Kạhtukko 21 - সান্তালী বাইবেল

¹ Probhu Isorakʼ tire rajakʼ mon do gaḍa dakʼ leka; Probhu Isor jãhã secʼge monae ontegeye mohnaḍayede kana.

² Manwa do sanam horge acʼ ṭhen do sojhegetaea, menkhan Probhu Isor do uniyakʼ ontorre tulạyetʼtaea.

³ Probhu Isor ṭhen do janwar dãṛẽ samaṅko khon dhorom ar hok reakʼ kạmige ḍher bạsutakʼ kana.

⁴ Bedhoromkoakʼ mẽtʼ do bạḍạite perecʼgea ar ontor do phulạugea; onkoakʼ diuhege kại kantakoa.

⁵ Khaṭaokʼkan hoṛ do hudis joṅakʼkote khạṭige borkote ńama. Menkhan okoe hoṛ do begor hudiste usạrate kạmiye ehob uni do khạṭige ṭonṭareye paṛaokʼa.

⁶ Eṛe alaṅte okoe dhonko hameṭetʼkan onko do moronko ńam baṛayeda; onko lạgitʼ ona dhon hameṭjoṅ do gujukʼ lahare thoṛagan suk reakʼ sãhetʼkana.

⁷ Bedhoromkoakʼ jor bojor do akotegeye khayotʼ idikoa, ente onko do hokakʼ kạmiko phesṛao giḍiyeda.

⁸ Ghạṭte perecʼ hoṛakʼ jion do khiṛjạṅ khoṛjoṅ, menkhan khạṭi hoṛ do dhoromteye kạmiya.

⁹ Jhogṛayicʼ maejiu tulucʼ mitʼ oṛakʼre tahen khon chat reakʼ mitʼ konare eskar tahenge bhagea.

¹⁰ Bạṛicʼ hoṛ do hạn reakʼe kurumuṭuiya; ar uni pheḍren hoṛ do uni khon jãhãn dayage bako ńama.

¹¹ Landa dhutʼicʼ sạjại lekhan lelhayicʼ do ạkile hameṭ joṅa; ạkilan hoṛ solha emae khan uni do bude hameṭjoṅa.

¹² Dhoromicʼ Isor do bedhoromicʼakʼ oṛakʼe ạri bạndhiyeda; ar onko bedhoromkoe marao giḍiyetʼkoa.

¹³ Okoe hoṛ reṅgecʼkoakʼ rakʼjoṅre luture tubetʼetʼtae, Uni do tinre acʼe rakʼ homora unre okoe hõ bako luturataea.

¹⁴ Oko okote emakʼ dan do raṅgaoe dapala, ar gochare emakʼ nońjor do kurkurạukʼ edrege.

¹⁵ Hokakʼ kạmi lekhan dhorom hoṛ doko rạskạkʼa, menkhan bạṛicʼ kạmiko doko torasokʼa.

¹⁶ Okoe hoṛ bud reakʼ hor bạgikate eṭakʼ secʼe ghańjeṛokʼ uni do gocʼko sãoteye tahena.

¹⁷ Okoe hoṛ kusi rạskại dulạṛetʼ uni doe reṅgejokʼa; okoe hoṛ darkha rasa ar mahkaokʼ sunumkoe dulạṛetʼ uni do tishõ bae kisạ̃ṛ daṛeakʼa.

¹⁸ Ar mucạtʼre dhorom hoṛ bodolte bedhoromko ar bhage hoṛ bodolte bepạtiạrko kosṭoko ńama.

¹⁹ Jhogṛakʼkan ar kheń kheńokʼkan maejiu sãote mitʼ oṛakʼre tahen khon hahaṅkarre calaokate girobasokʼge bhagea.

²⁰ Budankoakʼ oṛakʼre do damanakʼ dhon ar mahkaokʼ sunum tahena, menkhan bebuj hoṛ do onae ublạ ḍublạ cabaya.

²¹ Okoe hoṛ do ahkaokʼ salakʼ sạri ar pạtiạr horteye calakʼ uni do jionre, bhor ar mane ńama.

²² Ạkilan hoṛ do daṛeankoakʼ nagraha cetanteye teṅgokʼa ar okaṭakʼ gaṛre onkoko bhorsa akan onae marao giḍikatakoa.

²³ Okoe acʼakʼ moca ar alaṅe dobnao uni do muhin khon rukhiyại ńama.

²⁴ Bạḍại ar dhomokkan hoṛakʼ ńutum do, “Landa dhutʼicʼ;” uni do bạ̃ṛti gorbokʼ tulucʼe kạmiya.

²⁵ Asaṅpoḍa hoṛakʼ laloc do uniyakʼ gujukʼgeye ạguiya, ente uniyakʼ ti do kạmi hõ bae kạmiya.

²⁶ Nonkan hoṛ menakʼkoa okoe do sanam ghạṛicʼko laloc, menkhan dhorom hoṛ doe emokʼa ar bae cuputʼ ruạṛa.

²⁷ Bedhoromkoakʼ dãṛẽ Probhu Isor doe hirkhạwakʼkana, ar ona bạṛicʼ monsubạte ạgulen khan enḍekhan ona do artetʼge hirkhạwakʼ hoyokʼa.

²⁸ Eṛe goha do marao cabakʼa, menkhan okoe hoṛ mon lagao kateye ańjom uniyakʼ katha do jaejug tahena.

²⁹ Bedhorom hoṛkoakʼ mẽtʼãhãre jãhãn lajao do baṅ ńelokʼa, menkhan dhorom hoṛ do acʼakʼ jion horre taṛam lạgitʼe khạṭigea.

³⁰ Jãhãn ạkil, jãhãn bud ar jãhãn goṭawakʼge Probhu Isor upạrte ohoge teṅgo daṛelena.

³¹ Lạṛhại hilokʼ lạgitʼ sadom do sajao doho akadere hõ, jitạukʼ do Probhu Isorrege ṭehãḍokʼ kana.