Kạhtukko 15 - সান্তালী বাইবেল

¹ Mạ̃hir roṛ ruạṛ do raṅgaoe cabaea, menkhan saegatʼ katha do raṅgaoe janam ocoya.

² Ạkilan hoṛkoakʼ alaṅ do bidiại hạṭińeda, menkhan bebujkoakʼ moca do lelhawakʼe oḍokeda.

³ Probhu Isorakʼ mẽtʼãhã do sanamko secʼge menakʼa; ona do boge ar bạṛicʼ hoṛkoe tunkhiyetʼkoa.

⁴ Mạ̃hir alaṅ do jion reakʼ daṛe kana, menkhan eṛe alaṅ do jiue talga tạuạga.

⁵ Bebuj hoṛ do acʼ apatakʼ ḍanṭaoe nihạ̃ta, menkhan bujhạntar hoṛ do nisṛạue moneyakʼa.

⁶ Dhorom hoṛakʼ oṛakʼ do aema dhon menakʼa, menkhan bedhoromkoakʼ arjaoakʼ do muhine ạguiya.

⁷ Ạkilan hoṛkoakʼ luṭi do bidiại pasnaoeda, menkhan bebujkoakʼ ontor do onka baṅkana.

⁸ Bedhoromkoakʼ jotowakʼge Probhu Isor doe hirkhạwakʼa, menkhan khạṭi hoṛkoakʼ koejoṅte uni doe kusikʼkana.

⁹ Probhu Isor do bedhoromkoakʼ hore hirkhạwakʼa, menkhan okoe hok reakʼ kạmi lạgitʼko laha idikʼ onko doe dulạṛkoa.

¹⁰ Okoe ṭhik horko bạgiyakʼ onko lạgitʼ do sạjại menakʼa; ar okoe nisṛạue kurudakʼkan uni doe gujukʼa.

¹¹ Probhu Isor samaṅre Sheol ar Abbadon banarge sodorgea; enḍekhan tinạkʼ artetʼge manwakoakʼ mon do!

¹² Landa dhutʼetʼicʼ do nisṛạu katha bae kusiyakʼa; uni do ạkilanko ṭhen bae calakʼa.

¹³ Ontorre rạskạ tahẽlen khan mẽtʼãhã hõ kusige ńelokʼa, menkhan mon reakʼ bhabnate jiu do talga tạuạgokʼa.

¹⁴ Okoeyakʼ monre buj menakʼ uni do ạkile sendraea, menkhan khaṭo bujankoakʼ moca do lelhawakʼe ạtińjoṅa.

¹⁵ Dukokʼ kankoakʼ do joto dinge bạricʼgetakoa, menkhan kharsalayikʼ do joto dingeye hesecʼ sekrejokʼa.

¹⁶ Be suluk sãote ḍher dhon lab joṅ khon Probhu botorae tulucʼ thoṛawakʼge bhagea.

¹⁷ Aṛakʼ utu ar ona seletʼ dulạṛge bhagea jel utu daka ar ona seletʼ kurud khon do.

¹⁸ Raṅgaokʼ hoṛ do jhogṛakʼgeko ehoba, menkhan bae raṅgao hodokʼicʼ do jhogṛae thir ocoya.

¹⁹ Asaṅpoḍa hoṛakʼ hor do jạnum jhạuạkote ṭạṭi esetʼ akatʼ hor leka, menkhan dhorom hoṛakʼ hor do sạriạugetakoa.

²⁰ Ạkilan hopon do apatakʼ jionre rạskạko ạguiya, menkhan khaṭo bujan hoṛ do eṅgattetʼe nihạ̃tea.

²¹ Buj reakʼ okulạn okoeyakʼ menakʼ uni do lelhatetʼreye rạskạkʼ kana, menkhan okoeyakʼ buj menakʼ uni do sojhe horteye taṛameda.

²² Solha begor goṭawakʼ do baṅ purạukʼa, menkhan saṅge sosolhakote ona do purạukʼgea.

²³ Okoe hoṛ lek lekate kathae roṛ uni doe kusikʼa; ente ṭhik oktere katha roṛ do tinạkʼ bhage!

²⁴ Budan hoṛakʼ jion reakʼ hor do cetan secʼe idiya, ar onate uni do patal puri khon rukhiyại ńama.

²⁵ Probhu Isor do bạḍạikoakʼ oṛakʼe rạputʼeda, menkhan rạnḍi ar dukhikoakʼ simạ doe ṭarhao aroeya.

²⁶ Probhu Isor do bạṛicʼ monsubạkoe hirkhạwakʼ kana, menkhan bhạlại reakʼ kathako do uniyakʼ mẽtʼre khạṭigea.

²⁷ Lalociạ hoṛ do acʼakʼ gharońjre duke ạguiya, menkhan okoe hoṛ ghuse hirkhạwakʼ uni do jione ńama.

²⁸ Dhorom hoṛakʼ ontor do hudiskateye roṛ ruạṛa, menkhan bedhoromkoakʼ moca khon do bạṛicʼ katha ạtu oḍokokʼa.

²⁹ Probhu Isor do bạṛicʼko khon pharakreye tahenkana, menkhan uni do acʼ botoraekoakʼ koejoṅe ańjomeda.

³⁰ Rạskạte perecʼ mẽtʼ do eṭakʼkoe rạskạ ocoyetʼkoa, ar bhạlại reakʼ sombat do jaṅ ar jele purṭhạyeda.

³¹ Okoe hoṛ nisṛạukoe luturakʼkan uni do ạkilanko sãoteye girobasokʼ kana.

³² Okoe hoṛ ḍanṭao bae bạsutakʼ kan uni do apnargeye nihạ̃tokʼa. Menkhan nisṛạu ańjomicʼ do bae hameṭ joṅa.

³³ Probhu Isor botorae do ạkilokʼ lạgitʼ sikhạuna kana, ar man ńam reakʼ hor do nindhạnokʼgea.