoko hirkhạwaea.

(24)

¹⁰ Gạr hilokʼrem lạbṛukʼena menkhan, enḍekhan am dom lebṛecʼgea.

(25)

¹¹ Okoe gujukʼ lạgitʼko idi ocokʼkan onko baṛe rukhiyạkom; ar khun ocokʼ lạgitʼ okoe kinḍạ manḍeko idi ocokʼkan onko hõ ruạṛ ạgukom.

¹² Amem menle khan, “Ale do cetʼge bale baḍaea,” Menkhan okoe mone tulạ aṭkaretʼ uni do cetʼ amakʼ katha bae baḍaea? Okoe amakʼ jiwiye rukhiyạyetʼ uni do cetʼ ona bae baḍaea? Uni do mimitʼ manwako akoakʼ kạmi leka kuṛại do cetʼ bae emakoa?

(26)

¹³ E bạbu, dumur rasa jomme, ente ona do bhagegea; ar chata khon rasa jomme, ona do amakʼ tạru lạgitʼ heṛemgea.

¹⁴ Noa hõ baḍaeme, ạkil do amakʼ ontor lạgitʼ dumur rasa leka kana; ạkilem hameṭ lekhan amakʼ tayom daram as do menakʼgetama, ona as do baṅ berthakʼtama.

(27)

¹⁵ E bedhorom hoṛ, dhorom hoṛakʼ oṛakʼ upạrte alom tãṛãkʼgokʼa, ar uniyakʼ tahen ṭhạ̃ire hat alom lagaoa;

¹⁶ ente dhorom hoṛ do eae dhaoe leńjetʼlenre hõ uni do arhõe beretʼ ruạṛa, menkhan bedhorom hoṛ do ghoṭna iạteko tohotʼ bhindạṛokʼa.

(28)

¹⁷ Amren bạiriye gurokʼre alom rạskạkʼa; are tohotʼ bhinḍạṛlenre hõ amakʼ mon do aloe hulạsokʼma.

¹⁸ Arem onkale khan enḍekhan Probhu Isor do ona ńelteye edrekʼa, ar bạiri cetan khon uniyakʼ raṅgaoe ocogtaea.

(29)

¹⁹ Bạṛicʼ kạmi hoṛko iạte alom dur durạukʼa, ar bedhoromko ńelte alom hiskạkʼa.

²⁰ Ente bạṛicʼ hoṛkoakʼ do cetʼ asge bạnukʼa, ar bedhoromkoakʼ diuhe do ĩṛĩjokʼtakoa.

(30)

²¹ E bạbu, Probhu Isor ar raj botorakinme, ar huhulkan hoṛko tulucʼ do alom mesalokʼa;

²² ente onko cetanre maraokʼ do acʼkage hijukʼa, Probhu Isor ar raj ṭhen khon cetʼlekan muhin hijukʼ ona do okoeye baḍaea?

Arhõ thoṛa sopolha

²³ Noako hõ ạkilan hoṛkoakʼ katha kana. Bicạrre hoṛakʼ mẽtʼãhã beṅgetʼakʼ do baṅ bhagea.

²⁴ Bạṛicʼ hoṛ okoeye metae, “Am dom dhorom hoṛ kana,” Jạt jạtrenko do uniko sarapaea. ar disạm disạmrenko do uniko hirkhạwaea.

²⁵ Menkhan dusiko do okoe dusi menteko dusiyetʼko onko cetanre do bạ̃ṛti bhor paṛaokʼa, ar onko doko kusikʼa.

²⁶ Okoe ṭhik kathakoe ạcur ruạṛ, uni do gate leka luṭitaye cokʼakʼ kana.

²⁷ Amakʼ khet baṛge ṭhik ṭhakme ar amakʼ bahre kạmi sạtme, ar ona tayom do amakʼ oṛakʼ duạr benaojoṅme.

²⁸ Jãhãnakʼ begor baḍaete am aḍepaserenko upạrte goha alom ema, ar eṛe alom roṛa.

²⁹ Noa katha alom mena, “Uni cetʼlekae ceka akawạdiń iń hoń onkawaea; ar cetʼlekae cekawakatʼ onkageń halawaea.”

³⁰ Iń do mitʼṭen asaṅpoḍa hoṛakʼ khet aṛeteń parom senlena, khaṭo bujan hoṛakʼ darkha bagwan secʼtege;

³¹ ńelkedạń sanam jaega do rạṅgạinite perecʼ akana, ar rạṅgạinite baṛge hõ esetʼakana, ar dhiri reakʼ pạcri hõ lạnduṛ akana.

³² Ar okań ńelketʼ onań ạribạndhikeda, ar ona ńelte noa cecetʼakʼiń ńamkeda,

³³ “‘Thoṛaganiń jạpitʼ hataṛ kakʼrege, arhõ thoṛaganiń giticʼ ńokʼlenge, ar ti kukucʼkate mitʼ ghạṛiń kunḍlạṅ hataṛlenge.’

³⁴ Menkhan mitʼ talao peṛako hecʼamre se ḍạkukoakʼ tire paṛaolenre cetʼleka okulạn hijukʼ, ṭhik onkage amakʼ okulạn hõ hijukʼa.