Josuạ 21 - সান্তালী বাইবেল

Liwiko lạgitʼ nagraha ar atoko

¹ Liwi gusṭiren mathako do naeke Eleasar, Nunren hopon Josuạ ar Israelkoren judạ judạ bõsren mathako ṭhenko senena.

² Onko do Kanan disạm reakʼ Silore onkoko metatʼkoa, “Ale girobasokʼ ar aleren ạsul janwarko lạgitʼ ato beṛhaeteakʼ ạtiń ṭạnḍiko em hạṭińale lạgitʼ Probhu Isor do Mose hoteteye hukum akawatʼpea.”

³ Onate Probhu Isorakʼ hukum lekate Israelko do akoakʼ sompotti khon adomakʼ ato ar ạsul janwarko lạgitʼ ạtiń ṭạnḍiko ematʼkoa.

⁴ Adoko gulibãṭketʼ khan pạhilre Kohat bõsrenkoakʼ ńutum rakapʼena. Noko Liwiko modre okoe do naeke Aron bõsrenko tahẽkan onko do Jihudạ, Simeon ar Benjamin gusṭirenkoakʼ jaega khon gelpe goṭecʼ ato ar nagrahako ńamkeda.

⁵ Kohat bõsren sarecʼ hoṛko do Ephrayim gusṭirenkoakʼ jaega khon ar onko adha gusṭi metakʼme Dan ar Manase gusṭirenkoakʼ jaega khon gel goṭecʼ ato ar nagrahako ńamkeda.

⁶ Gulibãṭkate Isakar gusṭirenkoakʼ jaega khon, Aser ar Napthali gusṭirenkoakʼ jaega khon ar Bason disạmren Manase gusṭiren adha gusṭirenkoakʼ jaega khon Gerson bõsren hoṛko do gelpe goṭecʼ ato ar nagrahako ńamkeda.

⁷ Ruben, Gad ar Sebulon gusṭirenkoakʼ jaega khon Merari bõsren judạ judạ gharońjrenko do gelbar goṭecʼ ato ar nagrahako ńamkeda.

⁸ Mose hotete emakʼ Probhu Isorakʼ hukum leka Israelko do gulibãṭkate niạko ato ar nagraha ar ona sãoteakʼ ạtiń ṭạnḍiko Liwikoko ematʼkoa.

^9-10 Liwikoren Kohat gharońjrenko talare gulibãṭ hoyen khan Aronren hoponkoakʼ ńutum rakapʼena. Onate Jihudạ ar Simeon gusṭirenkoakʼ jaega khon adomakʼ ato ar nagraha do onkoko ematʼkoa.

¹¹ Jihudạ gusṭirenko do buru ṭoṭha reakʼ Kiriot-Arba, metakʼme Hebron ar ona beṛhaeteakʼ ạtiń ṭạnḍiko emocoyena. Arba do Anakikoren apate tahẽkana.

¹² Tobe Hebron beṛhaeteakʼ jaega ar atoko do laharege Jephun hopon Kalebakʼ sompotti lekate em hoylena.

^13-16 Onate Hebron, Libna, Jatir, Esemoa, Holon, Debir, Ayin, Juta ar Bet-Semes ar onako soṅgeteakʼ ạtiń ṭạnḍiko do naeke Aronren hoponko ńamkeda. Ona modre Hebron do asrayokʼ nagraha tahẽkana. Niạ banar gusṭi reakʼ jaega khon niạ are goṭecʼ ato ar nagraha do onkoko emocolena.

^17-18 Ona chaḍa Benjamin gusṭirenkoakʼ jaega khon hõ Gibeon, Geba, Anathot ar Almon ńutuman ponea ato ar nagraha ar onako sãoteakʼ aṭiń ṭạnḍi hõko emocoyena.

¹⁹ Naekeko, metakʼme Aronren hoponko do jotote gelpe goṭecʼ ato ar nagraha ar ona sãoteakʼ ạtiń ṭạnḍiko ńamkeda.

²⁰ Liwiko modren Kohat bõsren sarecʼ gharońjko do Ephrayim gusṭirenkoakʼ jaega khon adomakʼ ato ar nagrahako ńamkeda.

^21-22 Ephrayim gusṭirenkoakʼ buru ṭoṭha modre Sikem, Geser, Kibsayim ar Bet-Horon ńutumanakʼ ponea ato ar nagraha ar onako sãote aṭiń ṭạnḍi hõko emocoyena. Inạ modre Sikem do tahẽkana khũniyạhiko lạgitʼ asrayokʼ nagraha.

^23-24 Ona chaḍa dan gusṭirenkoakʼ jaega khon Elteke, Gibethon, Ajalon ar Gat-rimon ńutumanakʼ ponea ato ar nagraha ar ona beṛhaeteakʼ ạtiń ṭạnḍiko emocoyena.

²⁵ Manase gusṭiren adha hoṛkoakʼ jaega khon Tanak ar Gat-rimon ńutumanakʼ barea ato ar ona sãoteakʼ ạtiń ṭạnḍi hõ onko doko emocoyena.

²⁶ Ạsul janwarkoakʼ ạtiń ṭạnḍi sudhạ niạ gel goṭecʼ ato ar nagraha do Kohat bõsren sarecʼ gharońjrenko ńamkeda.

²⁷ Manase gusṭiren adha hoṛkoakʼ jaega khon Bason disạm reakʼ Golan ar Bestera ńutumanakʼ barea ato ar ona sãoteakʼ ạtiń ṭạnḍi do Liwi gusṭiren Gersonkoko emocoyena.

^28-29 Ona chaḍa Isakar gusṭirenkoakʼ jaega khon ạsul janwarakʼ ạtiń ṭạnḍiko sudhạ Kision, Daberat, Jarmut ar En-Ganim ńutumanakʼ ponea ato hõ Gersonkoko ńamkeda.

^30-31 Aser gusṭirenkoakʼ jaega khon ạsul janwarkoakʼ ạtiń ṭạnḍi sudhạ Misal, Abdon, Helkat ar Rehob ńutumanakʼ ponea ato hõko emocoyena.

³² Napthali gusṭirenkoakʼ jaega khon onkoko em ocolena Gạlil reakʼ Kedes, Hamot-Dor ar Kartan ńutuman pea ato ar ona sãoteakʼ ạsul janwar ạtiń ṭạnḍiko. Inạko modre Kedes do khũniạhiko lạgitʼ asrayokʼ nagraha tahẽkana.

³³ Ạtiń ṭạnḍi sudhạ gelpe goṭecʼ ato ar nagraha do Gersonrenkoakʼ judạ judạ gharońjrenko emocoyena.

^34-35 Liwikoren sarecʼ bõsko, metakʼme Merariko doko em ocoyena Sebulon gusṭirenkoakʼ jaega khon Jokneam, Karta, Dimna ar Nahalal ńutumanakʼ ponea ato ar onako sãoteakʼ ạṭiń ṭạnḍiko.

^36-37 Ona chaḍa Ruben gusṭirenkoakʼ jaega khon ạsul janwar ạtiń ṭạnḍiko sudhạ Beser, Johas, Kedemot ar Mephat ar Mephat ńutuman ponea atoko emocoyena.

^38-39 Gad gusṭirenkoakʼ jaega khon Gileadkoakʼ Ramot, Mahanayim, Hesbon ar Jaser ńutumanakʼ ponea ato ar ona sãoteakʼ ạtiń ṭạnḍiko emocoyena. Inạko modre Ramot do khũniạhiko lạgitʼ asrayokʼ nagraha tahẽkana.

⁴⁰ Jotote gelbar goṭecʼ ato do Liwikoren sarecʼ bõsko, metatʼme Merarikoren judạ judạ gharońjrenko emocoyena.

⁴¹ Israelkoko hat akatʼ jaega modre ạsul janwar ạtiń ṭạnḍiko sudhạ jotote pongel irạl goṭecʼ ato ar nagraha do Liwikoakʼ tahẽkana.

⁴² Niạko mimitʼ ato ar nagrahako beṛhaete do ạtiń ṭạnḍiko hõ tahẽkana.

⁴³ Probhu Isor do Israelkoren hapṛamko oka jaega emako reakʼe gokʼatʼko tahẽkan onako jotowakʼgeye ematʼko tahẽkana. Ar Israelko do ona disạmko dokholketʼte onḍe girobasokʼko ehopʼena.

⁴⁴ Onkoren hapṛamko ṭhen Probhu Isorakʼ gokʼakʼ lekage uni do beṛhaeteakʼ lạṛhạiko khone jirạu ocoketʼkoa. Cele bạirige onko samaṅre bako teṅgo daṛeada. Probhu Isor do sanam bạiriko onkoakʼ tireye jimạkatʼkoa.

⁴⁵ Probhu Isor do Israelko bhạlạiko reakʼ okae gokʼatʼko tahẽkan ona reakʼ mitʼṭecʼ hõ sarecʼ do baṅ tahẽlena, uni do jotogeye purạukeda.