Josuạ 8 - সান্তালী বাইবেল

Ae nagraha ḍahao maraokʼkan

¹ Probhu Isor do Josuại metadea, “Alom botorokʼa ar alom hadosokʼa. Amren sanam lạṛhại phạdante am do Ae nagraha cetanre arhõ jhãp emme. Iń do Ae nagraharen raj, uniyakʼ nagraha ar disạm hõ amakʼ tireń jimạ akada.

² Jerikho nagraha ar onaren raj cetanre okam cekaletʼ Ae nagraha ar onaren raj cetanre hõ onkagem cekaea. Menkhan onḍenakʼ luṭ ạguakʼ jinisko ar janwarko ape apnar lạgitʼpe hatao daṛeakoa. Ar am do nagraha tayom secʼre mitʼ dol lạṛhại phạdkom oko dohokoa.”

^3-4 Unre Josuạ do Ae nagraha akromon lạgitʼ gelpe hajar lạṛhại birkoe bachaoanteye oḍok calaoena. Ar ńindạ jokhecʼ onko do noae hukumatʼkoa, “Ańjompe, ape mod khon thoṛa lạṛhại phạd do nagraha tayom secʼrepe oko dohokakoa. Ar nagraha khon ḍher sạṅgiń do alope calakʼa. Sanamkoge sapṛao akaepe tahena.

⁵ Iń do ińren sãoten hoṛkoante nagraha secʼ iń laha idikʼa. Ar lahate leka onko do tinre abo sãote lạṛhại lạgitʼko oḍok hijukʼa unre ale do onko samaṅ khonle dạṛ pharakokʼa.

⁶ Ar onko do aleko laga idilea, arko mena, ‘lahate leka abo samaṅ khonko ńir pharakokʼkana.’ Nonkate ale do nagraha khon sạṅgińtele idikoa. Ar tinre onko khonle ńir pharakokʼa,

⁷ unre ape do ona oko akan jaega khon oḍok hecʼkate nagrahape dokhola. Aperen Probhu Isorge ona do ape tireye jimạya.

⁸ Ape do nagraha dokholkate seṅgelpe jeretʼakʼa. Probhu Isor okalekae hukumakatʼ onkagepe kạmiya. Ape cetanre niạ hukumge tahẽyena.”

⁹ Inạ tayom Josuạ do onkoe kolkatʼkoa. Onko do Ae nagraha reakʼ pạchim secʼre senkate mitʼṭecʼ jaegareko okoyena. Ona jaega do Bethel ar Ae reakʼ talare tahẽkana. Josuạ do enhilokʼ ńindạ sarecʼ lạṛhại phạdko sãoteye tahẽyena.

¹⁰ Dosar hilokʼ Josuạ do ạḍi setakʼre acʼren lạṛhại phạdkoe jarwaketʼkoa. Ar ona tayom uni ar Israelkoren mukhiyạko do onko laha lahate Ae nagraha secʼko mohnḍa idiyena.

¹¹ Josuạ sãoten lạṛhại phạdko do sanamkogeko laha idiyena ar nagraha sor senkate nagraha samaṅ secʼreko jarwayena. Ar Ae nagraha utạr secʼreko ḍerayena. Nagraha ar onkoakʼ ḍera talare do Akor buru nala tahẽkana.

¹² Josuạren mõṛẽ hajar lạṛhại phạdko do nagraha reakʼ pạchim secʼ Bethel ar Ae tala reakʼ mitʼṭecʼ jaegareko oko tahẽyena.

¹³ Nonkate Israelko do akoren lạṛhại phạdko lạṛhại lạgitʼko sapṛao dohokatʼkoa ar okoe do ḍerareko tahena onko do utạr secʼreye dohoketʼkoa ar okoe oko akanko tahen onko do nagraha reakʼ pạchim secʼre. Ar enhilokʼ ńindạ Josuạ do lodamreye aṅga hạṭińena.

¹⁴ Israelko ńelte Aeren raj do ạḍi setakʼre beretʼkate acʼren onko sãote lạṛhại lạgitʼ sanam hoṛkoante nagraha khone oḍokente Araba ṭạnḍire mitʼṭecʼ niṭ akatʼ jaegateye senena. Menkhan bae baḍae daṛeada nagraha tayom secʼre uni upạrte mitʼṭen lạṛhại phạd doko oko akana mente.

¹⁵ Josuạ ar sanam Israelko do onko ńelte botor caṛhaoatʼko leka hahaṅkar horteko ḍạṛkeda.

¹⁶ Unre Ae nagraharen hoṛ do Israelko khudạuko lạgitʼ akoren sanam hoṛko hohowatʼkoa. Onko do Josuạko khudạu idikedea ar nonkate nagraha khon sạṅgińteko idiocoyena.

¹⁷ Ar Israel tayom tayomteko ńir calaoen khan Ae nagrahare mitʼṭen herel hoṛ hõ ar bako sarecʼlena. Onko do nagraha reakʼ phaṭok jhicʼakatʼge Israel tayomteko ńir calaoena.

¹⁸ Unre Probhu Isor do Josuại metadea, “Amakʼ ti reakʼ tarwaṛe do Ae nagraha secʼ tiạrtam, ente amakʼ tirege nagraha doń jimạ akada.” Josuạ do unre acʼakʼ tarwaṛe Ae nagraha secʼe tiạrketʼtaea;

¹⁹ ar são sãote oko akan tahẽkan lạṛhại phạdko do akoakʼ jaega khon beretʼente nagraha secʼko dạṛ idikeda. Ar onḍe bolokateko dokholkeda ar thoṛa okterege nagrahare seṅgelko jeretʼada.

²⁰ Aeren hoṛko do tayom secʼko beṅgetʼ ruạṛketʼ khan akoakʼ nagraha khon coṭte dhũạ rakabokʼko ńelkeda; menkhan oka secʼge onko do bako dạṛ daṛeada, ente okoe Israelko hahaṅkar secʼko dạṛetʼkan tahẽkan onko do inạkʼtege onko upạrte jhãpko emkeda.

²¹ Josuạ ar sanam Israelko do tinreko ńelkeda, akoren oko akan lạṛhại phạdko do nagrahako dokholkeda ar nagraha khon dhũạ rakabokʼ kana unre onko hõ Ae nagraharen hoṛko cetanre jhãpko emkeda.

²² Ar oko akan tahẽkan lạṛhại phạdko hõ Aeren hoṛko akromonko lạgitʼ nagraha khonko oḍok hecʼena. Onate Aeren hoṛ do Israelren banar dol talareko paṛaoena. Ar Israelko do onko sanamko gocʼketʼkoa, okoehõ jiwetʼ bako doholetʼkoa.

²³ Menkhan Ae nagraharen raj do jiwetʼtege Josuạ ṭhenko sapʼ ạgukedea.

²⁴ Okaṭakʼ ṭạnḍire, metakʼme oka hahaṅkarre Ae nagraharen hoṛ do Israelkoko khudạu idiletʼko onḍege Aeren hoṛko gocʼ ocoyen tayom sanam Israelko do Ae nagrahateko ruạṛ hecʼena ar nagrahare okoeko tahekan onko sanamko gocʼketʼkoa.

²⁵ Enhilokʼ Ae nagraharen sanam hoṛ, metakʼme gelbar hajar maejiu ar herelko gocʼ ocoyena.

²⁶ Ae nagrahare okoeko tahẽkan onko ạuriko marao cabako hạbicʼ Josuạ do tarwaṛeye tul akatʼ tahẽkana.

²⁷ Probhu Isor cetʼ leka Josuại hukumade tahẽkan onkage Israelko do ona nagraharen janwarko ar luṭakʼ jinisko ako lạgitʼko ạgu darawana.

²⁸ Ar Josuạ do Ae nagrahae jeretʼatʼte jaejug lạgitʼ mitʼṭecʼ ḍahao maraoakʼ ḍhipi lekae hoyocokeda; ona do teheń hõ mitʼṭecʼ jarkharakʼ ṭhạ̃ige menakʼa.

²⁹ Uni do Ae nagraharen raje gocʼkedea ar ạyupʼ hạbicʼ darereye aka dohokadea. Ar ńindạ jokhecʼ uniyakʼ mạ̃ṛĩ pheḍkate nagraha reakʼ phaṭok duạr bolokʼ horre giḍikae reakʼe hukumkeda. Ar hoṛko do uni cetanre dhiriko giḍi puńjikeda. Ona do teheń hạbicʼ hõ menakʼgea.

Probhu Isorakʼ bondobos reakʼ katha paṛhao ańjomako

^30-31 Inạ tayom Israelko ṭhen emakʼ Probhu Isorren guti Moseyakʼ hukum leka Josuạ do Ebal buru cetanre Israelko lạgitʼ Probhu Isor ńutumte mitʼṭecʼ pinḍe tearkeda. Moseyakʼ ạn-ạri reakʼ puthire cetʼleka ol menakʼ onkage uni doe benao ocokeda. Pinḍ benaore jãhãn pahṭa dhirite do baṅ ar onare mẽṛhẽtʼ reakʼ jãhãn jontropati hõ baṅ beoharlena. Ona pinḍ cetanre Israelko do Probhu Isor ńutumte jeredokʼ ar suluk samaṅokʼakʼko samaṅkeda.

³² Ebal burure Israelko samaṅre Josuạ do dhiri cetanre Moseyakʼ ạn-ạrikoe nokol ucạṛkeda.

³³ Israelko ar onko talareko girobasokʼkan eṭakʼ jạtren hoṛko, onkoren mukhiyạko, kạmiyạko ar bikʼcạrko, metakʼme Israel somajren sanam hoṛko do Probhu Isorakʼ bondobos-sinduk reakʼ banarsa aṛereko teṅgo akan tahẽkana; onko do sinduk gogokʼ naekeko samaṅreko tahẽkana. Ar onkoren adha hoṛko do Gerisim buru samaṅre ar adha hoṛko do Ebal buru samaṅreko teṅgoyena. Probhu Isorren guti Mose do laharege noa kathae roṛletʼ tahẽkana tinre uni do Israelko bhorako reakʼ hukume ńamletʼ tahẽkan.

³⁴ Ona tayom Josuạ do ạn-ạri reakʼ sanamakʼ bhor ar sarapakʼ reakʼ oka katha ol tahẽkan ona jotoe paṛhao ańjomatʼkoa.

³⁵ Noa babotre Mose okako hukume emlen ona reakʼ mitʼṭecʼ hõ Josuạ do bae badleda goṭa Israel somajrenge onae paṛhao ańjomatʼkoa. Niạ somajre do maejiuko, gidrạko ar onko talareko girobasokʼkan eṭakʼ jạtrenko hõko tahẽkana.