Josuạ 18 - সান্তালী বাইবেল

Kanan disạm reakʼ sarecʼ jumiko hạṭińokʼkan

^1-2 “Ar Israel hoponko do Silote senkateko jarwayena ar ńapamokʼ tạmbuko beretʼkeda. Goṭa disạmge Israelko tabere hecʼenre hõ onkoren eae gusṭiren hoṛko do unhõ sompotti bako ńamakatʼ tahẽkana.”

³ Onate Josuạ do Israelkoe metatʼkoa, “Aperen hapṛamkoren Probhu Isor okaṭakʼ disạm sompotti lekateye emakawatʼpe ona hat lạgitʼ do ar tinạkʼpe biloma?

⁴ Ape do mimitʼ gusṭiko khon pepe hoṛkate bachaokope. Onko do jemon mońjte disạm ńelkateko ol ạgui ar iń do onkoń kolkoa jemon akoakʼ gusṭirenko sompottiko hạṭiń daṛeako. Ar kạmi sạt baṛakate iń ṭhenko ruạṛ hijukʼ.

⁵ Onko do goṭa disạm eae ṭhenko hạṭińa. Ar dạkhin secʼ Jihudạ gusṭirenko oka jaegako emocoakan onko do onḍegeko tahena, ar utạr secʼ do Josephren bõsrenkoge.

⁶ Disạm reakʼ ona eae hạṭiń reakʼ mimitʼ goṭecʼ babotre jotowakʼ olkate iń ṭhenpe ạguiya, ar iń do aboren Probhu Isor samaṅre ape lạgitʼ iń gulibãṭa.

⁷ Tobe Liwiko do ape sãote jãhãn hạṭiń bako ńama, ente Probhu Isorren naeke lekate sekʼwa kạmi kangea onkoakʼ sompotti do. Gad ar Ruben gusṭiren hoṛko ar Manase gusṭiren adha hoṛko do laharege jordan gaḍa purub secʼre akoakʼ sompottiko ńamakada. Probhu Isorren guti Mosege ona do onkoe emakawatʼkoa.”

⁸ Ar hoṛko do disạm reaṅ jotowakʼ olkate ạgui lạgitʼko oḍok calakʼkan tahẽkanre Josuạ do onkoe metatʼkoa, “Senkate disạm do mońjte jotowakʼ ńelpe ar olkate iń ṭhen ạguiype. Ar ona tayom do nonḍe Silorege, Probhu Isor samaṅre ape lạgitʼ iń gulibãṭa.”

⁹ Onate onko hoṛ do disạm reakʼ sanam jaegateko calaoena. Onko do disạm reakʼ sarecʼ hĩs eae ṭhenko hạṭińketʼte mimitʼ hạṭiń reakʼ nagraha ar atoko reakʼ ńutum ar onko reaṅ jotowakʼ mitʼ mitʼte olkate Silo reakʼ ḍerate Josuạ ṭhenko ruạṛ hecʼena.

¹⁰ Josuạ do Silore Probhu Isor samaṅre Israelko lạgitʼe gulibãṭkeda ar onkoakʼ gusṭi lekate disạm do onḍeye hạṭińatʼkoa.

Benjaminakʼ bakra reakʼ jumi

¹¹ Gulibãṭkate Benjamin gusṭirenkoakʼ ńutum rakapʼena. Ar ona gusṭiren judạ judạ bõsko do oka jaega ematʼko ona do gulibãṭ lekate Jihudạ ar Joseph gusṭirenkoakʼ jaega talare paṛaoena.

¹² Utạr secʼ onkoakʼ jumi reakʼ simạna do jordan gaḍa khon ehopʼkate Jerikho reakʼ utạr senakʼ dhasna paromkate pạchim senakʼ buru ṭoṭha talate senkate Bet-Awen hahaṅkar hạbicʼ sen idiyena.

¹³ Onḍe khon simạna do Lus, metakʼme Bethel dạkhin reakʼ dhasna secʼte senkate latar Bet-Horon reakʼ dạkhinre okaṭakʼ buru menakʼ ona buru cetan reakʼ Atarot-Adarte pheḍ calaoena.

¹⁴ Ona tayom ona simạna do Bet-Horon dạkhin buru reakʼ pạchim secʼte senkate dạkhin secʼ ạcur calaoena ar Kiriot-Bakʼal, metakʼme Kiriot-Jearim hạbicʼ calao idiyena. Kiriot-Jearim do tahẽkana Jihudạ gusṭikoakʼ mitʼṭecʼ nagraha. Noa do hoyokʼ kana Benjamin gusṭirenkoakʼ pạchim senakʼ simạna.

¹⁵ Onkoakʼ dạkhin reakʼ simạna do pạchim Kiriot-Jearim reakʼ simạna khon ehopʼkate Nepthoah reakʼ dakʼ jharna hạbicʼ calaoena.

¹⁶ Ona tayom ona simạna do Rephayim lodam utạr reakʼ Ben-Hinom lodam samaṅ reakʼ buru latar hạbicʼ pheḍ calaoena. Ona tayom ona do Hinom lodam talate senkate Jebusikoakʼ nagraha dạkhin secʼ reakʼ dhasnakote senkate En-Rogel hạbicʼ calao idiyena.

¹⁷ Ona tayom ona simạna do utạr secʼ ạcur calaoente En-Semes secʼte Adumimte rakapʼ calakʼ hor samaṅ reakʼ Gelilotte senkate Rubenren hopon Bohanakʼ dhiri hạbicʼ pheḍ hecʼena.

¹⁸ Ona tayom ona do Araba utạr reakʼ dhasnakote senkate Arabate pheḍ calaoena.

¹⁹ Ona tayom ona simạna do Bet-Hogla utạr reakʼ dhasna secʼte buluṅ doreão utạr reakʼ doreãore, metakʼme jordan gaḍare dul mitʼena. Ona do tahẽkana Benjạmin gusṭirenkoakʼ dạkhin secʼ reakʼ simạna.

²⁰ Onkoakʼ purub secʼ reakʼ simạna do tahẽkana jordan gaḍa. Ar noage Benjamin gusṭiren judạ judạ bõsrenkoakʼ beṛhaeteakʼ simạna tahẽkana.

²¹ Benjamin gusṭiren judạ judạ bõsrenkoakʼ hạṭińre oka ato ar nagrahako paṛaolen onako do hoyokʼ kana, Bet-Hogla, Emek-Kesis,

²² Bet-Araba, Semarayim, Bethel,

²³ Awim, Para, Ophra,

²⁴ Kephar-Amoni, Ophni ar Geba. Onko do niạ gelbar goṭecʼ nagraha ar ona aḍepase reakʼ sanam atokoko ńamleda.

²⁵ Ona chaḍa onko do Gibeon, Rama, Be-Erot,

^26-28 Mispa, Kephira, Mosa, Rekem, Irpeyel, Tarala, Sela, Ha-Eleph, Jebusikoakʼ nagraha Jerusalem, Gibea ar Kiriotko ńamleda. Onko do jotote gel pon goṭecʼ nagraha ar ona aḍepase reakʼ joto atokoko ńamkeda.