Josuạ 20 - সান্তালী বাইবেল

Asrayokʼ nagraha

¹ Inạ tayom Probhu Isor do Josuại metadea,

² “Israelkom metakoa, ‘Mose hotete okań hukum akatʼme ona leka jemon onko do asrayokʼ nagrahako benaojoṅ.

³ Jãhãe ackage se khũn reakʼ monsubạ baṅkate jãhãeye gocʼle khan enḍekhan uni do onḍeye ńir bańcao daṛeakʼa ar mãyãm reakʼ okoeye halae uniyakʼ ti khon rukhiyại ńama.

⁴ Uni do niạko asrayokʼ nagraha reakʼ jãhãṭakʼ mitʼṭecʼ nagraha reakʼ phaṭok duạr ṭhen senkate onḍenko murubbiko acʼakʼ joto kathae lạiyakoa. Ar ona tayom do nagrahareko bolo ocoaea ar tahen lạgitʼ mitʼṭecʼ jaegako emaea.

⁵ Ar mãyãm halayicʼ uniye khudạu ạgulere hõ khũn akatʼ hoṛ do uni ṭhen bako jimạyea, ente uni do goje reakʼ monsubạ baṅ tahẽkantaea se hiskạ hõ baṅ tahẽkantaea.

⁶ Uni do bicạr bạisire ạuriye teṅgokʼ hạbicʼ ar un okteren maraṅ naeke ạuriye gujukʼ hạbicʼ ona asrayokʼ nagraharege tahen hoyokʼtaea. Ar inạ tayom do oka khone ńir paskao hecʼlen onḍe acʼakʼ oṛakʼteye ruạṛ calao daṛeakʼa.’ ”

⁷ Ona iạte Israelko do asrayokʼ nagraha lekate Napthali gusṭirenko do buru ṭoṭhare menakʼ Gạlil reakʼ Kedesre, Ephrayim gusṭirenkoakʼ do buru ṭoṭha reakʼ Sikemre ar Jihudạ gusṭirenkoakʼ do buru ṭoṭha reakʼ Kiriat-Arbare, metakʼme Hebron doko begar dohokeda.

⁸ Jerikho samaṅ jordan gaḍa reakʼ purub secʼ Ruben gusṭirenkoakʼ do bilạn ṭạnḍi hahaṅkar ṭoṭha reakʼ Beserre, Gad gusṭirenkoakʼ do Gilead reakʼ Ramotre ar Manase gusṭirenkoakʼ do Bason reakʼ Golanre asrayokʼ lạgitʼ nagrahako ṭhikkeda.

⁹ Jãhãe Israel hoponko se onko talareko girobasokʼkan eṭakʼ jãhãn jạtrenko ackage jãhãeye goje enḍekhan uni do onako nagraha reakʼ jãhãṭakʼ mitʼṭecʼte senkateye ńir bańcao daṛeakʼa. Ar mãyãm halayicʼ do bạisire khũniạhiyakʼ bicạr ạuri hoyokʼtae hạbicʼ bae gocʼ daṛeaea.