Kạhtukko 22 - সান্তালী বাইবেল

¹ Acel pacel dhon khon bhage ńutum hạrjoṅge bhagea; Sona ar Rupạ khon eṭakʼ hoṛakʼ dulạṛ ńamge bhagea.

² Kisạ̃ṛ ar reṅgecʼ hoṛko talare begar do bạnukʼa Probhu Isor do onko sanamkoren bebenaoicʼ kanae.

³ Budan hoṛko do muhinko ńel darama arko okokʼa, menkhan lelha hoṛ do muhin ńelkate hõ calakʼtegeko tahena ar ona iạte sạjạiko ńama.

⁴ Nindhạnokʼ ar Probhu Isor botorae reakʼ kuṛại do dhon man ar jione ạguiya.

⁵ Peṛta hoṛakʼ horre do jạnum ar jhampakoge tahena, menkhan okoe apnarte sontore tahen uni do onako khon sahaṛ akaeye tahena.

⁶ Gidrạ do ṭhik horte taṛam cetʼaeme, uniye haṛamlenre hõ ona hor khon do bae ghańjeṛokʼa.

⁷ Kisạ̃ṛ hoṛ do nacarko cetanre mạlikiye calaoeda, ar rin jom hoṛ do emokʼicʼren golame hoyokʼa.

⁸ Okoe hoṛ bạṛicʼakʼ reakʼ itại eretʼkan uni do muhin reakʼ phosole ira; ar uniyakʼ raṅgao reakʼ ṭheṅga do ạuṛiyagokʼtaea.

⁹ Danetʼkan hoṛ okoe do acʼakʼ jomakʼ reakʼ bhag khon reṅgecʼ orecʼkoe emako kan uni do bhore ńama.

¹⁰ Landa dhutʼicʼ do laga ńirime, inạkhan jhogṛa do oḍokʼ calakʼa; ar kạphạriạu ar lajao hõ cabakʼa.

¹¹ Okoe hoṛ khạṭi ontore dulạṛ ar daya reakʼ kathae roṛ uni do rajge gate peṛa lekae ńamea.

¹² Probhu Isor do ạkile rukhiyạya, menkhan bepạtiạukoakʼ katha doe ạuṛiyakʼ ocoytakoa.

¹³ Asaṅpoḍa doe mena, “Bahrere dhạcri kul menaea, kulhireń oḍoklen khange iń doe gojeńa.”

¹⁴ Eṭakʼ maejiu reakʼ moca do khạndri khạndṛuṅ kana; ar Probhu Isore raṅgaoae kan hoṛ do onaregeye ńurokʼa.

¹⁵ Gidrạ do sobhabtegeko bebujgea, menkhan ḍanṭao ṭheṅga do uni khon onae laga pharaka.

¹⁶ Dhon lab lạgitʼ okoe hoṛ reṅgecʼkoe santaoko se okoe hoṛ kisạ̃ṛkoe danako unkin banar hoṛge ṭonṭare kin paṛaokʼa.

Ạkilan hoṛkoakʼ sopolha

¹⁷ Ạkilankoakʼ kathare lutur oḍaotam, ar okaṭakʼko menetʼ ona ańjomme; ar iń okaṭakʼ sikhnạtiń emamkan ona moneyakʼme.

¹⁸ Ona cecetʼakʼ amakʼ ontorrem rebetʼ dohole khan do jutgea; ona do sanam ghạṛicʼ amakʼ luṭire tahenma.

¹⁹ Probhu Isorre jemonem bhorsa daṛeakʼ onate iń do teheń, jotowakʼiń baḍae ocoketʼmea.

²⁰ Solha ar ạkil reaṅ am lạgitʼ cetʼ pegel goṭecʼ solha reakʼ katha bạń ol akawatʼmea?

²¹ Iń do cetʼ sạri ar bhorsateakʼ kathako bạń cetʼ akawatʼmea, jemon onam em daṛeako one okoe do amko kol akatʼme?

(1)

²² Mitʼṭen hoṛ doe nandange iạte uniyakʼ jinisko alom hataotaea, ar bicạrre harkhetokʼ hoṛ do alom maraoea.

²³ Ente Probhu Isor do mamblareye onko sejokʼa, ar okoe onkoakʼ jiniskoko recʼ ạguakatʼ uni do onkoakʼ jiwiye hataotakoa.

(2)

²⁴ Ṭheṭa hoṛ sãote do alogem gatekʼa; ar okoe usạrateye raṅgao hodokʼ uni sãote hõ alom soṅgekʼa.

²⁵ Arem onka lekhan am do uni lekam ceda ar jhamparem paṛaokʼa.

(3)

²⁶ Ti dohokate jãhãeakʼ rin reakʼ jạmin do alom hoyokʼa;

²⁷ Ona bam hala ruạr daṛeakʼ khan amakʼ giticʼakʼ aṭetʼ hõ am ṭhen khon idikʼa.

(4)

²⁸ Amren hapṛamko do simạ reakʼ okaṭakʼ cinhạ dhiriko bandhao oṭo akatʼ, ona do alom ocoga.

(5)

²⁹ Am do cetʼ nonkan jãhãe hoṛem ńel akatʼkoa oko do gạkhuṛ titeye kạmikan? Uni do rajko lạgitʼe kạmiya, ar hoṛko tabere do baṅa.