Kạhtukko 18 - সান্তালী বাইবেল

¹ Okoe hoṛ apnarte somaj khon begare tahenkan uni do acʼakʼ sana purạutae lạgitʼe kurumuṭuiya, ar mitʼke mitʼ sạri ạkil tulucʼe jhogṛakʼa.

² Khaṭo bujan hoṛ do boge bạṛicʼ bujhạure jãhãn rạskạge bako ńama, menkhan onko do apnarakʼ mot sodorge rạskạko bujhạua.

³ Bạṛicʼakʼ do hirkhại ạguiya ar bemanot do henostage.

⁴ Manwawakʼ moca reakʼ katha do hasa latar reakʼ dakʼ leka, menkhan ạkilan hoṛakʼ moca katha do jharna khon ạtu oḍokokʼkan dakʼge.

⁵ Bedhoromicʼakʼ mẽtʼãhã beṅgetʼakʼ do baṅ bhagea, onate dhoromicʼe behokʼ ocokʼa.

⁶ Khaṭo budanicʼakʼ katha iạte mambla hoyokʼa, ar acʼakʼ katha iạtege uni do dale joma.

⁷ Khaṭo budanicʼakʼ mocage uniyakʼ jarkhare ạguiya; ar acʼakʼ katha iạtege jhạlireye paṛaokʼa.

⁸ Nindạuicʼakʼ katha do sebel jomakʼ leka, ona do manwa ontor reakʼ khạndrire bolokʼa.

⁹ Okoe acʼakʼ kạmireye asketokʼ uni do jarkharicʼ ren boeha kanae.

¹⁰ Probhu Isor do kajak aotan gaṛ kanae; dhoromko onḍeko ńir sen khan rukhiyạko ńama.

¹¹ Kisạ̃ṛkoakʼ dhonge onkoakʼ nagraha reakʼ pạcri do; menkhan onko do akoakʼ dhonge rurukhiyạ reakʼ pạcriko hudiseda.

¹² Manwa ontor reakʼ bạḍại do jarkhare ạguiya,

¹³ Ańjom laharege okoe hoṛe roṛ ruạṛ uni lạgitʼ ona do lelhatetʼ ar lajao reaṅ kana.

¹⁴ Hoṛakʼ jiu do kạhil ruại sahao daṛeakʼa, menkhan talga tạwạkʼ jiu do okoeye gokʼ daṛeakʼa?

¹⁵ Okoeyakʼ monre buj menakʼ uni do ạkile hameṭ joṅa, ar ạkilankoakʼ lutur do ạkile ńam baṛaea.

¹⁶ Dan do manwa lạgitʼ hore phaelaoa, ona do kisạ̃ṛko ṭhene idi seṭerokʼ kana.

¹⁷ Mamblare okoe pạhilre acʼ reaṅ kathae roṛ uniyakʼ katha do unrege sạri kana mente bujhạukʼa, one tin hạbicʼ armitʼ hoṛ hecʼkate uniye jeraye.

¹⁸ Gulibãṭkate jhogṛa do mucạdokʼa ar daṛeanko talare hõ ona doe chinḍạua.

¹⁹ Boeha hoteteye opoman ocoakan boeha do kajak nagraha khon hõe keṭecʼgea; ar jhogṛa kạphạriạu do raj dolan reakʼ huṛkạṛ leka.

²⁰ Manwa do acʼakʼ katha hotete oka joe ńam onate uniyakʼ ontor do perejokʼtaea; ar acʼakʼ katha iạte okae ńam onategeye kusikʼa.

²¹ Moca reakʼ katharege jion ar moron do ṭehãḍokʼa; okoe lek lekan kathako roṛ onko do ona reakʼ joko ńama.

²² Okoe hoṛ bạhuye ńamekan uni do bhore ńama uni do Probhu Isor ṭhen khonge dayae ńama.

²³ Reṅgecʼ hoṛ do daya ńam lạgitʼe nerha jerhakʼa, menkhan kisạ̃ṛ hoṛ do saegatʼgeye roṛ ruạṛa.

²⁴ Okoeren aema gate menakʼko uniyakʼ jarkhar do ḍherge hoe botecʼjokʼtaea, menkhan nonkan gate menakʼkoa okoe do boeha khon hõ ḍhere pạtiạrge.