Kạhtukko 19 - সান্তালী বাইবেল

¹ Okoe khaṭo hudisan hoṛ peṛta kathae roṛ uni khon uni reṅgecʼ hoṛgeye bhagea one okoe do sạriyakʼreye dãṛãnkan.

² Ạkil baṅ tahen hõ baṅ bhagea; okoe hoṛ usạrate joto kạmiye menjoṅ uni doe bhulgea.

³ Manwa do apnarakʼ lelhatetʼge bạṛicʼ horteye idiyea, menkhan enhõ uniyakʼ ontor do Probhu Isor upạrte rakabokʼtaea.

⁴ Dhon do aema gateye ńamkoa, menkhan reṅgecʼ hoṛ do acʼren gateye adeya.

⁵ Eṛe goha emokʼicʼ do sạjại ńamte hõe ńama; ar okoe gohayicʼ do eṛeye roṛ uni do rehay bae ńama.

⁶ Cetan hudạren hoṛakʼ daya ńam lạgitʼ ḍherkoge uniko bạsutaea, ar dan emokʼicʼren do sanamkoge gateko hoyokʼtaea.

⁷ Reṅgecʼ hoṛ do acʼren peṛa pạrbhạ jotogeko kurudaea ar acʼren gateko hõ acʼ khon pharakreko tahena; ar uniyakʼ nerha jerhare onko do bako luturakʼa.

⁸ Okoe apnarre dulạṛokʼkan uni do bude hameṭeda; ar okoe bud salakʼe calakʼ uni do bhore ńama.

⁹ Eṛe gohayicʼ do sạjạiye ńamgea; ar okoe eṛe gohae em uni doe jarkharokʼa.

¹⁰ Khaṭo bujanko lạgitʼ hesecʼ sekrejokʼ lek baṅ kan khan golam lạgitʼ rajko cetanre mạlikokʼ do arhõ belekakʼ kana.

¹¹ Okoe hoṛakʼ bud menakʼtae ona bud do thoṛate ohoe raṅgao gotʼ ocolea; ar uniyakʼ man kangea ghạṭ ikạkạkʼ do.

¹² Rajakʼ raṅgao do gondraokʼkan dhạcri kul leka, menkhan uniyakʼ daya do ghãsre ńur akan sisir dakʼ leka.

¹³ Khaṭo bujan hopon do apattetʼe sorbonas edekana, ar jhogṛakʼkan era do ṭopʼ ṭopʼ ńurokʼkan sate dakʼ lekanae.

¹⁴ Oṛakʼ duạr ar dhon do apat ṭhen khon ńamokʼa, menkhan budan era do Probhu Isor ṭhen khongeye ńamokʼkana.

¹⁵ Asket do dudṛume janam ocoya; ar asaṅpoḍa hoṛ do reṅgecʼteye haronokʼa.

¹⁶ Okoe hoṛ Isorakʼ ạn ạrikoe manao uni do acʼakʼ jiwire rukhiyạitaea; menkhan okoe do acʼakʼ jion hor secʼ bae moneyakʼkan uni doe gujukʼa.

¹⁷ Reṅgecʼ orecʼkoe dayawako kan hoṛ do Probhu Isorgeye dayawae kana; Probhu Isorge uniyakʼ upkạr reakʼ dan doe emokʼkana.

¹⁸ Amren gidrạ ḍanṭaoem, ente onare do as menakʼa; uniyakʼ gujukʼ do alogem khoja.

¹⁹ Edre ḍhergetae hoṛ do ḍanḍom ocoaeme; entem rukhiyạ lekhan arhõ onkaetege hoyokʼtama.

²⁰ Solha moneyakʼme, ar ḍanṭao manaome; tayomte am do ạkilanicʼ em hoyokʼa.

²¹ Manwa monre ạḍi lekan phundi tahena, menkhan Probhu Isor okaṭakʼe ṭhik dohoakatʼ onage hoyokʼa.

²² Manwa do manwa ṭhen khon dulạṛe khojkana; phạsiạra hoṛ khon reṅgecʼ hoṛgeye bhagea.

²³ Probhu Isor botorae do jion secʼe idiya; okoeyakʼ ona jion menakʼ uni do tirpite tahena, jãhãn muhinge uni ṭhen do baṅ hecʼ daṛeakʼa.

²⁴ Asaṅpoḍa do thạrire tiye topoytaea; menkhan moca hạbicʼ ti rakabtae hõe asketokʼa.

²⁵ Landa dhutʼicʼem dal lekhan lelha hoṛ doe sontorokʼa; ar bujhạntar hoṛem nisṛạule khan uni do ạkile hameṭ joṅa.

²⁶ Okoeṭakʼ hopon do apate santaoe ar eṅgattetʼe laga ńiri, uni do onkin cetanre lajao ar henostae ạguiya.

²⁷ E bạbu, ińakʼ ḍanṭao bam moneyakʼ khan enḍekhan am do ạkil reakʼ cecetʼakʼ khon eṭakʼ secʼem ghańjeṛokʼa.

²⁸ Bạṛicʼ gohayicʼ do hok reakʼ bicạr iạteye landa dhutʼeda; ar bạṛicʼko do behokre unum akanko tahena.

²⁹ Landa dhutʼetʼko lạgitʼ do sạjại tear dohoakana, ar khaṭo bujankoakʼ dea lạgitʼ do cạbukge.