Josuạ 7 - সান্তালী বাইবেল

Akhanakʼ kại

¹ Jerikho nagraha maraokʼ reakʼ sarapanakʼ jinisko babotre Israelko do pạtiạrangeko tahẽkana. Menkhan Jihudạ gusṭiren Kạrmi hopon Akhan do onako jinis khon thoṛa do acʼ lạgitʼe dohokeda. Uni do Sabdaeren hopon Serahren goṛomtetʼ koṛae tahẽkana. Uni do noa kạmi iạte Israelko cetanre Probhu Isorakʼ pite caṛhao ocoketʼtaea.

² Josuạ do Jerikho nagraha khon Ae nagrahate hoṛe kolketʼko. Ona nagraha do Bethel nagraha purub Beth-awer nagraha sorre tahẽkana. Hoṛko kolko jokhecʼ uni do onkoe metatʼkoa, “Senkate disạm do mońjte ńel ạguiype.” Ar onate hoṛko do Ae nagrahate senkate hape hapete khoborko ạgukeda.

³ Ona tayom onko do Josuạ ṭhen ruạṛ hecʼenteko menkeda, “Ae nagraha upạrte sanam hoṛ calakʼ reakʼ jạruṛ do bạnukʼa. Ona dokhol lạgitʼ do bar se pe hajar hoṛ kolkom. Noa iạte sanam hoṛ do alom haron ocokoa, ente onḍenko hoṛkoakʼ lekha do thoṛagea.”

⁴ Ona iạte pe hajar gan hoṛ onḍeko senena; menkhan onko do Ae nagraharen hoṛko ṭhenko bhagao ocoyenteko dạṛ pạnḍucʼkeda.

⁵ Nagraha reakʼ phaṭok khon Ae nagraharen hoṛko do Israelkoko khudạu idiketʼkote Sabarim reakʼ tapol jaegare onkoren pegel turui hoṛko gocʼketʼkoa. Onate Israelkoakʼ mon reakʼ jor do rạputʼentakoa.

⁶ Unre Josuạ ar Israelkoren murubbiko do apnarakʼ kicricʼko oṛecʼketʼte Probhu Isorakʼ sinduk samaṅre ạyupʼ hạbicʼ otre ombakʼ hape akanko tahẽyena. Ar akoakʼ bohokʼre dhuṛiko chiṭiạuana.

⁷ Josuại menkeda, “E Probhu Isor, noko jạtrenko jordan gaḍa paromkate cedakʼ maraoko lạgitʼ Amorikoakʼ tirem jimạketʼkoa? Hae ale do jordan hanasa regele bhagele tahẽkana!

⁸ E Probhu Isor, bạiriko ṭhen Israelkoko bhagao ocoyen tayom do ar mementeakʼ cetʼ menakʼtińạ?

⁹ Kananiko ar niạ disạmren eṭakʼ hoṛko niạ katha ańjomkate aleko gherao esetʼlea ar dhạrti khon aleakʼ ńutumko meṭao utạrtalea. Ar inạ tayom do cekate amakʼ ńutumem rukhiyại tama?”

¹⁰ Unre Probhu Isor do Josuại metadea, “Ma beretʼme. Cedakʼem ombakʼ hape akana?

¹¹ Israelko doko kại akada; iń okaṭakʼ bondobos manao lạgitʼ iń metatʼko tahẽkan ona do bako pańja akada. Ar okako jinis do sarapakʼ tabe reakʼ kan ona reakʼ thoṛako hatao akada; arko kombṛo akada, eṛe kathako roṛakada ar akoakʼ jinisko sãote onako dohoakada.

¹² Ona iạte Israelko do akoren bạiriko samaṅre bako teṅgo ṭarhao daṛeakʼ kana; arko dạṛeda, ente onko do ḍahao maraokʼ reakʼ sarapakʼ taberen hoṛko hoyakana. Ḍahao maraokʼ sarapakʼ tabe reakʼ jinisko ape ṭhen menakʼa. Onako ạuripe ocokʼ cabae hạbicʼ ape sãore iń do bạń tahena.

¹³ “Am do senkate iń ńutumte hoṛko begarkom. Arem metakoa onko jemon gapa lạgitʼ apnartetʼ sapha akanko tahen ma. Israelkoren Probhu Isore meneda, ‘E Israel, ape modren nonkanakʼ jinis menakʼa one okaṭakʼ do ḍahao maraokʼ sarapanakʼ tabe reakʼ kan. Onako ape tala khon ạuripe oḍok giḍikakʼ hạbicʼ aperen bạiriko samaṅre bape teṅgo daṛeakʼa.

¹⁴ Onate, setakʼ bela apeakʼ gusṭirenko lekate iń samaṅre hecʼkatepe teṅgokʼa. Ar okaṭakʼ gusṭirenko ińakʼ tireko sapʼ ńamokʼ ona gusṭiren do bõsrenko lekateko laha hijukʼa; ona modre okaṭakʼ bõsrenko ińakʼ tireko sapʼ ńamokʼ ona bõsren hoṛko do gharońj lekateko laha hijukʼa; ona modre oka gharońjren do ińakʼ tireko sapʼ ńamokʼa ona gharońjren hoṛko do mimitʼ hoṛkateko laha hijukʼa.

¹⁵ Ar okaṭakʼ do ḍahao marao sarapakʼ tabe reakʼkan ona okoe hoṛ ṭhen ńamokʼ uni hoṛ ar uniyakʼ sanamakʼ do seṅgelre atar giḍikakʼ hoyokʼa. Uni do Probhu Isorakʼ bondobose bemanot akada ar nonkan mitʼṭecʼe kạmi akada one okaṭakʼ do Israelko lạgitʼ mitʼṭecʼ lajao paṛaoakʼkan.”

¹⁶ Dosar hilokʼ ạḍi setakʼre Josuạ do gusṭi lekate Israelko Probhu Isor samaṅreye ạguketʼkoa, ar onate Jihudi gusṭirenkoko sapʼ ńamena.

¹⁷ Ona tayom Jihudạ gusṭiren bõskoko lahayen khan Serah bõsrenko sapʼena. Ona tayom Serah bõsren murubbiko do mimitʼ hoṛkateko laha hecʼena khan Sabdiye sapʼena.

¹⁸ Tayomte Sabdi gharońjren hoṛko mimitʼ hoṛkate samaṅ secʼko hecʼen khan Jihudạ gusṭiren Karmiren hopon Akhane sapʼena. Karmi do Sabdiren hopon Serahren goṛomtetʼ koṛae tahẽkana.

¹⁹ Josuạ do unre Akhane metadea, “E bạbu, sạri katha menkate Israelkoren Isor sarhao ar ṭhonokʼ emaeme; ar am okam ceka akatʼ ona lạiyạńme, alom okoea.”

²⁰ Akhane roṛ ruạṛkeda, “Noa katha do sạri kana, Israelkoren Probhu Isor upạrteń kại akada. Ar okań kạmi akatʼ ona do noa kana,

²¹ iń do luṭ reakʼ jinisko khon Sinạr disạm reakʼ mońjakʼ mitʼṭecʼ kicricʼ, bar keji tala rupạ ar turui sae gram ojon reakʼ mitʼṭecʼ sona ḍhimbạ reakʼ laloc bạń sambṛao daṛeakʼte onań ạgu akada. Onako do ińakʼ tạmbure ot latarreń topa oko akada ar ona latarre do rupạ menakʼa.”

²² Niạ katha ańjomkate Josuạ do hoṛe kolkatʼkoa. Onko do ńir senkate ona tạmbure bolokateko ńelkeda onḍe thoṛa jinis do topa oko menakʼa, ar onako reakʼ latar utạrre do rupạ menakʼa.

²³ Onko do tạmbu khon onako oḍok ạguketʼte Josuạ ar Israelko samaṅre ạgukate Probhu Isor samaṅreko dohokada.

²⁴ Josuạ ar sanam Israelko Serah bõsren Akhan do Akor lodamteko idikedea. Ar uni sãote ona kicricʼ, rupạ, sona ḍhimbạ, Akonren gidrạko, uniren ḍaṅgrako, bhiḍiko, gadhako ar uniyakʼ tạmbure cetʼ cetʼko tahẽkan ona jotoko iditorakeda.

²⁵ Ona tayom Josuại menkeda, “Abo cetanre cedakʼ muhin dom ạgukeda? Teheń Probhu Isor do amre hõ muhine paṛao ocoya.” Unre sanam Israelko do pạhilre Akhan ar ona tayom do uni gharońjren sanamko dhiriteko tiń gocʼketʼkoa. Ar ona tayom do jotowakʼko jeretʼ giḍikada.

²⁶ Akhanakʼ hoṛmo cetanre onko do ạḍi utạr dhiriko puńjikeda. Ona do teheń hạbicʼ hõ menakʼgea. Inạ tayom Probhu Isor do acʼakʼ edre khone ạcurena. Ar onate ona jaega do Akor lodamko metakʼkana.