Kạhtukko 2 - সান্তালী বাইবেল

Ạkil reakʼ kuṛại

¹ E bạbu, ińakʼ katha baṛem ańjomletiń khan ar amakʼ ontorre ińakʼ sanam hukumkom bae dohokakʼ khan,

² ar ạkil secʼ monem bitʼ letam khan ar buj secʼ monem ạwil letam khan,

³ hẽ bud lạgitʼem hohole khan ar ãṭ aṛaṅte bujem hohoae khan,

⁴ ar rupạ ńam baṛae leka ạkilem ńam baṛae khan ar okowakʼ dhon lekam sendra baṛale khan,

⁵ enḍekhan Probhu Isor botorae do cetʼkana mente, onam bujhạu daṛeakʼa ar Isorakʼ ạkilem ńama;

⁶ ente Probhu Isorge ạkil doe emokʼ kana, uniyakʼ moca khonge bud ar ạkil do oḍokokʼ kana.

⁷ Uni do khạṭi ontorren hoṛko lạgitʼ bude jogao dohoyeda; ar dhoromte okoeko calakʼkan, onkoren ḍhale hoyokʼte

⁸ uni do dhorom reakʼ bicạre doho daṛeakʼ, ar uni botoraekankoakʼ hore rukhiyạ daṛeakʼ.

⁹ Ińakʼ katham ańjomle tiń khan, enḍekhan okaṭakʼ do lek reakʼ, okaṭakʼ do hok reakʼ, okaṭakʼ do dhorom reakʼ ar okaṭakʼ do bhạlại reakʼkan ona jotowakʼ reakʼ horkom bujhạu daṛeakʼa;

¹⁰ ente ạkil do amakʼ ontorre bolokʼa, ar bud do amakʼ jiwiye rạskạ ocoytama.

¹¹ Amakʼ boge bạṛicʼ bujhạu reakʼ daṛegeye rukhiyạmea, ar buj do ame pahramea.

¹² Ạkilge am do bạṛicʼ hoṛkoakʼ hor khone rukhiyạmea; hẽ onko khongeye rukhiyạmea okoe do eṛe kathako roṛ,

¹³ ar ńut horte calakʼ iạte sojhe horko bạgiyakʼkan,

¹⁴ okoe do bạṛicʼakʼ kạmireko rạskạkʼkan, okoe do phepṛa horreko rạskạkʼkan,

¹⁵ ar okoe do konḍeya ar bạṛicʼ horteko calakʼkan.

¹⁶ Ạkilge am do loṭghuṭi reakʼ ti khone rukhiyạmea, ar sebel sebel kathaye roṛetʼkan bạṛicʼ maejiuakʼ ti khon hõ.

¹⁷ Uni do juạn okterege jãwãetetʼe bạgi akadea ar Isorakʼ bondobose bebatao akada.

¹⁸ Am do uniyakʼ oṛakʼtem bololen khan gujukʼ secʼem lahakʼa, ar uni tulucʼem soṅgelen khan gujukʼko ṭhenem seṭerokʼa.

¹⁹ Okoe uni ṭhenko calakʼ onko do ar tisge bako ruạṛ hijukʼa, onko do bańcaokʼ reakʼ hor bako ńama.

²⁰ Ạkilge onako khone rukhiyạmea jemon bhage hoṛkoakʼ horte, Isor botoraekankoakʼ hortem taṛam daṛeakʼ.

²¹ Dhorom hoṛge disạmreko girobasokʼa, ar miridos hoṛ hõ onareko ṭikạu tahena;

²² menkhan disạm khon bạṛicʼko doko kaman ocokʼa ar bepạtiạrko doko or totʼ giḍi ocokʼa.