Kạhtukko 13 - সান্তালী বাইবেল

¹ Ạkilan hopon do apatakʼ sikhạunae ańjoma, menkhan landa dhutʼicʼ hoṛ do nisṛạu bae hetawakʼa.

² Manwa do acʼakʼ kathatege bhạlạiye lab daṛeakʼa; ar bepạtiạu hoṛko do santaoko gagocakʼa.

³ Okoe acʼakʼ mocae sontortae uni do acʼakʼ jiwiye rukhiyạitaea, menkhan okoe begor sontorte kathae roṛ uni doe jarkharokʼa.

⁴ Asketicʼ do ńam baṛaeye khoja menkhan cetʼge bae ńama, menkhan khaṭaokʼkan hoṛ do acʼakʼ khojokʼakʼ khon hõ ḍhere ńama.

⁵ Dhorom hoṛ do eṛeakʼko hirkhạwakʼa, menkhan bạṛicʼ hoṛ do lajao ar durnamkoko hoyokʼa.

⁶ Isor botorae do dhorom hoṛe rukhiyạyea, menkhan bedhorom do kại hoṛakʼ jarkhare ạguiya.

⁷ Apnarte kisạ̃ṛ udugokʼicʼ do acʼakʼ cetʼge bạnukʼtaea; menkhan reṅgecʼe udugokʼ hoṛ do ḍher dhon menakʼtaea.

⁸ Kisạ̃ṛ hoṛ do jiwi bańcaotae lạgitʼ dhone khoroca. Menkhan reṅgecʼ hoṛ do okoe hõ bako botor ocoyea.

⁹ Isor botoraekoakʼ marsal do ḍig ḍig jolokʼa, menkhan bedhoromkoakʼ diuhe do ĩṛĩjokʼtakoa.

¹⁰ Bạḍại do jhogṛa ar reṭepeṭeye sirjạu ocoya, menkhan okoe hukumko ańjometʼ onko ṭhen do ạkil ńamokʼa.

¹¹ Khaṭao begorte oka ṭaka ńamokʼ ona do oṭaṅokʼa, menkhan okoe hoṛ khaṭaokate ṭakae doho jarwae uniyakʼ do baḍhaokʼtaea.

¹² As akanakʼ purạukʼte bilomokʼ khan ontor do rạpudokʼa,

¹³ Okoe hoṛ Isorakʼ kathae nihạ̃t uni do acʼakʼ nosṭokʼe ạgujoṅa, menkhan okoe hoṛ Isorakʼ hukumkoe manao uni do acʼakʼ kuṛạiye ńama.

¹⁴ Ạkilan hoṛakʼ cecetʼakʼ do jion reakʼ jharna leka; moron reakʼ pạsiko khon sahaṛokʼ lạgitʼ.

¹⁵ Okoeyakʼ bhage bud menakʼ uni do manote ńama, menkhan bepạtiạr hoṛ doko marao cabakʼa.

¹⁶ Sontorokʼkan hoṛ do ạkil salakʼe kạmiyeda, menkhan khaṭo budan hoṛ do acʼakʼ lelhatetʼe sodoreda.

¹⁷ Bạṛicʼ khobor emokʼicʼ do muhinreye paṛaokʼa, menkhan pạtiạricʼ do suluke hoeocoya.

¹⁸ Okoe hoṛ ḍanṭao bae bạsutakʼkan uni do okulan ar lajaoreye paṛaokʼa, menkhan nisṛạue hetawakʼkan hoṛ doe manot ocokʼa.

¹⁹ Mon reakʼ sana purạulen khan ontor tirpitokʼa, menkhan bạṛicʼ khon sahaṛokʼ do bebuj lạgitʼ hirkhạwakʼ kana.

²⁰ Ạkilanko sãote okoeye senokʼ uni do ạkilane hoyokʼa, menkhan okoe bebuj hoṛkoren gateye hoyokʼ uni doe baṛijokʼa.

²¹ Bạṛicʼakʼ do kạiyanko tayomteye ńir hijukʼa, menkhan bhạlại do Isor botoraekoakʼ kuṛại kana.

²² Bhage hoṛ do acʼren goṛom gidrạko lạgitʼ ạidạriye doho oṭokakʼa, menkhan kạiyankoakʼ dhon do Isor botoraeko lạgitʼge doho akan tahena.

²³ Reṅgecʼkoakʼ jumire do aema phosol arjaokʼa, menkhan behokʼ iạte ona doe recʼocokʼa.

²⁴ Okoe acʼren hopon bae ḍanṭaoede uni do acʼren hopon bae dulạṛ edekana, menkhan okoe uniye dulạṛ edekan uni do ḍanṭaoe secʼ hõe moneyakʼ kana.

²⁵ Isor botorae hoṛko do lacʼ bikʼko joma, menkhan bedhoromko do lacʼ bikʼ jom bako ńama.