Josuạ 24 - সান্তালী বাইবেল

Sikem reakʼ bebosta

¹ Inạ tayom Josuạ do Israelren sanam gusṭirenko Sikemre mitʼ ṭhene jarwaketʼkoa. Uni do Israelren murubbiko, mathako, bikʼcạrko ar kạmiyạkoe hohowatʼkoa. Onkate onko do Isor samaṅreko hạjirena.

² Josuạ do sanam hoṛkoe metatʼkoa, “Israelkoren Probhu Isore meneda, ‘sedae jugre aperen hapṛamko do phurạt gaḍa hanasareko girobasokʼ kan tahẽkana ar debotakoko pujạwako kan tahẽkana. Onko modren mitʼ hoṛe tahẽkana uni do Abraham ar Nahorren apattetʼ Terah.

³ Menkhan iń do aperen hapṛam Abrahamge gaḍa hanasa khoniń ạgukedea ar Kanan disạm reakʼ sanam jaegakoreń dãṛãbaṛa ocokedea ar uniren bõskoń saṅge ocoketʼkoa. Ar Isahak iń danadea,

⁴ ar Isahak do Jakob ar Esao iń danadea. Seyir buru ṭoṭha do sompotti lekate Esaogeń emadea, menkhan Jakob ar uniren hoponko do Misor disạmteko calaoena.

⁵ “Ona tayom iń do Mose ar Aron iń kolketʼkinạ. Ar iń do kạmi hotete Misorrenkoń hạnketʼkoa, ar ona tayom do apeń oḍok ạguketʼpea.

⁶ Aperen hapṛamko do Misor disạm khon oḍokkate jalapuri ṭhenko hecʼena. Ar Misorrenko do rãt gạḍiko, sadomko ar aswarikoante arakʼ jalapuri hạbicʼko khudạu ạguketʼpea.

⁷ Menkhan Israelko do iń ṭhenko rakʼ homorketʼ khan onko ar Misorrenko talareń ńut ocokeda. Ar Misorrenko cetanre jalapuri reakʼ dakʼ iń ruạṛ ocoketʼte onkoń unum cabaketʼkoa. Misorrenko cetanre okań cekaletʼ ona ma apnarakʼ mẽtʼtegepe ńelakatʼ. Ar ona tayom do ḍher din hahaṅkarrepe girobasena.

⁸ “ ‘Inạ tayom iń do jordan reakʼ purub secʼren Amorikoakʼ disạmteń ạguketʼpea. Onko do ape upạrteko lạṛhạiyena menkhan apeakʼ tire onkoń jimạkatʼkoa. Ar ape samaṅ khoniń marao giḍikatʼkoa ar onkoakʼ disạmpe dokholana.

⁹ Tayomte Sipor hopon Moabren raj Balak do Israelko sãote lạṛhại lạgitʼe sapṛaoena ar ape sarapape lạgitʼ Beor hopon Biliame hoho ạgukedea.

¹⁰ Iń do Biliamakʼ katha bạń luturada, menkhan uni do apeye bhoratʼpea. Ar ińge Balakakʼ ti khoniń bańcaoketʼpea.

¹¹ “ ‘Ona tayom ape do Jordan gaḍa paromkate Jerikho nagrahatepe hecʼena. Jerikho nagraharen hoṛko ar Amoriko, Pherisiko, Kananiko, Hittiko, Gergasiko, Hiwiko ar Jebusiko do ape upạrteko lạṛhạiyena, menkhan iń do onko sanamko apeakʼ tireń jimạketʼkoa.

¹² Iń do ape laha lahate ńele koń kolketʼkoa; ar ńele do ape samaṅ khon Amorikoren unkin rajko laga ńirketʼkinạ. Apeakʼ tarwaṛe se akʼ-sarte noape onka akada ona do baṅa.

¹³ Ar okaṭakʼ jumire bape khaṭao akan ar okaṭakʼ ato ar nagraha bape benao akatʼ onako apeń ematʼpea. Ar ńitokʼ do onako nagraha ar atokorepe girobasokʼ kana; ona chaḍa okaṭakʼ darkha bape cas akatʼ ar okaṭakʼ jạitun daṛe bape rohoe akatʼ onako reakʼ jo hõ ńitokʼpe jomeda.’ ”

¹⁴ Ona tayom Josuại menkeda, “Ńitokʼ do pạtiạr salakʼ khạṭi ontorte aperen Probhu Isor sewawaepe ar uni ḍobokʼaepe. Aperen hapṛamko phurạt gaḍa hanasa Misor disạmre okoe debotakoko sewawako kan tahẽkan onko do ńitokʼ sạṅgiń giḍikakope ar Probhu Isor sewawaepe.

¹⁵ Ar aperen Probhu Isor sewawae bape menjoṅkan khan enḍekhan teheń ṭhik joṅpe okoepe sewawaea. Aperen hapṛamko Phurạt gaḍa hanasare okoe debotakoko sewawako kan tahẽkan onkope sewawakoa se okoeyakʼ disạmrepe girobasokʼ kan onko Amorikoren debotakope sewawakoa? Menkhan iń ar ińakʼ gharońjrenko do Probhu Isor gele sewawaea.”

¹⁶ Hoṛkoko roṛ ruạṛkeda, “Probhu Isor bạgikate eṭakʼ Isorle sewawako ona do ale khon sahaṛ akan tahenma.

¹⁷ Aboren Probhu Isor do acʼge abo ar aboren hapṛamko Misor disạm khon, golam oṛakʼ khon nonḍeye oḍok ạgu akatʼbona ar aboakʼ mẽtʼãhã samaṅrege maraṅ maraṅ hahaṛawakʼ kạmikoe kạmi akada. Aboakʼ goṭa dãṛãn horre tinạkʼ jạtrenko talate bon hecʼakan onkoakʼ ti khon unigeye bańcao akatʼbona.

¹⁸ Niạ disạmren Amoriko ar eṭakʼ sanam jạtrenko do Probhu Isorge abo samaṅ khone laga ńir akatʼkoa. Onate ale hõ Probhu Isor gele sarhaoea, ente uni kangeae aboren Isor do.”

¹⁹ Niạ katha ańjomkate Josuạ do hoṛkoe metatʼkoa, “Menkhan ape do uni bape sewa daṛeaea, ente uni doe sonot Isor kana, acʼakʼ paona bhokti do okoe hõ bae ńam ocoakoa. Uni do apeakʼ kại ar ghạṭko bae ikạitapea.

²⁰ Ar Probhu Isor bạgikate eṭakʼ Isorkope sewawako enḍekhan uni doe dea giḍikapea ar lahate leka bae bhạlạipea menkhan ape cetanre bạṛicʼakʼe paṛao ocoyte apeye marao cabapea.”

²¹ Onate hoṛko do Josuạko metadea, “Baṅa, ale do Probhu Isor gele sewawaea.”

²² Unre Josuại metatʼkoa, “Ape do niạ kathate apnarge aperen gohape hoyena, Probhu Isor gepe sewawaea mente.” Onkoko roṛ ruạṛkeda, “Hẽ, ale do goha gele hoyena.”

²³ Josuại menkeda, “Enḍekhan apeko talare okoe ạnạṛi Isor menakʼko ńitokʼ sạṅgiń giḍikakope ar Israelkoren Probhu Isor secʼ moneyakʼpe.”

²⁴ Unre sanamkoge Josuạko metadea, “Ale do aleren Probhu Isor gele sewawaea ar uniyakʼ hukumkogele manaotaea.”

²⁵ Enhilokʼ Josuạ do Israelko lạgitʼ mitʼṭecʼ bondobose ṭarhaokeda ar Sikemre ạn-ạriko manao lạgitʼe hukumatʼkoa.

²⁶ Ar uni do Isorakʼ ạn-ạriko reakʼ sanamakʼ mitʼṭecʼ puthireye ol dohokeda. Uni do mitʼṭecʼ maraṅ dhiri hataokate Probhu Isorakʼ sonot jaega ṭhen Elon dare buṭạre onae bạisạukada.

²⁷ Ar sanam hoṛkoe metatʼkoa, “Niạ dhiri do abo upạrte goha leka tahena. Probhu Isor abo ṭhen okako kathae menakatʼ ona do niạ dhirigeye ańjom akada. Ar aperen Isorpe baṅe enḍekhan noa do ape upạrtege gohae ema.”

²⁸ Inạ tayom Josuạ do sanamko apan ạpin jaegateye kolkatʼkoa.

Josuạwakʼ gujukʼ

²⁹ Niạko ghoṭna tayom Probhu Isorren golam Nunren hopon Josuạ do mitʼsae gel bochor umerreye gocʼena.

³⁰ Ar hoṛko do Gas buru utạr secʼre uniyakʼ sompottire, metakʼme Ephrayim buru ṭoṭha reakʼ Timnat-serareko topakadea.

³¹ Josuạ tinạkʼ din jiwetʼe tahẽkan ar ona tayom dinkore okoeko murubbiko jiwetʼko tahẽkan unạkʼ din Israelko do Probhu Isorko sewawadea. Israelko lạgitʼ Probhu Isor oka bhageakʼkoe kạmiletʼ ona do onkoren murubbiko hõko ńelleda.

³² Israel hoponko do Misor disạm khon Josephakʼ oka jaṅkoko ạgu daraletʼ, ona do Sikemreko topakada. Noa jaega Jakob do Sikemren apattetʼ Hamorren hoponko ṭhen khon mitʼ sae rupạ ṭakateye kirińleda. Noa jaega do Joseph bõsrenkoakʼ sompotti talare tahẽkana.

³³ Inạ tayom Aronren hopon naeke Eleaser hõe gocʼen khan uni do Gibeareko topakadea. Noa Ephrayim buru ṭoṭha reakʼ ṭhạ̃i do uniren hopon Phinehase emocolena.