Kạhtukko 17 - সান্তালী বাইবেল

¹ Jhogṛa ar kạphạriạukʼte perecʼ bhoj oṛakʼ khon sulukte tahẽkate mitʼ kecakʼ piṭhạ hõ bhagegea.

² Ạkilteye kạmikan guti do hopon cetanre hukume calaoa, ar boehako talaren leka ạidạrireye bakhra joṅa.

³ Rupạ biḍạu aṭkar lạgitʼ do galao reakʼ jinis menakʼa ar sona biḍạu aṭkar lạgitʼ jinis do culhạ, menkhan manwa ontor do Probhu Isorgeye biḍạu aṭkara.

⁴ Bạṛicʼ hoṛ do dusṭạmi kathae ańjoma; ar eṛeyicʼ do kharap alaṅ reakʼe luturakʼa.

⁵ Okoe hoṛ reṅgecʼkoe nisṛạuko uni do onkoren sisirjạuicʼe henostawae kana; Okoe eṭakʼkoakʼ muhinreye rạskạkʼkan uni do sạjạiye ńamgea.

⁶ Goṛom gidrạko do haṛam hoṛkoren mukuṭ leka, ar baba do acʼren hoponkoren ṭhonok kanako.

⁷ Nicạṛ monan hoṛkoakʼ maraṅ maraṅ katha roṛ do baṅ sajaokʼa, arhõ cetan hudạren hoṛkoakʼ hõ eṛe roṛ do baṅ sajaokʼa.

⁸ Okoe hoṛ ghuse emokʼ uni ṭhen ona do guni reakʼ dhiri leka; uni jãhã secʼgeye beṅgetʼ ạcur ontege jo bahakʼkana.

⁹ Ghạṭ ikʼkạyicʼ do dulạṛe ńam baṛayeda, menkhan ona lại baṛayicʼ do gate reakʼ bhaṅgone janam ocoya.

¹⁰ Khaṭo bujan hoṛ mitʼsae dhaoko dale khon, bujhạntar hoṛ do mitʼ dhao eger hõ ona khon bạ̃ṛti bhijạuaea.

¹¹ Huletʼkạnicʼ do eken bạṛicʼakʼ secʼgeye capaokʼa; onate uni upạrte mitʼṭen kurmutạha paṭhaonae kol ocokʼa.

¹² Khaṭo bujan hoṛ okoe do lelhatetʼreye unum akan uni sãote ńapamokʼ khon hoponko recʼakade bana sãote ńapamokʼge bhagea.

¹³ Okoe hoṛ upkạr bodole behoketʼkan, behok do uniyakʼ oṛakʼ tishõ bae bạgiyakʼa.

¹⁴ Jhogṛa reakʼ ehopʼ do phoṛ oḍokokʼkan dakʼ leka, onate reṭepeṭe ehobokʼrege ona do ikạkakʼme.

¹⁵ Bạṛicʼicʼ dhorom metae hoṛ ar dhoromicʼ bạṛicʼ metae hoṛ, Probhu Isor do unkin banargeye hirkhawạkin kana.

¹⁶ Ạkil hameṭ lạgitʼ khaṭo bujan lelha hoṛakʼ tire ṭaka tahẽlen khan cetʼ lab? Ente uniyakʼ ma bujge bạnukʼtae.

¹⁷ Gate do jaogeye dulạṛa, ar boeha do muhinre goṛowam lạgitʼgeye janamokʼ kana.

¹⁸ Okoe hoṛakʼ buj reakʼ okulạn menakʼ uni do acʼ aḍepaseren hoṛ ṭhene jạminokʼa.

¹⁹ Okoe hoṛ bạṛicʼ monte tahene kusiyakʼkan uni do reṭepeṭeye dulạṛa; ar acʼte usulic hoṛ do jarkhare ạgujoṅa.

²⁰ Peṛta ontor hoṛakʼ do bhạlạige baṅ hoyokʼtaea; ar phạsiara alaṅ do muhinreye paṛao ocoyea.

²¹ Khaṭo bujan hopon do eṅgat apatʼ lạgitʼ duke ạguiya; ar bebuj hoponren apatakʼ do rạskạge bạnukʼtaea.

²² Rạskạkʼkan ontor do hoṛmo mońje dohoya, menkhan rạputʼ mon do hoṛmoe nosṭo ocoya.

²³ Bedhoromicʼ do gocha khon ghuse hataoeda hok reakʼ horko konḍeyae lạgitʼ.

²⁴ Buj menakʼtae hoṛ do ạkile moneyakʼ kana, menkhan khaṭo bujan hoṛakʼ mon do beṛhaeteye beṅgetʼ ạcura.

²⁵ Khaṭo bujan hoṛ do apattetʼe ạṛis cabayea, ar eṅgatakʼ mon doe haṛhatʼ ocoytaea.

²⁶ Dhorom hoṛ ḍanḍome do baṅ bhagea se coṭ hudạren hoṛakʼ sạriạkʼtetʼ iạte dale hõ baṅ ṭhika.

²⁷ Budan hoṛ do apnar sambṛaokʼte kathae roṛa; ar buj menakʼtae hoṛakʼ bohokʼ do reaṛgetaea.

²⁸ Thirge tahẽlen khan lelha hoṛ hõ ạkilanicʼ menteye hudisokʼa, ar moca sikupkateye dohole khan uni do bujhạntar hoṛ lekae hudisokʼa.