Kạhtukko 20 - সান্তালী বাইবেল

¹ Okoe hoṛ darkha rasa ńũkateye bulokʼ uni doe landa dhudhutʼa, ar okoe bubulakʼe ńũi uni doe jhogṛakʼa; noako ńũkate okoeye bulokʼ uni do ạkilan hoṛ doe baṅkana.

² Rajakʼ raṅgao do dhạcri kulakʼ gondrao leka; uni okoeye raṅgao ocoye uni do acʼakʼ jiwi muskilreye paṛao ocoytaea.

³ Jhogṛa ar kạphạriạue bạgiyakʼ hoṛ do manote ńama; ar khaṭo bibekan hoṛ do jhogṛakʼ lạgitʼ sapṛaoe tahena.

⁴ Asketokʼ hoṛ do ṭhik oktere bae siyạkʼa, uni do irokʼ dinreye oḍokokʼa ar cetʼhõ baṅ juṭạuaea.

⁵ Manwa ontor reakʼ monsuba do hasa latarre menakʼ dakʼ leka, menkhan budan hoṛ do onae lo rakaba.

⁶ Ḍhertetʼ hoṛge apanar do pạtiạran hoṛ menteko udugokʼa, menkhan pạtiạrạnicʼ hoṛ do okoeye ńam daṛekea?

⁷ Isor botorae hoṛ do dhoromreye taṛameda; bhạgangeako uniren bõsko do!

⁸ Raj do tinre bicạr lạgitʼ siṅghạsonreye duṛupʼa unre uni do mẽtʼ reakʼ beṅgetʼte sanam bạṛicʼakʼkoe sạṅgińa.

⁹ Okoeye men daṛeakʼa, “Iń do ińakʼ ontoriń khạṭi akada, ar ińakʼ kại khoniń sapha akana?”

¹⁰ Baṅ ṭhikakʼ baṭkhara ar sosoṅakʼ noa banarge Probhu Isor doe hirkhạwakʼkana.

¹¹ Gidrạ do acʼakʼ kạmikotegeye oromokʼ kana, uniye kạmikanakʼ do napae ar ṭhikakʼ kana se baṅa.

¹² Ańjom lạgitʼ lutur ar ńeńel lạgitʼ mẽtʼ Probhu Isor do noa banargeye sirjạu akada.

¹³ Jạpitʼ alom dulạṛa, onate am dom reṅgejokʼa; mẽtʼ beṅgedtam, ado bikʼlekam joma.

¹⁴ Kirińicʼ doe mena, “Ạḍi maṅgna, ạḍi maṅgna.” Ona tayom uni doe kiriń idiya ar ona kiriń jinisteye gorbokʼa.

¹⁵ Sona menakʼa, ar damanakʼ dhiriko hõ aema menakʼa, menkhan okaṭakʼ moca do ạkil reakʼ kathae roṛ ona reakʼ dam do ḍhergea.

¹⁶ Ạnạ̃ṛiyicʼ ńutumteye jạmin akan hoṛakʼ kicricʼ hataotaeme, ar bidisiạ hoṛ ńutumteye jạmin akan khan unige bandhok lekate dohoyem.

¹⁷ Eṛete ńamakʼ piṭhạ do hoṛ ṭhen heṛemgea, menkhan tayomte mocatae do kakoṛte perejokʼa.

¹⁸ Solhakate goṭaeme; ar buj sujkate lạṛhại reakʼ lại saḍeme.

¹⁹ Nisṛạukan hoṛ do okoakʼ kathae sodora; onate bạ̃ṛti katha roroṛ hoṛ tulucʼ do alom gatekʼa.

²⁰ Jãhãege acʼ eṅgat se apate sarapae, uniyakʼ diuhe do kaṛaṅ kucạṅ ńutre ĩṛĩjokʼtaea.

²¹ Okaṭakʼ ạidạri hare phare ńam godokʼ onate mucạtʼre bhor do baṅ ńamokʼa.

²² Alom mena, “Noa behok reakʼ iń hala ruạṛa.” Probhu Isor lạgitʼ koyokʼ horme, uni do ona muhin khone rukhiyạmea.

²³ Probhu Isor do baṅ ṭhikakʼ baṭkharae hirkhạwakʼ kana; ar eṛe tulạ do baṅ bhagea.

²⁴ Birbanṭa hoṛakʼ calakʼ reakʼ hor do Probhu Isorgeye ṭhik khan, enḍekhan manwa do acʼakʼ hor cekateye bujhạu daṛeakʼa?

²⁵ Begor hudiste usạrate Probhu Isor lạgitʼ jãhãnakʼ manotakʼ do manwa lạgitʼ jhampa kangea.

²⁶ Tente cetʼleka phosol enokʼ, onkage ạkilan raj do acʼakʼ daṛete bạṛicʼkoe chirchạturkoa.

²⁷ Manwawakʼ jiu do Probhu Isorakʼ diuhe kana; ona do manwa ontor reakʼ jotowakʼe ḍunḍhạua.

²⁸ Pạtiạr ar dhoromte raj do khạtirjomae dohoyede kana; ar pạtiạr hotetege uniyakʼ siṅghạson do ṭarhaokʼtaea.

²⁹ Koṛakoakʼ daṛe do onkoakʼ ṭhonok kana, ar haṛamkoakʼ saj do akoakʼ pạnḍu upʼge.

³⁰ Dal ghao do bạṛicʼakʼe saphayeda, ar mon reakʼ dal do ontor reakʼ bhitri jaegakoe guricʼ saphayeda.