Kạhtukko 11 - সান্তালী বাইবেল

¹ Eṛe tulạ do Probhu Isore kurudakʼa, menkhan hok reakʼ baṭkhara doe kusiyakʼ kana.

² Bạḍại são sãote opoman hõ hijukʼa, menkhan mạ̃hir sãote do ạkil hijukʼa.

³ Khạṭi hoṛko do akoakʼ sạritetʼ hoteteko ạyur ocokʼa, menkhan bin pạtiạukʼ hoṛ do akoakʼ phạsiạratetʼ iạteko marao ocokʼa.

⁴ Isorakʼ edre tisokʼ pheḍ hijukʼa enhilokʼ dhon do jãhãn porhoge baṅ hoyokʼa, menkhan Isor botorae do gujukʼ khone rukhiyạwa.

⁵ Khạṭi hoṛko do Isor botoraeko lạgitʼ sojhe horko benaoa, menkhan bedhoromko do akoakʼ phạsiạratetʼ iạteko maraokʼa.

⁶ Khạṭi hoṛkoakʼ dhorom do onkoe rukhiyạkoa, menkhan bepạtiạuko do apnarakʼ jhạliregeko paṛaokʼa.

⁷ Bedhorom hoṛe gocʼlen khan uniyakʼ ashõ nosṭokʼtaea; Ar uniyakʼ daṛe iạte okakoe asakan tahẽkan ona do nasaokʼtaea.

⁸ Dhorom hoṛ do kosṭo khon bańcaoko ńama, menkhan ona kosṭo do bedhoromko cetanre hecʼ paṛaokʼa.

⁹ Okoe Isor bae botorae uni do mocate aḍepaserenkoakʼ bạṛicʼe ạguiya, menkhan Isor botorae hoṛ do ạkil iạte rukhiyại ńama.

¹⁰ Isor botoraekoakʼ bhạlại hoylen khan nagraha rạskạkʼa, ar bedhoromkoko ḍahao maraolenre hoṛko do rạskạteko andoṛa.

¹¹ Dhorom hoṛko Isorakʼ bhorko ńamle khan nagraha do maraṅokʼa, menkhan bedhoromkoakʼ moca hotete nagraha do bạṛijokʼa.

¹² Okoe acʼ aḍepaseren hoṛkoe nindạuko uni do ạkil reakʼ okulạn menakʼtaea, menkhan okoeyakʼ buj menakʼ uni do acʼakʼ alaṅe sambṛaoeda.

¹³ Okoe eṭakʼko reaṅe khaekhoyetʼkan uni do oko kathakoe lạiyetʼkana menkhan pạtiạr hoṛ do kathae dapala.

¹⁴ Lek lekate ạyur reakʼ buj begorte jạtrenko doko ńurokʼa, menkhan aema solhakoko hoylen khan jạtrenko do bańcaoko ńama.

¹⁵ Okoe eṭakʼ hoṛren jạmindare hoyokʼ uni do khạṭige kosṭoe ńama, menkhan okoe jạmindar hoyokʼe baṅetʼkan uni do khạtirjomae tahena.

¹⁶ Mońje beoharetʼkan maejiu do manote hameṭ joṅa, ar santaokan hoṛ do dhone hạrjoṅa.

¹⁷ Dayakʼkan hoṛ do apnare bhạlạiyokʼ kana, menkhan kurmutạha hoṛ do apnarakʼe bạṛicʼeda.

¹⁸ Bedhoromkoakʼ rojgarakʼ do ạuṛiyakʼgetakoa, menkhan Isore botoraekan hoṛ okoe do itạye er uni do sạrige ona reakʼ phosole ira.

¹⁹ Dhoromre ṭarhaoicʼ do jiwetʼe tahena, menkhan okoe do bạṛicʼakʼe khudạuetʼkan uni do gujukʼe ạguiyeda.

²⁰ Okoekoakʼ ontor peṛtage Probhu Isor do onkoe kurudako kana, menkhan khạṭi jion khemaoko cetanre doe kusikʼkana.

²¹ Khạṭigepe baḍaea bedhorom hoṛko do sạjạiko ńamgea, menkhan dhorom hoṛ doko bańcaokʼa.

²² Sukri thotnare sona mạkṛi lekanae, buj suj bạnukʼtae uni mońj utạricʼ maejiu do.

²³ Dhoromko reakʼ monsubạ do bhạlạiye ạguiya, menkhan bedhoromicʼ do as bodolte eken Isorakʼ edrege pheḍ hecʼaea.

²⁴ Okoe lahe caheye danetʼkan uni do arhõ bạ̃ṛti hoyokʼtaea; arhõ menakʼkoa okoe do hok reakʼ khon ḍherko dohoyetʼre hõ reṅgecʼreko paṛaokʼ kana.

²⁵ Okoe lahe caheko emokʼ onko doko kisạ̃ṛokʼa; ar okoe eṭakʼkoe tirpit ocoko uni do acʼ hõe tirpit ocokʼa.

²⁶ Okoe hoṛ phosole dohobaekakʼ uni doko sarapaea, menkhan okoe onae ạkhriń uni do bhoranicʼe hoyokʼa.

²⁷ Okoe bhageakʼe ńam bakʼṛakan uni do dayae ńama, menkhan bạṛicʼakʼe ńam baṛaeyicʼ do acʼge ona paṛaoaea.

²⁸ Okoe acʼakʼ dhonreye bhorsakʼkan uni doe gujukʼa, menkhan dhorom hoṛ do hạriạṛ ghãs leka purṭhại hoyokʼa.

²⁹ Okoe acʼakʼ gharońjre bạṛicʼakʼe ạguiyetʼ unire do hoe chaḍa ar cetʼge baṅ tahena; ar bebujko do ạkilan hoṛren golamko hoyokʼa.

³⁰ Dhorom hoṛ do eṭakʼkoakʼ jion dare leka; ar okoe eṭakʼkoakʼ mone jitạu akatʼ uni doe ạkilanicʼ kana.

³¹ Noa dhạrtirege Isor botoraekan hoṛ do kuṛạiko ńam khan, enḍekhan bedhorom ar kạiyanko do khạṭige akoakʼ kuṛạiko ńamgea.