Kạhtukko 12 - সান্তালী বাইবেল

¹ Okoe hoṛ ḍanṭaoe kusiyakʼ uni do ạkile dulạṛeda, menkhan okoe samka sạṭi reakʼ kathae kurudakʼ uni doe orlogea.

² Bhage hoṛ do Probhu Isor ṭhen khon dayako ńama, menkhan okoe bạṛicʼe phundikan uni do Probhu Isor dusi menteye ṭarhaoea.

³ Bedhoromakʼte jãhãe hoṛakʼ jionrege kajaktetʼ do baṅ tahena, menkhan Isor botorae hoṛakʼ jion reakʼ rehetʼ do kajak tahena.

⁴ Bhage ar gun menakʼtae bạhu do jãwãetetʼ lạgitʼ mukuṭ kanae, menkhan okoeṭakʼ maejiu do lajao paṛaoakʼkoe kạmikan uni do acʼren jãwãeyakʼ sea jaṅ lekanae.

⁵ Isor botorae hoṛkoakʼ hudisko do bhageakʼkote perecʼgea, menkhan bedhoromkoakʼ solhare do phạsiạratetʼ menakʼa.

⁶ Bedhorom hoṛko do mãyãm joroe lạgitʼ tãṛãkʼ akan reakʼ kathako mena, menkhan dhoromko do rukhiyạ reakʼ kathako roṛa.

⁷ Bedhoromko doko marao utạrokʼa, onkoakʼ bõsko do baṅ tahena, menkhan dhorom hoṛkoakʼ bõsko do ṭikạu tahena.

⁸ Manwa cetʼleka budko khaṭao ona lekage sarhaoko ńama, menkhan peṛta hoṛ doko nihạ̃t ocokʼa.

⁹ Acʼte kisạ̃ṛe udugokʼkan menkhan oṛakʼre jomakʼ bạnukʼtayicʼ khon do, kạmikateye ạsulokʼkan sadharon hoṛgeye sorosa.

¹⁰ Dhorom hoṛ do acʼren janwarkoe jotonkoa, menkhan bedhoromkoakʼ daya do bạnukʼa.

¹¹ Okoe hoṛ acʼakʼ jumireye khaṭaokʼkan uni do bạ̃ṛti jomakʼ tahentaea, menkhan okoe do ạuṛiyakʼkoe khudạu baṛeyetʼkan uni do bud reakʼ okulạn menakʼtaea.

¹² Bạṛicʼ hoṛ do bedhoromkoakʼ luṭakʼ jinis ńańamko khoja, menkhan Isor botorae hoṛkoakʼ jionre do jo ńamokʼa.

¹³ Bạṛicʼ hoṛ do acʼakʼ kạite perecʼ katha hotete jhạlireye paṛaokʼa, menkhan dhorom hoṛ do muhin khone paskaokʼa.

¹⁴ Manwa do acʼakʼ katha hotetege bhạlạiteye perecʼ daṛeakʼa, ar uniyakʼ kạmi lekate uni do joe ńama.

¹⁵ Bebuj hoṛ do acʼakʼ horko ṭhikgeye metakʼa, menkhan ạkilan hoṛ do solhae ańjoma.

¹⁶ Bebuj hoṛakʼ khĩs do baḍae godokʼa, menkhan budan hoṛ do opoman bae moneyakʼ kana.

¹⁷ Soṛa monte roṛetʼ hoṛ do sạriyakʼgeye roṛa, menkhan eṛe goha do phạsiạrae phuṭạua.

¹⁸ Saegatʼ katha do tarwaṛe lekae sobokʼa, menkhan ạkilanicʼakʼ katha doe bogea.

¹⁹ Sạriyicʼakʼ reakʼ katha do jaejug hạbicʼ tahena, menkhan eṛeyicʼakʼ reakʼ katha do thoṛa dinge.

²⁰ Okoe bạṛicʼ phundiko aṭaoetʼ onkoakʼ ontorre do phạsiạratetʼ tahena, menkhan okoe bhạlại reakʼ solhako emokʼ onkoakʼ ontorre do rạskạ tahena.

²¹ Dhorom hoṛkoakʼ jionre bạṛicʼakʼ do baṅ hoyokʼa, menkhan bedhoromkoakʼ jionre bạṛicʼakʼte perecʼ tahena.

²² Eṛeyicʼakʼ mẽtʼãhã Probhu Isor doe kurudakʼ kana, menkhan pạtiạrte kạmikan hoṛ do uniren rạskạ reakʼ kanako.

²³ Budan hoṛ do acʼakʼ bidiạ reaṅ bae lại baṛaea, menkhan bebujko do akoakʼ lelhatetʼko lạṭicʼ baṛaea.

²⁴ Khaṭaokʼkan hoṛ doko kisạ̃ṛokʼa, menkhan asketokʼ hoṛ do eṭakʼko tabereko tahena.

²⁵ Bạṛicʼ hudis do manawa ontore bạṛijtaea, menkhan udgạu reakʼ katha do manwae rạskạ ocoyea.

²⁶ Dhorom hoṛ do bạṛicʼ khone sahaṛokʼ kana, menkhan bạṛicʼ hoṛ do onkoe asokʼ ṭayokʼ ocokoa.

²⁷ Asketiạ hor do acʼ sendra gocʼicʼ hõ bae teweńea, menkhan kurumuṭuyicʼ do damanakʼ dhone hameṭjoṅa.

²⁸ Dhorom reakʼ horre do jion menakʼa, ar ona horre do gujukʼ bạnukʼa.