Josuạ 22 - সান্তালী বাইবেল

Jordan purub secʼren gusṭiko akoakʼ disạmteko ruạṛkan

^1-2 Inạ tayom Josuạ do Ruben ar Gad ar Manase gusṭiren adha hoṛko hohoatʼkoteye metatʼkoa, “Probhu Isorren guti Mose okaṭakʼe hukumatʼpe tahẽkan ona sanamakʼgepe manao ạguakada. Ona chaḍa ape do jotowakʼre ińakʼ taberepe tahẽkana.

³ Ḍher din hạbicʼ, metakʼme teheń hạbicʼ ape do aperen boehako bape bạgi giḍi akatʼkoa, ar aperen Probhu Isor okaṭakʼ dạyike ematʼpe tahẽkan ona hõpe sạt akada.

⁴ Aperen Probhu Isorakʼ gokʼakʼ leka uni do lạṛhại khon aperen boehakoe jirạu ocoakatʼkoa; ar onate Probhu Isorren guti Mose do jordan gaḍa hanasare okaṭakʼ jaegae em akawatʼpe ńitokʼ do onḍenakʼ ḍinḍạte ruạṛ calakʼpe.

⁵ Menkhan okako hukum ar ạn-ạriko Probhu Isorren guti Moseye em akawatʼpe ona manao reakʼ moneyakʼpe. Ar aperen Probhu Isor dulạṛepe, uniyakʼ horre taṛampe, uniyakʼ sanam hukumko manaope, unire sapʼ kajak akae tahenpe ar apeakʼ goṭa mon ar daṛete uni sewawaepe.”

⁶ Inạ tayom Josuạ do onkoe bhoratʼkoteye bidạkatʼkoa ar onko do akoakʼ jaegateko ruạṛ calaoena.

⁷ Manase gusṭiren adha hoṛko do Mose Bason disạme ematʼko tahẽkana, ar onkoren sarecʼ hoṛko Josuạ do Israel boehako sãote jordan gaḍa pạchim secʼre jaegae ematʼkoa. Josuạ do onko bidạko jokhecʼ bhoratʼkoteye metatʼkoa,

⁸ “Ape do ạḍi utạr mĩhũ-merom, sona, rupạ, pitạl, mẽṛhẽtʼ ar aema kicricʼ khạnḍwạkʼ ar dhonko hoyakantapea. Ńitokʼ ape do noako idiyte ruạṛ senokʼpe. Ar aperen bạiriko ṭhen khonpe luṭ akatʼ jinisko aperen boehako hõ hạṭińakope.”

⁹ Onate Probhu Isor Mose okaṭakʼe hukumade tahẽkan onkage Ruben ar Gad gusṭirenko ar Manase gusṭiren adha hoṛ do apnar lạgitʼ okako jaegako ńamletʼ ona Gilead ṭoṭhate ruạṛ calakʼ lạgitʼ Kanan disạm reakʼ Silore Israelko ṭhen khon bidạko hataokeda.

¹⁰ Ona tayom onko do Kanan disạm reakʼ jordan ṭhenko seṭeren khan gaḍa aṛere mitʼṭen maraṅ okocʼ pinḍko benaokeda.

¹¹ Ar sarecʼ Israelko doko ańjomkeda, akoakʼ jaegare Kanan disạm simạna reakʼ jordan gaḍa ṭhen onko do mitʼṭecʼ pinḍko benao akada mente,

¹² unre sarecʼ Israelko do onko upạrte lạṛhại lạgitʼ Siloreko jarwayena.

¹³ Onko do naeke Eleasarren hopon Phinehas do Gileadre Ruben ar Gad gusṭiren hoṛko ar Manase gusṭiren adha hoṛ ṭhenko kolkadea.

¹⁴ Onko do akoren mimitʼ gusṭi khon mitʼ hoṛkate jotote gel goṭen mukhiyạko Phinehas sãoteko kolkatʼkoa. Noko gelko do jotoge Israel bõsren mathako tahẽkana.

¹⁵ Onko do Gileadre Ruben ar Gad gusṭiren hoṛko ar Manase gusṭiren adha hoṛko ṭhen senkateko menkeda,

¹⁶ “Probhu Isorakʼ manḍerren jotogeko meneda, ‘Israelren Isor upạrte cedakʼ nonka dope kạmikana? Cedakʼ teheń do Probhu Isorakʼ hor khonpe ghańjeṛ akana ar uni upạrte hulkate ape lạgitʼ pinḍpe benao akada?

¹⁷ Peorre okaṭakʼ bon ghạṭletʼ ona lạgitʼ Probhu Isor do manḍerren hoṛkore mahamạriye kolleda; ar teheń hõ ona chut khon babon sapha utạr akana. Ona ghạṭ khon hõ babon cetʼleda,

¹⁸ ar ńitokʼ arhõ ape do Probhu Isorakʼ hor khon ghańjeṛokʼpe meneda? Teheń Probhu Isor upạrtepe hul enḍekhan gapage uni do aboakʼ goṭa Israel manḍerko cetanre edreye sodortaea.

¹⁹ Okaṭakʼ disạm apeakʼ ạidạrire hoyakan ona chut akan khan ape do parom hecʼkate Probhu Isorakʼ disạmte hijukʼpe. Nonḍe do Probhu Isorakʼ ḍera tạmbu menakʼa. Ar ale sãotege girobasokʼpe. Menkhan aboren Probhu Isorakʼ pinḍ chaḍa ar eṭakʼ jãhãn pinḍ benaokate Probhu Isor ar ale upạrte alope hula.

²⁰ Okako jinis do ḍahao maraokʼ reakʼ kan ona reaṅ Sera hopon Akan do bepạtiạricʼe hoylente Probhu Isorakʼ edre goṭa Israelko cetanre cetʼ baṅ paṛaolena? Uni do acʼakʼ kại iạte eskar do bae gocʼlena.’ ”

²¹ Niạ katha ańjomkate Ruben ar Gad gusṭiren hoṛko ar Manase gusṭiren adha hoṛko do Israelkoren judạ judạ bõskoren mathako roṛ ruạṛatʼkoa,

²² “Sanam daṛeanicʼ Probhu Isor! Sanam daṛeanicʼ Probhu Isor! Uni mae baḍaege ar Israelko hõko baḍaema. Probhu Isor upạrte jãhãn hul se bebatao reakʼ kạmi hoyakan khan enḍekhan teheń alope rehaelea.

²³ Ar Probhu Isorakʼ hor khon ghańjeṛokʼ lạgitʼ ar jeredokʼ samaṅokʼakʼ, jomakʼ samaṅokʼakʼ se sulukren samaṅokʼakʼ samaṅ iạte apnar lạgitʼ niạ pinḍle benao akatʼ khan enḍekhan Probhu Isor do acʼgeye sạjạilema.

²⁴ “Ale do noa botorte pinḍle benao akada, hoedaṛeakʼa ape se aperen bõsko do aleren bõskoko metakoa, ‘Israelkoren Probhu Isor sãote apeakʼ do cetʼ menakʼtapea?

²⁵ Probhu Isor do Rubenrenko, Gadrenko, apeko ar ale talare jordan gaḍa do simạna lekateye dohoakada. Onate Probhu Isor cetanre apeakʼ do jãhãn bakhra bạnukʼtapea.’ Ar hoedaṛeakʼa aperen hoponko do aleren hoponko Probhu Isor sewawae khonko bạgi ocokoa.

²⁶ “Onategele menleda, ‘dela hijukʼte, mitʼṭecʼ pinḍ bon benaojoṅa.’ Menkhan ona do jãhãn jeredokʼ samaṅokʼakʼ se eṭakʼ janwar samaṅko lạgitʼ do baṅkana.

²⁷ Ona do ape ar ale talare ar aboren hoponko talare niạ gohae ema, abon do Probhu Isor samaṅrege aboren jeredokʼ samaṅokʼakʼ ar eṭakʼ janwar samaṅokʼakʼ ar sulukren samaṅokʼakʼko bon samaṅa. Enḍekhan tayom daram dinkore aperen hoponko do aleren hoponko niạ katha bako men daṛeakoa, ‘Probhu Isor cetanre apeakʼ do jãhãn bakhra bạnukʼtapea.’

²⁸ “Ale dole hudisleda, onko do ale se aleren hoponko ona kathako metakore onkole roṛ ruạṛakoa, ‘Probhu Isorakʼ pinḍ leka ńelokʼkan noa pinḍ beṅgetʼakʼpe. Jeredokʼ samaṅokʼakʼ ar eṭakʼ janwarko samaṅko lạgitʼ aleren hapṛamko noa do bako benao akada menkhan ape ar ale talare jemon noa do goha leka tahen ona lạgitʼko benao akada.’

²⁹ “Aleren Isor Probhu Isorakʼ ḍera tạmbu samaṅre okaṭakʼ pinḍ menakʼ ona chaḍa jeredokʼ samaṅokʼakʼ, jomakʼ samaṅokʼakʼ ar janwarko samaṅko lạgitʼ eṭakʼ jãhãn pinḍ benaokate Probhu Isor upạrtele hul ar uniyakʼ hor khonle ghańjeṛokʼ ona do ale khon sạṅgińre tahenma.”

³⁰ Ruben, Gad ar Manase gusṭiren hoṛko do naeke Phinehas ar Israel manḍerren mukhiyạko, metakʼme Israel bõskoren mathako okaṭakʼko metatʼko onate onko doko kusiyena.

³¹ Ar naeke Eleasarren hopon Phinehas do onkoe metatʼkoa, “Teheńle bujhạu daṛeakʼkana, Probhu Isor do abo sãorege menaea, ente niạ ape do Probhu Isor upạrte bepạtiạrakʼ do bape kạmi akada. Ape do Probhu Isorakʼ ti khon Israel hoponkope rukhiyạketʼkoa.”

³² Inạ tayom Eleasarren hopon Phinehas ar mukhiyạko do Gileadre Rubenrenko ar Gadrenko ṭhen khon Kanan disạmteko ruạṛ calaoente sanamakʼ katha Israelkoko baḍae ocoketʼkoa.

³³ Ar ona ańjomte onko hõko kusiyena ar Isorko sarhaokedea. Rubenrenko ar Gadrenko oka disạmreko girobasokʼkan tahẽkan ona marao lạgitʼ onko upạrte lạṛhại reakʼ katha do ar bako roṛleda.

³⁴ Rubenren ar Gadrenko do ona pinḍ reakʼ ńutumko dohokeda, “Abo talare goha do niạge, Probhu kangeae Isor do.”