Kạhtukko 23 - সান্তালী বাইবেল

¹ Am do tinre disạm calaoicʼ tulucʼ jojomem duṛupʼa, unre am samaṅre cetʼko menakʼa ona mońjte ạri bạndhime.

² Arem hạbạitage khan enḍekhan sontorokʼme! Ar apnar sambṛaokʼte jomme.

³ Uniyakʼ damanakʼ jomakʼre alom lalocakʼa, ente ona jomakʼ tayomre disạm cakʼlaoicʼakʼ jãhãn monsubạ tahẽ botecʼkokʼa.

(7)

⁴ Dhon lab lạgitʼ do alom dhãoṛa dhạ̃uṛi baṛaea; ar noa lạgitʼ amakʼ budre hõ alom bhorsakʼa.

⁵ Dhon secʼ amakʼ mẽtʼ calaolen khange ona do cabakʼa, ente ona reakʼ phạ̃kṛạ̃kʼko do janamokʼa ar pajhaṛ leka coṭ secʼe uḍạukʼa.

(8)

⁶ Lalocan hoṛkoakʼ jomakʼ do alom joma; ar uniyakʼ soṛom soṛom jomakʼko hõ alom hạ̃sakʼa;

⁷ ente uni doe nonkan hoṛ kana okoe do sanam ghạṛicʼ acʼakʼ jomakʼ reakʼ dame hisạb baṛayetʼ. Uni doe metama, “Ne jomme ar ńũime,” Menkhan uniyakʼ mon do am tulucʼ bạnukʼtaea.

⁸ Ar amem lapetʼ akatʼakʼ dom ulạ giḍiya, ar amakʼ jut jut kathako do ạuṛiyagokʼa.

(9)

⁹ Khaṭo bujan hoṛko ṭhen alom galmaraoa; onko do amakʼ ạkil reakʼ kathako nihạ̃t giḍiytama.

(10)

¹⁰ Jug reakʼ simạ do alom ocoga se ṭũạr amarkoakʼ khet baṛge hõ alom dokhol joṅa,

¹¹ ente onkoren chakʼḍaoicʼ doe daṛeangea; unige am upạrte onkoakʼ mamblae calaoa.

(11)

¹² Am do cecetʼakʼ secʼ mone lagaome, ar ạkil reakʼ katha luturakʼme.

(12)

¹³ Gidrạ ḍanṭaoko do alom ikạkakʼa; ṭheṅgatem dal lere hõ uni do bae gujukʼa.

¹⁴ Pãeṛãte uni do sạjại emaeme inạ khan Sheol khon uniyakʼ jiwim bańcaotaea.

(13)

¹⁵ E bạbu, amakʼ ontor do ạkilte perecʼlentam khan enḍekhan ińakʼ mon hõ rạskạkʼtińạ.

¹⁶ Amakʼ luṭikin ṭhik kathae roṛ lekhan ińakʼ jiu hõ rạskạkʼtińạ.

(14)

¹⁷ Amakʼ mon do kại hoṛko aloe hiskạwakoma, bickom sanam ghạṛicʼ Probhu Isor botoraete khemaome.

¹⁸ Enḍekhan amakʼ tayom daram lạgitʼ as tahena, ar ona as do baṅ berthakʼtama.

(15)

¹⁹ E bạbu, katha ańjomme, ar ạkilan hoyokʼme, ar amakʼ mon do ṭhik horte sen ocoyme.

²⁰ Okoe darkha rasa bạ̃ṛtiye hoṅgor se okoeko hạbạitage ar bạ̃ṛti jelko jom, onko tulucʼ do alom soṅgekʼa;

²¹ ente bul bhuteṛ ar hạbạitako doko ḍiṅgrạkʼa, ar dudṛumkan hoṛ do jhador padorakʼteye oyokʼa.

(16)

²² Am babawakʼ katha ańjomme okoe do jonome emakawatʼme; ar am gogoe buḍhilenre alom neṅghaoea.

²³ Sạriyakʼ kirińme ar ona do alom ạkhrińa; Hẽ, ạkil, sikhạuna ar buj baṛe kiriń joṅme.

²⁴ Dhoromicʼren apat doe hulạsokʼa; ar ạkilanicʼren apat do acʼren hopon hoteteye rạskạkʼa.

²⁵ Amren go baba dokin rạskạkʼ ma; ar okoeye janam akatʼme uni doe hulạsokʼma.

(17)

²⁶ E bạbu, ińakʼ cecetʼakʼ baṛe moneyakʼme; jemon ińakʼ jion ńeltem rạskạkʼ.

²⁷ Ńelme, kusmbi kuṛi do khạndri ghaḍlakʼ lekanae, ar sendra baṛae maejiu do sakṛa kuńge.

²⁸ Onkan maejiu do ḍạku lekae tãṛãgokʼkana, ar manwa talare bepạtiạu hoṛkoe saṅgeyetʼkoa.

(18)

²⁹ Okoeye hae haeyokʼkana? Ar okoe doe jare jarekʼ kana? Okoe doe jhogṛakʼ kana? Ar okoe doe bok bokaokʼ kana? Okoe ạuṛiyakʼe ghạl ocokʼ kana? Ar okoeyakʼ mẽtʼ do arakʼgea?

³⁰ Okoe ḍher ghạṛicʼ bubulakʼko ńũi onkoakʼ do nonkage hoyokʼa; onko do mesal akatʼ bubulakʼ ńũi lạgitʼko calakʼa.

³¹ Bubulakʼ arakʼge ńelokʼkanre hõ alom beṅgetʼakʼa, ar bạṭire jiṛipʼ jiṛibokʼre hõ, ar hodoṛ mente nạnḍrire bolokʼre hõ.

³² Mucạtʼre ona do biń lekae sogakʼa, ar kạrinạṅgiń biń lekae gegera.

³³ Unre amakʼ mẽtʼ do aema lekanakʼkoe ńela ar mon do aje baje kathakoe hudisokʼa.

³⁴ Am do jalapurire giticʼ akan hoṛ lekam hoyokʼa, one badam khunṭi coṭreye giticʼ akan hoṛ lekage.

³⁵ Amem mena, “Onko do ińko ghạl akadińạ menkhan baṅ haso ledeńạ, onko do ińko dalkedińạ menkhan bạń bujhạuleda. Ar tinre baṅiń ebhenokʼ arhõ thoṛań ńũkea.