Josuạ 23 - সান্তালী বাইবেল

Josuạwakʼ bidạkʼ

¹ Probhu Isor do Israelko beṛhaeten bạiriko khone jirạu ocoketʼko tayom ḍher din paromena. Ar Josuạ do ḍher umer hoyentaea, are haṛamena.

² Mitʼ din uni do sanam Israelko, metakʼme onkoren mukhiyạko, mathako, bikʼcạrko ar kạmiyạko hohowatʼkoteye metatʼkoa, “Ńelpe, iń do aema umer hoyakantińạ, ariń haṛamena.

³ Ar aperen Probhu Isor do ape lạgitʼ onko jạtrenko cetanre okae ceka akatʼ ona do apeakʼ mẽtʼtegepe ńelana. Aperen Probhu Isor do acʼ apnarge ape huyạteye lạṛhại akana.

⁴ Jordan gaḍa khon pạchim jalapuri hạbicʼ okoe jạtrenkoń marao akatʼko ar okoe jạtrenko ńithõ sarecʼ menakʼko onko sanamkoakʼ jaega do apeakʼ gusṭiko talare sompotti lekateń hạṭiń akatʼkoa.

⁵ Aperen Probhu Isor do unige onko sarecʼ jạtrenko apeakʼ hor khone ocokʼkoa. Ape samaṅ khon uni doe laga ńirkoa ar ape do aperen Probhu Isorakʼ gokʼakʼ lekate onkoakʼ jaegape dokholjoṅa.

⁶ “Onate ape do apeakʼ sanam daṛete Moseyakʼ ạn-ạriko reakʼ puthire oka ol menakʼ ona jotowakʼpe manaoa; ar ona khon oka secʼge alope ghańjeṛokʼa.

⁷ Okoe jạtrenko ape talare menakʼko onko tulucʼ do alope sulukokʼa; onkoren debotakoakʼ ńutum hõ alope ńuma se onko ńutumte hõ alope kiriạkʼa. Onko alope ḍobokʼakoa se onko samaṅre bohokʼ alope kuḍburtapea.

⁸ Ape do aperen Probhu Isorre sapʼ kajak akae tahenpe, cetʼleka teheń hạbicʼ sapʼakae menakʼpe.

⁹ “Ape samaṅ khon maraṅ ar daṛean jạtrenko do Probhu Isorgeye laga ńir akatʼkoa. Teheń hạbicʼ okoehõ ape samaṅre bako ṭeṅgo ṭarhao daṛe akawada.

¹⁰ Aperen mitʼ hoṛ do mitʼ hajar hoṛe laga ńir daṛeako kana, ente Aperen Probhu Isorakʼ gokʼakʼ lekate uni do ape huyạteye lạṛhại akana.

¹¹ Onate aperen Probhu Isorakʼ dulạṛ reakʼ purạte moneyakʼpe.

¹² “Menkhan onko jạtrenko modre okoe do jiwetʼ menakʼko ar ape talareko tahenkan ar aperen Probhu Isor bạgikate onko sãotepe gatekʼ se onko sãotepe baplakʼ, se onko tulucʼpe helmelpe dohoy,

¹³ enḍekhan khạṭige baḍaekakʼpe, aperen Probhu Isor do ape samaṅ khon ar bae laga ńirkoa. Ona bodolte onko do aperen jhãmpa ar pạsi lekako hoyokʼa arpe sapʼ ocokʼa ar onko do apeakʼ dea reakʼ cạbuk ar mẽtʼ reakʼ jạnumko hoyokʼa. Ar nokʼõe napae okocʼ disạm aperen Probhu Isore emakawatʼpe nonḍe khonpe marao utạrokʼa.

¹⁴ “Dhạrtiren sanamko okaṭakʼ horte senokʼ hoyokʼtako ona horte iń hõ ńitokʼ doń senokʼ kana. Ar noa katha do bhagegepe baḍaea, aperen Probhu Isor bhạlạiype reakʼ okae gokʼ akawatʼpe ona reakʼ mitʼṭecʼ hõ baṅ ạuṛiyakʼ akana. Mitʼke mitʼ gokʼakʼ do purạu akana, ar baṅ puruạuakʼ do mitʼṭecʼ hõ bạnukʼanaṅ.

^15-16 Menkhan aperen Probhu Isorakʼ emakʼ bondobos bape manao, ar senkate debotakope sewawako arpe ḍobokʼako, enḍekhan aperen Probhu Isor do okaṭakʼ bhạlạiype reakʼe gokʼ akatʼ ar cetʼleka onako reakʼ purạu akan onkage Probhu Isor do baṅ bhạlạiype reakʼ oka botore udukʼ akatʼpe ona joto do apereye paṛao ocoya ar okaṭakʼ mońj disạme emakawatʼpe sesre ona khone marao giḍikapea. Ar Probhu Isorakʼ edre do ape upạrte jolokʼtege tahena, ar okaṭakʼ mońj disạme emakawatʼpe ona khon ạḍi usạragepe marao utạrokʼa.”