Kạhtukko 14 - সান্তালী বাইবেল

¹ Ạkilan maejiu do acʼakʼ soṅsare benao rakaba, menkhan bebuj maejiu do acʼakʼ titege soṅsare rạpuda.

² Okoe dhoromteye calakʼ uni do Probhu Isore botoraea, menkhan okoe peṛta horteye calakʼ uni doe nihạ̃tea.

³ Bebuj hoṛ do acʼakʼ kathare bạḍạiye sodor ocoya, menkhan ạkilanko do akoakʼ katha iạte rukhiyạko ńama.

⁴ Ḍaṅgra bako tahẽlen khan goṛa do khạlige tahena, menkhan phẽṭaṛakʼ daṛetege phosol do bạ̃ṛti ńamokʼa.

⁵ Pạtiạr goha do eṛe katha bae roṛa, menkhan phạsiạra goha do eṛe kathae roṛa.

⁶ Landa dhutʼicʼ hoṛ do sendrate ạkil bae ńama, menkhan bud menakʼtae hoṛ do usạrage ạkile hameṭ joṅa.

⁷ Bebuj hoṛ ṭhen khon calao joṅme, ente uni khon bidiạ reakʼ katha do bam ńama.

⁸ Acʼakʼ hore orom ona kangea budan hoṛakʼ ạkil do, menkhan chol kopoṭ do bebuj hoṛkoakʼ lelhatetʼge.

⁹ Bebuj hoṛ acʼakʼ kạiye aṅgoctae do nichokokʼ lekae bujhạua menkhan bhage hoṛ do samgekʼgeye bạsutakʼ kana.

¹⁰ Mon do apnarakʼ haṛhatʼe baḍaekana; menkhan am ar iń do ona reakʼ rạskạre balaṅ seletʼ daṛeakʼa .

¹¹ Bạṛicʼkoakʼ oṛakʼ do jarkharokʼtakoa, menkhan dhorom hoṛkoakʼ tạmbu do arhõ lạṭu idikʼa.

¹² Mitʼṭecʼ hor menakʼa okaṭakʼ do manwakoakʼ mẽtʼre ṭhik bujhạukʼkan, menkhan ona hor mucạtʼre do gujukʼ menakʼa.

¹³ Landaere hõ mon reakʼ duk do tahengea, ar rạskạ mucạtʼre hõ hirdạnige.

¹⁴ Bepạtiạr hoṛ do akoakʼ beboharteko tirpitokʼkana, menkhan bhage hoṛko do apnarakʼ beboharte bạ̃ṛtiko tirpitokʼkana.

¹⁵ Lelha hoṛ do sanam kathageko pạtiạukʼa, menkhan sontorokʼ hoṛ do bud salakʼe taṛama.

¹⁶ Ạkilan hoṛ doe sontorokʼa ar bạṛicʼ khone sahaṛokʼa, menkhan bebuj hoṛ do acʼ cetanre pạtiạue dohoya ar bae sontorokʼa.

¹⁷ Naseyakʼte raṅgaokʼ hoṛ do lelhayicʼ lakae kạmiya, menkhan bujhạntar hoṛ doe jiwi hataṛa.

¹⁸ Khaṭo budan hoṛko do lelhawakʼko kạmiya, ar bujhạntar hoṛ do bidiạteko dạhṛikʼa.

¹⁹ Bạṛicʼ hoṛko doko tabekʼa bhage hoṛko samaṅre, ar phạsiạrko doko tabekʼa Isor botorae hoṛko ṭhen.

²⁰ Reṅgecʼ hoṛ do acʼren peṛako hõ bako kusiwaea, menkhan kĩsạ̃ṛ hoṛren do aema gateko tahena.

²¹ Okoe acʼ aḍepaseren hoṛkoe nihạ̃tko uni doe kạiyeda, menkhan okoe reṅgecʼkoe dawawako kan uni doe bhạgangea.

²² Okoe bạṛicʼ kạmi lạgitʼ phundiko aṭaoetʼ onko do cetʼ bạṛicʼ secʼ bako calakʼ kana? Menkhan okoe do bhạlại lạgitʼko ponthayetʼ onko lạgitʼ do pạtiạr ar biswạsgeko ńama.

²³ Joto lekan khaṭaokʼrege lab do menakʼa, menkhan eken luṭi reakʼ roṛte do ṭonṭa menakʼa.

²⁴ Ạkilankoakʼ kuṛại do onkoakʼ dhonge, menkhan khaṭo budankoakʼ lelhatetʼ do arhõ lelhatetʼe janam ocoya.

²⁵ Okoeṭakʼ goha do sạri kathae roṛ uni do eṭakʼicʼakʼ jiwiye rukhiyạitaea, menkhan eṛe gohayicʼ doe soprota.

²⁶ Dhorom hoṛ do keṭecʼ bhorsa menakʼtaea ar uniren gidrạko lạgitʼ do aotan gaṛ menakʼa.

²⁷ Dhorom do jion reakʼ jharna kana; moron reakʼ jhạliko khon paskaokʼ lạgitʼ.

²⁸ Porjako saṅgelen khan rajakʼ do ṭhonok hoyokʼa, menkhan kạmiạko begor mạlikakʼ do jarkharaokʼge.

²⁹ Okoe usạrate bae raṅgaokʼ uni doe budan hoṛkana, menkhan usạrate raṅgao godokʼicʼ do lelha hoṛ lekanae.

³⁰ Nirại mon do hoṛmo mońje dohoya, menkhan hiskạ do hoṛmoe duk ocoya.

³¹ Okoe reṅgecʼ hoṛe santaoko uni do sisirjạuicʼe henostawae kana, menkhan okoe hoṛ okulankoe dayawako uni do acʼren sisirjạuicʼe manotea.

³² Bedhoromicʼ do acʼakʼ bạṛicʼ kạmi iạteye ńurhạ ocokʼa, menkhan dhorom hoṛ do gujukʼre hõ as tahentakoa.

³³ Okoeyakʼ buj menakʼ onkoakʼ ontorre do ạkil girobasokʼa, menkhan khaṭo budanko do akoakʼ ạkil jạhir lạgitʼko lạhum tạhum baṛaea.

³⁴ Dhorom do jạtrenkoe maraṅkoa menkhan kại do jạtrenkoe bemanotkoa.

³⁵ Okoe ạkil salakʼe kạmi raj do uniye bạsutaea, menkhan okoe kạmiạyicʼ do lajao paṛaoakʼe kạmi uni do uniren edreyanicʼe hoyokʼa.