Josuạ 3 - সান্তালী বাইবেল

Jordan gaḍako paromokʼkan

¹ Josuạ do ạḍi setakʼreye beretʼente sanam Israelko soṅgekate Siṭim khon uṭhạuente jordan gaḍa ṭhene calaoena. Ar gaḍa ạuriko paromokʼ hạbicʼ onḍegeko tahẽyena.

^2-3 Pe din tayom mukhiyạko do ḍera reakʼ sanam jaegare senkate hoṛko noako hukumatʼkoa, “Aperen Probhu Isorakʼ goha-sinduk Liwi naekeko tinre gokʼ idikanpe ńelkoa unre ape do apeakʼ jaegape bạgi oṭowakʼa ar onkope pańja idikoa.

⁴ Ar onatepe bujhạu daṛeakʼa okaṭakʼ horte calakʼ hoyokʼtapea mente, ente noa lahare tisge noa horte do bape senakana. Menkhan ape do goha-sinduk khon bar hajar moka sạṅgińrepe tahena, ona sor do alope calakʼa.”

⁵ Inạ tayom Josuạ do hoṛkoe metatʼkoa, “Apnar baṛe saphakʼpe, ente gapa Probhu Isor do ape talare maraṅ hahaṛawakʼe kạmiya.”

⁶ Ona tayom uni do naekekoe metatʼkoa, “Ape do goha-sinduk gokʼkate hoṛko laha lahate gaḍape paromokʼa. ” Onate onko do goha-sinduk gokʼkate hoṛko laha lahateko calao idiyena.

⁷ Unre Probhu Isor do Josuại metadea, “Teheń khon sanam Israelkoakʼ mẽtʼre amakʼ manotiń ḍher ocoya, jemonko bujhạu daṛeakʼ, iń cetʼleka Mose sãoteń tahẽkan onkage am sãore hõ minạńa mente.

⁸ Am do goha-sinduk gokʼ idiyetʼkan naekekom metakoa jordan gaḍa ḍhipre seṭer tayom jemon laha ńokʼ senkate dakʼre teṅgo akaeko tahen.”

⁹ Josuạ do Israelkoe metatʼkoa, “Ape do nonḍe hijukʼpe ar aperen Probhu Isor okae menakatʼ ona ańjompe.

¹⁰ Aperen jiwetʼ Probhu Isor do ape sãore menae ar uni do Kananrenko, Hittirenko, Hiwiko, Pherisiko, Gergasiko, Amorirenko ar Jebusiko khạṭige ape samaṅ khone laga ńirkoa ar ona do nonkatepe bujhạu daṛeakʼa.

¹¹ One okoe doe goṭa dhạrtiren Probhu Isorkan uniyakʼ goha-sinduk do ape lahate tala jordan gaḍate bolokʼa.

¹² Ar ńitokʼ ape do Israelren gelbar gusṭiko khon mimitʼ hoṛkate gelbar goṭen hoṛ bachao joṅpe.

¹³ Ar tinre goṭa prithimiren Probhu Isorakʼ goha-sinduk gokʼ idikan naekeko jordan gaḍa reakʼ dakʼreko bolokʼa ar unre ạtukʼkan dakʼ do thir hapekʼa ar ona reakʼ dakʼ do ḍhip leka teṅgo tahena.”

¹⁴ Hoṛko do jordan gaḍa paromokʼ lạgitʼ tinre ḍerako uṭhạuketʼtakoa unre goha-sinduk gokʼ idikan naekeko do onko laha lahateko mohnḍayena.

^15-16 Phosol samṭao reakʼ purạ okte jordan gaḍa reakʼ dakʼ do ḍhip khon se oḍokʼkan tahẽkana. Menkhan goha-sinduk gogokʼ naekeko do jordan gaḍa ṭhen seṭerkate dakʼreko boloyen khan cetan khon ạtu hijukʼkan dakʼ do thir hapeyena. Ona dakʼ do sạṅgiń reakʼ Sartham nagraha sor Adam ato ṭhen dun dun teṅgoyena; onate dakʼ do Araba doreão secʼ, metakʼme buluṅ doreão secʼ ạtu calakʼ do thirena. Onate Israelko do Jerikho nagraha reakʼ samaṅ secʼte gaḍako paromena.

¹⁷ Ar tin hạbicʼ sanam Israelko jordan gaḍa ạuriko parom cabakʼ un hạbicʼ Probhu Isorakʼ goha-sinduk gokʼ idiyetʼkan naekeko do jordan gaḍare kuṭhạ̃ṛ otreko teṅgo tahẽyena; ar sanam hoṛ do kuṭhạ̃ṛgekoge parom calaoena.