Kạhtukko 10 - সান্তালী বাইবেল

Solomonakʼ sopolha

¹ Solomonakʼ dhorom sopolha. Ạkilan hopon do apatakʼ jionre rạskại ạguiya, menkhan bebuj hopon do eṅgatakʼ jionre duke ạguiya.

² Behok lekate ńamakʼ dhonre jãhãn porho do bạnukʼa, menkhan dhorom do moron khone rurukhiyạwa.

³ Probhu Isor do acʼ botoraekanko bae reṅgecʼ ocokoa, menkhan bedhoromkoakʼ laloc doe ạuṛiyakʼ ocoya.

⁴ Asketokʼ ti do manwae reṅgecʼ ocoyea, menkhan khaṭaokʼkan ti doe kisạ̃ṛokʼa.

⁵ Ạkilan hopon do aghãṛre phosole samṭaoa, menkhan lajao ocokʼ hopon do irokʼ jokhecʼe jạpitʼkakʼa.

⁶ Dhoromicʼakʼ bohokʼre do bhor hijukʼa, menkhan bedhoromicʼakʼ mocare do jor julumge oko tahena.

⁷ Dhorom hoṛko reakʼ disạ do bhore ạguiya, menkhan bedhoromkoakʼ ńutum do sea giḍikʼa.

⁸ Okoeyakʼ ontorre ạkil menakʼ uni do hukume bataoa, menkhan bok bokaokʼkan bebuj hoṛ doe maraokʼa.

⁹ Okoe dhoromteye calakʼkan uni do khạtirjomae dãṛãnkana, menkhan okoe peṛta horteye calakʼ uni doe sapʼ ocokʼa.

¹⁰ Mẽtʼ ripitʼicʼ hoṛ doe haso ocokʼa; ar bok bokaokʼkan bebuj hoṛ doe bạṛijokʼa.

¹¹ Dhorom hoṛakʼ moca do jion reakʼ jharna leka, menkhan bedhorom hoṛakʼ mocare do jor bojorge oko tahena.

¹² Kurud do jhogṛae janam ocoya, menkhan dulạṛ do sanam lekan bedhorome danaṅa.

¹³ Buj menakʼtae hoṛakʼ mocare do ạkil tahena, menkhan pãeṛa ṭheṅga do buj bạnukʼtayicʼ hoṛakʼ dea lạgitʼ kana.

¹⁴ Ạkilan hoṛ do bidiạkoe dohojoṅa, menkhan bebujakʼ moca do jarkhare hoho ạguiya.

¹⁵ Kisạ̃ṛkoakʼ dhon do pạcriteko esetʼ akatʼ nagraha lekana.

¹⁶ Dhoromkoakʼ kuṛại do jion kana, menkhan bedhoromkoakʼ arjawakʼte kại do ḍherokʼkana.

¹⁷ Ḍanṭaoicʼ do jion reakʼ horteye calakʼkana, menkhan nisṛạue phesṛaoetʼkan hoṛ doe sen adokʼa.

¹⁸ Kurude okoyetʼ kan hoṛ do eṛe kathae roṛa; ar bebuj hoṛ do bodname gahaoa baṛaea.

¹⁹ Ḍher kathare bedhorom do baṅ okulạnokʼa, menkhan okoe mocae ḍanṭaoetʼtae uni doe budangea.

²⁰ Isor botoraekoakʼ alaṅ do khạṭi rupạ leka, menkhan bedhoromkoakʼ ontor reakʼ dam do bạnukʼtakoa.

²¹ Isor botoraekoakʼ luṭi do ḍher hoṛgeye ńeljutkoa, menkhan ạkil begorte bebuj hoṛ doko gujukʼa.

²² Probhu Isor okoeye bhorae uni doe kisạ̃ṛgea; ar ona bhorre jãhãn duk ar kosṭo do baṅ tahena.

²³ Bạṛicʼ kạmi do bebujkoakʼ rạskạ kana, menkhan budankoakʼ rạskạ do ạkilge.

²⁴ Bedhorom hoṛ do okako botorakʼ onaregeko paṛaokʼa, menkhan Isor botoraekoakʼ khojogokʼa do purunokʼtakoa.

²⁵ Hoe bharḍo hecʼlenre bạṛicʼ hoṛ do bako tahena, menkhan Isor botorae hoṛ do jaejug diṛho akane tahena.

²⁶ Ḍaṭare sirkạ ar mẽtʼre dhũạ lagaolenre cetʼleka kosṭo ạikạukʼa, onkage kuṛhiyạ hoṛ hõ jãhãregem kolkae onḍege kosṭoko ńama.

²⁷ Probhu Isor botorae do bahaokʼ dine baḍhaoa, menkhan bedhoromkoakʼ din do khaṭokʼtakoa.

²⁸ Isor botoraekoakʼ asre do rạskạ menakʼa, menkhan bedhoromkoakʼ as do michạgetakoa.

²⁹ Probhu Isorakʼ hor do dhorom hoṛko lạgitʼ gaṛ leka, menkhan okoe do bạṛicʼko kạmi onko lạgitʼ do morone ạguiya.

³⁰ Isor botorae hoṛko do jao okte diṛho akanko tahena menkhan bedhorom hoṛko do disạmre bako girobas daṛeakʼa.

³¹ Dhorom hoṛkoakʼ moca khon do ạkil reakʼ katha oḍokokʼa, menkhan peṛta katha roroṛ alaṅ doe getʼ giḍi ocokʼa.

³² Dhorom hoṛkoakʼ moca do lek lekan kathae roṛa, menkhan bedhoromkoakʼ moca do eken peṛta kathageye roṛa.