Josuạ 9 - সান্তালী বাইবেল

Gibeonren hoṛ Josuạko eṛeyede

¹ Jordan gaḍa pạchim secʼren rajko do noako reakʼ joto kathako ańjomkeda. Onko do usul buru ṭoṭha ar ona latar ṭoṭha disạmkoren ar Lebanon hạbicʼ jalapuri ḍhip aṛete okako disạm tahẽkan onakoren rajgeko tahẽkana. Onko do Hitiko, Amoriko, Kananiko, Pherisiko, Hiwiko ar Jebusikoren rajgeko tahẽkana.

² Onko do Israelko reaṅ sanamakʼ katha ańjomkate Josuạ ar Israel upạrte lạṛhại lạgitʼko mitʼ motena.

^3-4 Jerikho ar Ae nagraha reakʼ Josuạ okae cekaletʼ ona reakʼ katha tinre Gibeon nagraharen Hiwikoko ańjomkeda unre onko do mitʼṭecʼ calakiko kạmikeda. Onkoren thoṛa hoṛ do Josuạ ṭhenko mohnḍayena. Onko do akoren gadha cetanre mare mare bosta ar oṛecʼ ar tạli akatʼ darkha rasa dohowakʼ harta reakʼ mare kumkoko ididarakeda.

⁵ Onko do mare ar tạli akatʼ panahi ar mare kicricʼko horokʼkeda. Ar horte lạgitʼ okaṭakʼ jomakʼko hataoketʼ ona hõ kecakʼ ar rohoṛ piṭhạ tahekana.

⁶ Nonkate onko do Gilgolre Israelkokʼ ḍerare Josuạ samaṅreko seṭerena. Onko do Josuạ ar Israelkoko metatʼkoa, “Ale do ạḍi sạṅgiń disạm khonle hecʼakana; onate ma bondobos baṛe bandhao alepe.”

⁷ Unre Israelko do Hiwikoko metatʼkoa, “Ape do pasecʼ ale aḍepaseren hoṛ kangeape. Ar sạrige onka kan khan cetʼlekate ape sãote bondobos dole dohoya?”

⁸ Onko do Josuạko metadea, “Ńelme, ale do amren golamko kanale.” Unre Josuạ do onkoe kuliketʼkoa, “Ape dope okoe kana, ar oka khonpe hecʼakana?”

⁹ Onkoko roṛ ruạṛkeda, “Amren Probhu Isorakʼ ńutum ańjomkate amren golamko do ạḍi sạṅgiń khonle hecʼ akana. Misor disạmre uni okae cekaletʼ ona reakʼ sombat hõle baḍae akada.

¹⁰ Ona chaḍa uni do Hisbonren raj ar Astarotre girobasokʼkan Basonren Og raj metakʼme jordan gaḍa purub secʼren Amorikoren rajkin cetanre okam ceka akatʼ ona hõle ańjom akada.

¹¹ Aleren mukhiyạko ar aleakʼ disạmren sanamkoge noako hukum akatʼlea, horte lạgitʼ jomakʼ soṅgete jemonle iditora joṅ ar am sãote ńapamkatele metam, ‘ale do amren golam kanale de mitʼṭen bondobos baṛe emaleme.’

¹² Ape ṭhen hijukʼ hilokʼ ale do oṛakʼ khon lolo lolo piṭhạwantele oḍok hecʼlena, menkhan ńitokʼ ńelme, ona piṭhạko hõ rohoṛte kecakʼ akantalea.

¹³ Darkha rasa dohoy reakʼ kumko hõ perecʼkatele ạguleda ar onako hõ nãwãge tahẽkana menkhan, ńitokʼ onako cetʼleka oṛecʼ akantalea. Ar sạṅgiń reakʼ horte hijukʼ hijukʼte jaṅga reakʼ panahi ar aṅgropko hõ mareyentalea.”

¹⁴ Israelko do eken onkoakʼ jomakʼko ńelkeda menkhan Probhu Isor do bako kuliledea.

¹⁵ Josuạ do onko sãote mitʼṭene bondoboskeda ar baṅ gocʼko reakʼ hõ onko tulucʼe cukạukeda, ar Israel somajren mukhiyạko hõ ona reaṅko gokʼkeda.

¹⁶ Gibeonko sãote cukạu pe din tayom khange Israelkoko ańjomkeda, ako aḍepaseren hoṛkangeako ar onko do sorregeko girobasokʼ kana.

¹⁷ Unre Israelko do onkoakʼ elaka secʼko mohnḍayena ar pe din hilokʼre onḍeko seṭerena. Onkokoakʼ elakare do Gibeon, Kephira, Beerot ar Kiriat-Jearim nagrahako tahẽkana.

¹⁸ Menkhan Israelko do onko bako akromonletʼkoa, ente onkoren mukhiyạko do Israelren Probhu Isor ńutumte onko ṭhenko kiriạ akana. Ar onate sanam Israelko do mukhiyạko upạrteko karacʼ kurucʼena.

¹⁹ Onate mukhiyạko do onkoko metatʼkoa, “Ale do Israelkoren Probhu Isor ńutumte onko ṭhenle kiriạ akana onate onko cetanre ńitokʼ do ti babon calao daṛeakʼa.

²⁰ Tobe abo do onko lạgitʼ niạ bon kạmiya, onko do babon gocʼkoa jemon onko ṭhen oka bon kiriạ akan ona rạputʼ iạte Probhu Isorakʼ edre abore alo paṛaokʼ.”

²¹ Onko do arhõko menkeda, “Onko do jiwetʼko tahenma.” Onate Gibeonko babotre mukhiyạkoakʼ katha leka onko do Israel somajren sanam hoṛko lạgitʼ sahan mamakʼ ar dakʼ ạgu hoṛko hoyena.

²² Inạ tayom Josuạ do Gibeonko hohowatʼkoteye metatʼkoa, “Ale khon ạḍi sạṅgińrepe tahenkana mente cedakʼpe ṭhokaketʼlea? Ape ma ale sorrege coṅpe girobasokʼkan.

²³ Onate ape cetanre niạ sarap tahẽyena, ińren Isorakʼ oṛakʼ lạgitʼ sahan mamakʼ ar dakʼ ạgui reakʼ kạmipe kạmiya. Niạ golam reakʼ kạmi khon do ar tisge rehae bape ńama.”

²⁴ Onko do Josuạko roṛ ruạṛadea, “Niạ goṭa disạmge ape emape lạgitʼ ar ape samaṅ khon niạ disạmren sanamko marao giḍiko lạgitʼ okaṭakʼ hukum amren Probhu Isor acʼren guti Moseye emade tahẽkan ona do pusṭạutege ale amren golamko ṭhen roṛ akan tahẽkana. Ar onate ale do ape reaṅ sanamakʼko ańjomkate botorte niạ kạmile kạmi akada.

²⁵ Ale do ńitokʼ amakʼ tirege menakʼlea; am okaṭakʼ bhagem metakʼkan ona baṛe ale cetanre kạmime.”

²⁶ Ona iạte Josuạ do Israelkoakʼ ti khon onkoe bańcaoketʼkoa; ar bae gocʼ ocowatʼkoa.

²⁷ Ar Josuạ do enhilokʼge Gibeonkoe hukumatʼkoa jemon onko do Israelko lạgitʼ ar Probhu Isor okaṭakʼ ṭhạ̃iye bachao joṅ ona ṭhạ̃ire Probhu Isorakʼ pinḍ lạgitʼ sahan ar dakʼ ạgui reakʼ kạmiko kạmiy. Ar teheń hạbicʼ onko do ona kạmigeko kạmikana.