Josuạ 2 - সান্তালী বাইবেল

Rahab ar disạm cikʼyạko

¹ Nunren hopon Josuạ do Siṭim khon barea disạm cikʼyạkin niạ katha menkate oko okoteye kolkatʼkinạ, “Aben do ona disạmte senkate Jerikho nagraha mońjteben ciyạ ạguiya.” Ar unkin do inạ katha ańjomkate Jerikho nagrahatekin calaoena. Ar onḍe do Rahab ńutuman mitʼṭen kusumbiyakʼ oṛakʼre senkate kin tahẽyena.

² Unre Jerikho nagraharen rajakʼ luturre seṭerena baṅma disạm cikʼyạ lạgitʼ Israelren bar hoṛ do ạyupʼ jokhecʼ nonḍe kin hecʼakana.

³ Raj do ona katha ańjomkate Rahab ṭhene roṛgotʼkada, “Okoekin hoṛ hecʼkate amakʼ oṛakʼre kin bolo akan unkin oḍok ạgukinme, ente unkin do goṭa disạm ciyạ lạgitʼkin hecʼakana.”

⁴ Menkhan Rahab do unkine oko dohokatʼkinạ. Uni doe menkeda, “Hẽ, unkin hoṛ do iń ṭhenkin hecʼlengea menkhan, oka khonkin hecʼlena ona do bạń baḍaea.

⁵ Unkin do ạyupʼ jokhecʼ nagraha reakʼ phaṭok duạr sińkakʼ laharege kin calaoena. Ar okaṭakʼ hortekin oḍok senena ona do bạń baḍaea. Ape do ńitokʼge unkin tayomtepe senlen khan hoedaṛeakʼa unkin pe sapʼ daṛeakina.”

⁶ Menkhan Rahab do unkin hoṛ chad cetanreye idiketʼkinte ṭisi reakʼ ḍạṭhicʼteye topa okokatʼkinạ.

⁷ Rahabakʼ katha ańjomkate onko hoṛ do disạm cikʼyạkin sapʼkin lạgitʼko oḍokena. Ar jordan gaḍa one oka secʼte taṛam paromokʼ ona horko sapʼkeda. Ar nagraha bahreko oḍok senen sãote phaṭok duạr doko sińkeda.

^8-9 Ar disạm cikʼyạkin ạurikin jaegakʼrege Rahab do chadte idiketʼkinteye metatʼkinạ, “Ińiń baḍaea Probhu Isor do niạ disạme emakatʼpea. Ar ape reaṅ botor do ale talare paṛaoakana. Ar disạmren hoṛko hõ ape botorte jiwi oṭaṅ akantakoa.

¹⁰ Misor disạm khon oḍok hecʼen tayom Probhu Isor cetʼleka arakʼ doreão reakʼ dakʼ ape samaṅ khone ańjetʼ ocoletʼ ona hõle ańjomakada. Sihon ar Og ńutuman jordan gaḍa purub secʼren Amorikoren barea rajakʼ oka dosape hoyoco akatʼ tạkin ona hõle ańjom akatʼa.

¹¹ Ar noako ańjomkate aleakʼ joto as do caba akantalea ar ape botorte aleakʼ dilko hõ ses akan talea. Aperen Probhu Isorge sermaren ar dhạrtiren Isor kanae.

¹² Iń do aben cetanreń pạtiạu akana, onate ńitokʼ aperen Probhu Isor ńutumte iń kiriạwạń ben jemon, aleakʼ gharońj cetanre hõ pạtiạran ben tahen. Ar nonkan mitʼṭecʼ cinhạ imạń ben jemoniń bujhạu daṛeakʼ,

¹³ ińren go-baba, boeha-misera ar onkoren sanam hoṛkoakʼ jiwi ben rukhiyạite jiwetʼben doholea.”

¹⁴ Ona katha ańjomkate unkin hoṛ dokin menkeda, “Ạliń do ạlińakʼ katha leka bạliń kạmi enḍekhan ape bodolte ạlińakʼ jiwi calakʼma. Ar ạlińakʼ katha okoe ṭhen hõ bam sodor enḍekhan tinre Probhu Isor do niạ disạm aleye emalea unre ale do ape sãote mońjle beohara ar ape cetanre pạtiạrankole tahena.”

¹⁵ Ar uni maejiu oka oṛakʼreye girobasokʼ kan tahẽkan ona do nagraha beṛhaeteakʼ pạcri reakʼ mitʼṭecʼ hĩs tahẽkana; onate jalna secʼte babere ticʼketʼte unkine pheḍgotʼkatʼ kinạ.

¹⁶ Ar unkine metatʼkinạ, “Aben sasapʼ okoeko senakan onko jemon aloko sendra ńam ben onate buru secʼte calakʼ ben. Ar onḍe pe din oko akan tahen ben; ar ona tayom onko hoṛko ruạṛ hecʼlen khan abenakʼ horte ruạṛ calakʼ ben.”

^17-18 Unkin do maejiu kin metadea, “Tinre niạ disạmtele bolokʼa unre okaṭakʼ jalnatem pheḍetʼliń ona jalnare arakʼ baber tol baṅ tahen ar amren go-baba, boeha-misera ar amakʼ gharońjrenko ạgukate amakʼ oṛakʼre bam dohoko, enḍekhan ạliń okam kiriạ ocoketʼliń ona khon do chaḍao akanliń tahena.”

¹⁹ Unre jãhãege amakʼ oṛakʼ khon ḍaharteye oḍokokʼ enḍekhan uni do acʼge acʼakʼ gujukʼ lạgitʼ dạyike hoyokʼa. Ale do uni lạgitʼ dạyi bale tahena. Menkhan okoe am tulucʼ noa oṛakʼreko tahen onko cetanre jãhãege tiye tul enḍekhan uniyakʼ gujukʼ lạgitʼ do alege dạyile tahena.

²⁰ Ar ạlińakʼ noako katham lại pasnao enḍekhan ạliń okam kiriạ ocoakatʼ liń ona khon do chaḍao liń ńama.

²¹ Maejiue roṛ ruạṛkeda, “Ṭhikgea, aben okaṭakʼ ben menetʼ onkage hoyokʼma.” Ar noa menkateye bidạgotʼkakʼ kinạ ar unkin do ạkinakʼ hortekin ruạṛ calaoena. Ar Rahab do ona arakʼ baber jalnareye tol dohokada.

²² Unkin Israel hoṛ do ona jaega bạgikate burutekin rakapʼena ar pe din onḍekin oko tahẽyena. Ar sendrako oḍok senlen hoṛ do goṭa hor unkinko sendraketʼkinạ ar bako ńamletʼkinte onko doko ruạṛ calaoena.

²³ Ona tayom unkin Israel hoṛ hõ kin ruạṛena. Unkin do buru khon pheḍkate gaḍakin paromena ar Nunren hopon Josuạ ṭhen senkate okako hoylen ona jotowakʼ kin baḍae ocokedea.

²⁴ Unkin do Josuạkin metadea, “Noa katha do sạri kana je, Probhu Isor do goṭa disạmge aboakʼ tireye jimạ akada. Abo botorte onḍenko hoṛ do jiwi oṭaṅ akantakoa.”