Josuạ 19 - সান্তালী বাইবেল

Simeon gusṭirenkoakʼ jaega

¹ Dosar dhaoe gulibãṭketʼ khan Simeon gusṭirenkoakʼ ńutum rakapʼena ar uniyakʼ judạ judạ bõsrenkoakʼ jaegako ṭhikkeda. Onkoakʼ sompotti do Jihudạ gusṭirenkoakʼ jaega talare paṛaoena.

² Simeon gosṭirenkoakʼ sompotti talare do Ber-Seba, Seba, Molada,

^3-5 Hasa-Sual, Bala, Esem, Eltolad, Bethul, Horma, Siklag, Bet-Markabot, Hasar-Susa,

⁶ Bet-Lebaot ar Saruhen ńutuman gelpe nagraha ar onako aḍepase reakʼ sanam atokoko ńamkeda.

^7-8 Ona chaḍa Ayin-Rimon, Ethar ar Asan ńutuman ponea nagraha ar onako aḍepase reakʼ joto atoko ar Bakʼalat-Ber, metakʼme Negeb reakʼ Rama hạbicʼ onako nagraha beṛhaeteakʼ eṭakʼ sanam atokoko ńamkeda. Niạ do hoyokʼ kana Simeon gusṭiren judạ judạ bõsrenkoakʼ sompotti.

⁹ Onako sompotti do Jihudạ gusṭirenkoakʼ bakhra khon hatao hoylena, ente Jihudạ gusṭirenko do jạruṛako khon hõ bạ̃ṛti jaega akoakʼ hạṭińre paṛaolena. Onate Jihudạ gusṭirenkoakʼ jaega talare Simeon gusṭirenko do jaegako ńamleda.

Sebulon gusṭirenkoakʼ jaega.

¹⁰ Tesar dhaoe gulibãṭketʼ khan Sebulon gusṭirenkoakʼ ńutum rakapʼena ar onkoren judạ judạ bõsrenkoakʼ jaegako ṭhikatʼkoa. Onkoakʼ jaega reakʼ simạna do tahẽkana Sarid hạbicʼ.

¹¹ Onḍe khon simạna do pạchim secʼte Marala hạbicʼ rakapʼ senente Debeset secʼte Jokneam ṭhenakʼ ạtukʼ dakʼ ṭhen bhiṛạuena.

¹² Ona simạna do Sarid khon purub secʼ ạcurente Kislot-tabor ato hạbicʼ calaoena ar ona tayom do Daberat secʼte Saphiate rakapʼ calaoena.

^13-14 Ona tayom ona simạna do purub secʼte Gat-Hepher ar Et-kasin hạbicʼ sen idiyena. Ona tayom ona do Neah secʼ ạcurente Remonte senena ar Remon reakʼ utạr secʼ ạcurente Hanathonte calaoena ar Eptha-El lodamre oḍokena.

¹⁵ Sebulon gusṭirenkoakʼ jaegare do tahẽkana Katat, Nahalal, Simron, Idala ar Betlehem. Onkoakʼ bakhrare do gelbar goṭecʼ nagraha ar ona aḍepase reakʼ atoko paṛaoena.

¹⁶ Niạko nagraha ar ona aḍepase reakʼ atoko do Sebulon gusṭiren judạ judạ bõsrenkoakʼ sompotti hoyena.

Isakar gusṭirenkoakʼ jaega

¹⁷ Ponakʼ dhaoko gulibãṭketʼ khan Isakar gusṭirenkoakʼ ńutum rakapʼena ar onkoren judạ judạ bõsrenko jaegako ṭhikatʼkoa.

¹⁸ Onkoakʼ jaegare do paṛaoena, Jisreyel, Kesulot, Sunem,

^19-21 Hapharayim, Shion, Anaharat, Rabit, Kision, Ebes, Remet, En-Galim, En-hada ar Bet-Pasea.

²² Onkoakʼ jaega reakʼ simạna do Tabor, Sahasuma ar Bet-Semes secʼte jordan gaḍare senkate mucạtʼena. Onko do gel turui goṭecʼ nagraha ar ona aḍepase reakʼ sanam atokoko ńamkeda.

²³ Niạko nagraha ar onako aḍepase reakʼ atoko do Isakar gusṭiren judạ judạ bõskoakʼ sompotti hoyena.

Aser gusṭirenkoakʼ jaega

²⁴ Mõṛẽ dhaoko gulibãṭketʼ khan Aser gusṭirenkoakʼ ńutum rakapʼena ar onkoren judạ judạ bõsrenko jaegako ṭhikatʼkoa.

²⁵ Onkoakʼ jaegare do paṛaoena Helkat, Hali, Beten, Aksaph,

^26-27 Alamelek, Amad ar Misal. Pạchim secʼ onkoakʼ jaega reakʼ simạna do Karmel buru ar Sihor-Libnat secʼte purub nakha ạcurente Bet-Dagon secʼ calaoena ar Sebulon gusṭirenkoakʼ ṭoṭha ar Ephtah lodam secʼte Kabul leṅga ti secʼte utạr secʼ Bet-Emek ar Neyiel hạbicʼ calaoena.

²⁸ Ona tayom ona simạna do Ebron, Rehob, Hamon ar Kana secʼte maraṅ Sidon hạbicʼ calao idiyena.

^29-30 Ona tayom ona simạna do Rama secʼ ạcur calaoente pạcri esetʼ Tur nagrahate boloyena. Ona tayom Hosa secʼ ạcur calaoente Aksib ṭoṭha, Uma, Aphek ar Rahob jalapuri hạbicʼ senena. Aser gusṭirenkoakʼ hạṭińre do bargel bar nagraha ar ona aḍepase reakʼ atoko paṛaoena.

³¹ Niạko nagraha ar ona aḍepase reakʼ atoko do Aser gusṭiren judạ judạ bõsrenkoakʼ sompotti hoyena.

Napthali gusṭirenkoakʼ jaega

³² Turuiyakʼ gulibãṭre do Napthali gusṭirenkoakʼ ńutum rakapʼena ar onaren judạ judạ bõsrenko jaegako ṭhikatʼkoa.

³³ Onkoakʼ jaega reakʼ simạna do Helep ar Sakʼananim reakʼ Elon dare khon ehopʼkate Adami-Nekeb ar Jabniyel paromkate Lakum hạbicʼ sen idiyena ar jordan gaḍa hạbicʼ calaoena.

³⁴ Ona tayom ona simạna do pạchim secʼte senkate Asnot-Tabor talate senkate Hukokte sen idiyena. Dạkhin Sebulon gusṭirenkoakʼ simạna hạbicʼ, pạchim secʼ do Aser gusṭirenkoakʼ simạna hạbicʼ ar purub secʼ do jordan gaḍa ṭhenakʼ Jihudạ hạbicʼ Napthali gusṭirenkoakʼ simạna tahẽkana.

³⁵ Onkoakʼ jaegako modre pạcrite esetʼ noako ato hõ tahẽkana: Sidim, Ser, Hamat, Rakat, Kineret,

³⁶ Adama, Rama, Hasor,

³⁷ Kedes, Edreyi, En-Hasor,

³⁸ Iron, Migdal-El, Horem, Bet-anat ar Bet-Semes. Gel are nagraha ar ona aḍepase reakʼ atoko do onkoakʼ hạṭińre paṛaoena.

³⁹ Niạko nagraha ar ona aḍepase reakʼ atoko do Napthali gusṭiren judạ judạ bõsrenkoakʼ sompotti hoyena.

Dan gusṭirenkoakʼ jaega

⁴⁰ Eaeakʼ gulibãṭ hoyen khan Dan gusṭirenkoakʼ ńutum rakapʼena ar onaren judạ judạ bõsrenkoakʼ jaegako ṭhikatʼkoa.

⁴¹ Onkoakʼ sompotti modre Sora, Estaol, Ir-semes,

^42-44 Salabin, Aijalon, Itla, Elon, Timna, Ekron, Elteke, Gibethon, Balat,

⁴⁵ Jihud, Bene-Berek, Gat-rimon,

⁴⁶ Mejarkon, Rakon ar Jopa samaṅ reakʼ ṭoṭhako paṛaoena.

⁴⁷ Dan gusṭirenko do akoakʼ joto bakhra bako hat daṛeatʼ tahẽkante onko lạgitʼ jaega do huḍińge tahẽkana. Onate onko do Lesem nagrahako akromonketʼte onḍenko hoṛko bhagaoketʼkoa ar sanamko gocʼketʼkote onako hatkeda. Ar onko do Lesemre girobasokʼko ehopʼena ar onkoren hapṛamkoakʼ ńutum lekate ona jaega reakʼ ńutum do “Dan” ko dohokeda.

⁴⁸ Niạko nagraha ar ona aḍepase reakʼ atoko do Dan gusṭiren judạ judạ bõsrenkoakʼ sompotti hoyena.

Josuạwakʼ jaega

^49-50 Disạmko hạṭiń sạtketʼ khan Israelko do Probhu Isorakʼ hukum leka Nunren hopon Josuạ lạgitʼ disạmre mitʼṭecʼ sompottiko dohokeda. Onko do Ephrayim gusṭirenkoakʼ jaega talare buru ṭoṭha reakʼ timnat-Sera atoko emadea. Uni do ona atogeye khojletʼ tahẽkana. Ar nãwãte benaokate Josuạ do onḍege girobasokʼe ehopʼena.

⁵¹ Naeke Eleasar, Nunren hopon Josuạ ar Israelkoren judạ judạ gusṭiren mathako do Silore ńapamokʼ tạmbu reakʼ duạr ṭhen Probhu Isor samaṅre gulibãṭkate niạko jaega Israelkoko ṭhik dohowatʼkoa. Ar nonkate onko do disạm hạṭiń reakʼ kạmiko sạtkeda.