Josuạ 5 - সান্তালী বাইবেল

Israelkoko khatna ocokʼkan

¹ Jordan gaḍa pạchim secʼren Amorikoren sanam rajko ar doreão aṛe reakʼ sanam Kanani rajko tinreko ańjomkeda, abo bon parom hijukʼre Probhu Isor cetʼleka jordan gaḍa reakʼ dakʼ, metakʼme Israelko samaṅ khone ańjetʼ ocoletʼ un khon onkoakʼ as do chuṭạuentakoa; Israelko samaṅre teṅgokʼ reakʼ dil ar do baṅ hoylentakoa.

² Un jokhecʼ Probhu Isor do Josuại metadea, “Am do cokmuki dhiri reakʼ churi benaome ar onate Israelkom khatna ocokoa.”

³ Niạ katha ańjomkate Josuạ do cokmuki dhiri reakʼ churikoe benao ocokeda ar Gibeat Haralothre (metakʼme “Khatna buru”) Israelkoe khatna ocoketʼkoa.

⁴ Oka lạgitʼ uni noae kạmiketʼ ona do niạ lạṛhại lạgitʼ oḍokʼ calakʼ leka okoeko herel hoṛ do Misor disạm khonko oḍokʼ hecʼlen onko do Misor bạgiyakʼ tayom hahaṅkarregeko gocʼena.

⁵ Ar sanamkogeko khatna ocolen tahẽkana; menkhan Misor khon oḍok hecʼen tayom horre ar hahaṅkarre okoekoakʼ janam hoylen onko do okoehõ bako khatna ocoakan tahẽkana.

⁶ Misor khon oḍok hecʼen tayom okoe do lạṛhại lạgitʼ oḍok calakʼ leka umer hoyakan tahẽkan onko sanam ạuriko gujukʼ hạbicʼ Israelko do pongel bochor hahaṅkarre ạcur baṛae hoylentakoa, ente onko do Probhu Isorakʼ katha leka bako senlena. Ar Probhu Isor kiriạkate onkoren hapṛamko ṭhen okaṭakʼ disạm emako lạgitʼe gokʼletʼ ona toa ar dumur rasa ạtukʼkan disạm do bako ńel ńama.

⁷ Onate uni do onko bodolte onkoren hoponkoe teṅgoketʼkoa ar Josuạ do onkoe khatna ocoketʼkoa. Ar dãṛãn horre bako khatna ocoakan tahẽkante un hạbicʼ hõ bin khatnako tahẽkana.

⁸ Sanam hoṛkogeko khatna ocoyena ar onko ạuriko bogekʼ hạbicʼ ona jaega reakʼ ḍeraregeko tahẽyena.

⁹ Ona tayom Probhu Isor do Josuại metadea, “Misorre oka henostarepe tahẽkan teheń ona do ape khoniń sạṅgińkeda.” Ar onate teheń hạbicʼ hõ ona jaega do Gilgolko metakʼkana.

¹⁰ Israelko do ona cando reakʼ gelponakʼ din reakʼ ạyupʼ jokhecʼ Jerikho ṭạnḍi reakʼ Gilgolre bańcaokʼ porobko porobena.

¹¹ Ar ona dosar hilokʼge ona disạm reakʼ phosol khon benaoakʼ bin khạmiyanakʼ piṭhạ ar isinakʼ anajko jomkeda.

¹² Onko do oka hilokʼ ona disạm reakʼ jomakʼko jomketʼ ona dosar hilokʼ khonge Manna ńurokʼ do thirena. Ar inạ tayom Israelko do Manna ar bako ńamleda. Ona bochor khon onko do Kanan disạm reakʼ phosol jojomko ehopʼena.

Jerikho naṅgraha maraokʼkan

¹³ Jerikho sorko seṭeren khan Josuạ do bocʼ tarwaṛe tire menakʼtae mitʼṭecʼ hoṛ acʼ samaṅre teṅgo akane ńelkedea. Unre Josuạ do uni ṭhen sorenteye kulikedea, “Am do okoe secʼren kanam aleren, se bạiriko secʼren?”

¹⁴ Uni doe roṛ ruạṛkeda, “Okoe secʼren hoṛ hõń baṅkana. Iń do Probhu Isoren palṭon dolren senapoti kạnạń; ar ńitokʼ do nonḍeń hecʼakana.” Niạ katha ańjomkate Josuạ do otreye ombakʼente uniye ḍobokʼ adea are kulikedea, “Ińren Probhu Isor do cetʼ acʼren guti jãhãnakʼ metae lạgitʼe menjoṅkana?”

¹⁵ Probhu Isorren palṭon dolren senapotiye roṛ ruạṛkeda, “Amakʼ jaṅga reakʼ kharpa bojtam, ente am oka ṭhạ̃irem teṅgo akan ona do sonotgea.” Ar Josuạ do kharpae bocʼketʼtaea.