Kạhtukko 16 - সান্তালী বাইবেল

¹ Manwa do mon monteye ponthayeda, menkhan mocate ona sodorokʼ reakʼ ektiạri do Probhu Isor ṭhen khonge hijukʼ kana.

² Hoṛakʼ do acʼakʼ joto horge acʼ nońjorre saphagetaea, menkhan jiu tulạ bikʼḍạuicʼ do Probhu Isorge.

³ Amakʼ kạmiko do Probhu Isorge soprotaeme; onate amakʼ ponthako ṭarhaokʼtama.

⁴ Probhu Isor do jotowakʼe benao akada ona reakʼ nij jos lạgitʼ; Ar bedhoromicʼ hõ ghoṭna din lạgitʼ.

⁵ Bạḍại monan hoṛ do Probhu Isore hirkhạwako kana; khạṭige baḍaepe onko do sạjạiko ńama.

⁶ Pạtiạr ar sạriyakʼtetʼ hotete bedhorom do pharakokʼa; Probhu Isor botorae hoṛ do bạṛicʼ khone sahaṛokʼa.

⁷ Manwa jion ńelte tinre Probhu Isor doe kusikʼa unre uni do acʼren bạiriko hõ sulukteye girobas ocokoa.

⁸ Behokakʼte ḍher arjao khon hokte thoṛa arjaoakʼge bhagea.

⁹ Manwa do acʼakʼ hor tearjoṅ reakʼe ponthayeda, menkhan uniyakʼ taṛam do Probhu Isorgeye sojheyetʼtaea.

¹⁰ Rajakʼ luṭi reakʼ katha do jiu eserteakʼ katha kana; bicạrre uniyakʼ katha do bae kạiya.

¹¹ Sạri tulạ ar ḍạnḍi do Probhu Isor khonakʼge; ar thạilạkʼ reakʼ sạri baṭkharako do uniyakʼ mẽtʼre bhagegea.

¹² Raj lạgitʼ behokakʼ kạmi do hirkhạwakʼ kana, ente hok reakʼ kạmi hotete siṅghạson do ṭarhao tahena.

¹³ Dhoromkoakʼ luṭige raj doko rạskạ ocoyetʼkoa; ar sạri katha roroṛ hoṛge raj doko kusiaea.

¹⁴ Rajakʼ raṅgao do moronren goḍet leka, menkhan ạkilan hoṛ do raṅgaoe thir ocoya.

¹⁵ Rajakʼ mẽtʼãhã kharsalen khan jiwi bańcaokʼa; uniyakʼ daya do sãwãe reakʼ dakʼ rimil lekage.

¹⁶ Sona khon ạkil hameṭ joṅ do bhagea! Ar rupạ khon buj bachao joṅ hõ bhagea!

¹⁷ Bạṛicʼ khon sahaṛ tahenge dhoromkoakʼ hor do; Okoe hoṛ acʼakʼ jion reakʼ hor secʼe moneyakʼ uni do acʼakʼ jiwiye rukhiyạitaea.

¹⁸ Bạḍại do bạṛicʼakʼe ạguiya ar phulạukʼ mon do maraokʼge.

¹⁹ Bạḍạiko sãote luṭakʼ jinis hạṭiń joṅ khon mạ̃hir monte santao ocokʼko sãote tahenge bhagea.

²⁰ Okoe hoṛ Isorakʼ kathae luturakʼkan uni do bhạlại hoyokʼtaea, ar okoe Probhu Isor cetanreye ṭehãḍokʼkan uni doe bhạgangea.

²¹ Okoeyakʼ ontorre ạkil menakʼ uni do budane ńumogokʼa, ar heṛem kathate jãhãeye cetʼae khan uni do ạkil ḍherokʼtaea.

²² Ạkil do jion reakʼ jharna kana okoeyakʼ buj menakʼtae; ar orlo hoṛ do acʼakʼ lelhatetʼtegeye sạjạiyokʼkana.

²³ Ạkilan hoṛkoakʼ ontor do uniyakʼ mocae ạyuretʼtaea, ar onate uniyakʼ cecetʼakʼte eṭakʼkoakʼ ạkil do ḍherokʼkana.

²⁴ Heṛem kathako do dumur chata leka; ontor lạgitʼ do heṛemgea ar hoṛmo mońjgeye dohoya.

²⁵ Mitʼṭecʼ hor menakʼa okaṭakʼ do manwakoakʼ mẽtʼre ṭhik bujhạukʼkan, menkhan ona reakʼ mucạtʼre do moron menakʼa.

²⁶ Reṅgecʼ do manwa artetʼgeye khaṭao ocoyea; ar uniyakʼ reṅgecʼ iạteye onka ocoyea.

²⁷ Nicạṛ hoṛ do bạṛicʼ kạmi lạgitʼ phundiko aṭaoa; onkoakʼ kathako do jhạusạukʼ kan seṅgel leka.

²⁸ Phẽpṛakʼkan hoṛ do jhogṛae janam ocoya, ar okoe nindạu kathae roṛ uni do gate talare phaṭole dhoraoa.

²⁹ Santaokan hoṛakʼ jion ńelte eṭakʼko do laloc hecʼakoa ar bạṛicʼ horteko calakʼa.

³⁰ Ripitʼetʼkan hoṛ do bạṛicʼakʼkoe moneyakʼa; ar luṭiye lạṭum hapekakʼ hoṛ do bạṛicʼakʼe rikạyeda.

³¹ Pạnḍu upʼ do ṭhonok reakʼ mukuṭ kana; ona do dhorom jionrege ńamokʼa.

³² Okoe usạrate bae raṅgao hodokʼ uni do lạṛhại bir khon hõe bhagegea; okoe nagrahae hatetʼkan ona khon okoe apnare sambṛaokʼkan unigeye bhagea.

³³ Hoṛko doko gulibãṭeda, menkhan ona reakʼ nitokʼ do Probhu Isorgeye ṭhikeda.